Bilang sa wamoyo, tandaꞌ tamoyna a katutuꞌwan a kasan pakayadiꞌ ran sarayti kontamo. Sain say pakatandaꞌ tamo baleꞌ, magwaꞌ nin magꞌin nin pangibwatan tamon rumangas ket kai ti nin makapaabig, no kai say gawaꞌ tamo mangibwat sa pangangadoꞌ tamo a makapagsen konran kapada tamon mammemper. 2 Si sayay mangipaꞌkaꞌ a masadag anay tandaꞌ na, say katutuꞌwan ket say tandaꞌ na kurang et, 3 baleꞌ si tawo nin mampangadoꞌ ya, syay peteg a main nin tandaꞌ.^a

4 Ket sawanin anaod say maipaꞌkaꞌ sa pangangan nin niyatang sa dios-dios. Tandaꞌ tamo a sarain nin raywe-raywen ran tutawo, amboꞌ saran peteg tan kasan raruman tutuon Dios no kai saya tamoꞌ. 5 Oꞌ, abirno abaw saray sabtan ran dios-dios itaw sa langit man o iti sa lutaꞌ, tan sarayti ket ikwinta rasaran dios tan uunuren ran tutawo, 6 kontamo baleꞌ nin mammemper, saya ya tamoꞌ a Dios, si Ama. Pangibwaten nay sarba tan mabyay atamoynan magsirbi tan mamin rayo kona. Sayan-saya ya tamoꞌ anamaet a Uunuren tamo a si Jesu-Cristo, a dinmalan kona, naparsay sarba tan banaꞌ kona, mampagkabyay atamo nin nauman.

7 Baleꞌ amboꞌ nin saray sarban mammemper ket pariho a pakataros. Saray raruman naiparmaw sa pangrarayo nin dios-dios, no bilang wadiꞌ a mangan sara nin niyatang sa dios-dios, say wanra no mampangrayo sara nin dios-dios. Ket banaꞌ anaod ta amboꞌ et nin ararem a pakataros ra, no mangan sara nin sain, maguloy kanakman ra. 8 Say tutuo baleꞌ, no ani a kanen tamo ket amboꞌ in a rason nin mapaririktan tamoyay Dios. No mangan atamon sayay klasin kanen, kasan kabalikasan nin pangangan tamo konan Dios; ket no kai atamo nin mangan, wanin anamaet a lamang.

9 Wanin man, pakailag kamo, siꞌkamon magtandaꞌ a main nin kanepegan moyon mangan nin niyatang sa dios-dios, ta bangliꞌ a magꞌin in nin puon nin pagkakasalanan ran saray amboꞌ et nin ararem a pakataros ra yupaꞌ sa pangwaꞌ ran bagay a kuntra sa mantepren ra. 10 Bilang wadiꞌ, siꞌka nin makataros sa sain ket itaw ka sa balin dios-dios^b nin mampangan ket main nin busat a amboꞌ et nin ararem a pakataros na nin makaꞌkit komo, bangliꞌ no masugsog yan mangan nin niyatang abirno et nin sa wana ket mampangrayo yaynan dios-dios. 11 Ket yupaꞌ sa wanin anaod, mangibwat sa kimey mo a siꞌkan main nin pakatandaꞌ, ket mangkasidaꞌ a byay nan kapada tamon mammemper a para kona ket nati ya si Cristo. 12 Ket sa wanin a mangyadiꞌ, magkasalanan ka kona ni Cristo banaꞌ ta mampagkasalanan ka konan busat mo sa pammemper nin makapoy a pammemper na ta manꞌipagwaꞌ mo kona a sa wana ket kasalanan.

13 Edet anaod, pauryan koynay kanepegan ko. No say pangangan ko ket pangibwatan nin masidaꞌ a byay nan busat ko sa pammemper, kai akoyna gapo nin mangan nin sain ta pigaw nin amboꞌ ako a magꞌin nin rason a magkasalanan ya.