3 Sayti a ubat ko konran saray isen komoyo nin mampanita kongko maipaꞌkaꞌ sa kanepegan ko:

4 Kasa paran kanepegan min siꞌkamin apostoles nin mangrisibi nin sustinto mi mangibwat konran saray mammemper a mampagsirbyan mi? Main, syimpri a! 5 Anamaet, kasa paran kanepegan kon awit-awiten koyay asawa ko a sayan mammemper sa keen-keen kon bilang konran raruma nin apostoles tan saray bubsat na ni Uunuren a Jesus tan si Pedro? Main a lamang! 6 O, bangliꞌ no siꞌkami tamoꞌ ni Bernabe a kasan kanepegan nin tumgen anan magtrabaho et nin raruma nin paningkapan min ikabyay mi? Impusibli nin wanin! 7 Adti kamo nin makaꞌkit nin sayay sundaloꞌ a sya a mamayad sa matka-matkap na nin mako kigira o sayay mangmumula a kai na nin matawayan a bungan mula na, o sayay mammastor a kasan tao na konran uayep a mampasturan na? Kasa gapo nin wanin!

8 Sayti nin manꞌibaritaꞌ ko ket amboꞌ nin say ibaritaꞌ nin tawo tamoꞌ. Manꞌibaritaꞌ tin lamang sa Libron Gugan-gan 9 nin nipataoy nan Dios kona ni Moises ta wanadtaw, “Andiꞌ ma nin barungusan a baka a manꞌusaren mon mangirik.”^a Sawanin, si baka tamoꞌ kasi a mangkapagawan nan Dios sin nipasurat naya in? 10 Kai, ta kasan dwadwa a siꞌkamin trabahador nan Dios a mangkapagawan isen anamaet. Naisurat anaod in ta pigaw nin maipaꞌkit a siꞌkamin trabahador nan Dios ket main nin kanepegan min mangrisibin sustinto, kapada a si sayay mangngadado o sayay mangyayatab ket ilalwan na a main nin tao na. 11 Baraꞌmon nimula mi komoyo a mabistan bagay-bagay a main nin kabiangan konan Dios. Mabyat kasin tuloy no baraꞌmon mangyatab kami nin say bubagay iti sa mundo a mangibwat komoyo? Syimpri kai! 12 No saray raruma ket main nin kanepegan ran maningkap nin sustinto mangibwat komoyo, mas main nin kanepegan mi ta siꞌkami a nangiparateꞌ konan Mabistan Patandaꞌ komoyo maipaꞌkaꞌ kona ni Cristo. Wanin man, kai mi nin inusar in nin kanepegan mi, no kai edet, nitpel mi a sarba, ta pigaw nin kai kami magꞌin nin makapaed sa pangangakoꞌ ran tutawo konan Mabistan Patandaꞌ.

13 Sigurado nin tandaꞌ moyo a saray magsisirbi sa sayay timplo ket mangkalapen ray ikabyay ra sa timplo. Saray mangawit nin daꞌton ran tutawo sa altar ket main nin tao radtaw sa daꞌton. 14 Bilang wanin, nibibilin na ni Uunuren a Jesus a saray mangipata-patandaꞌ nin Mabistan Patandaꞌ ket kalapen ray ikabyay ra konran saray mampagsirbyan ra.^b

15 Wanin man, kai ako gapo nangusar nin sain nin kanepegan ko ket kai koyti anamaet nin manꞌisurat sawanin ta pigaw nin maningkap akoynan sustinto komoyo. Maong anay mati ako sa bitil dyan si mangrisibi akon sustinto nin makaglat sa maipasirayo ko. Siin ket si manꞌipatandaꞌ koyay Mabistan Patandaꞌ nin kai nin pabayad. 16 Si pangingipatandaꞌ ko konan Mabistan Patandaꞌ ket kai ya magwaꞌ anaod nin rason a ipasirayo ko, banaꞌ ta sitin trabaho ket naipabalatay ya kongko tan kadoꞌ akoyna no kai ko nin gawꞌen! 17 No kumon a buluntad sa nakem ko nin gawꞌen ti, gun-gunawan nakon Dios. Baleꞌ amboꞌ nin siꞌko a nagdisisyon no kai si Dios a nangipya kongko kanyaꞌ nin 18 adti liꞌ wadiꞌ a gun-guna ko? Siti e, si ipatandaꞌ koyay Mabistan Patandaꞌ nin kai ako nin pabayad, abirno nin main nin kanepegan kon mangrisibin sustinto mangibwat sa ginwaꞌ ko. 19 Banaꞌ ta kai ako nin pabayad, amboꞌ akon aripen nin siꞌnuman a tawo. Wanin man, manꞌikwinta kon aripen ako nin sarban tawo ta pigaw nin abaw saray maayat kon magmatalek kona ni Cristo.

20 Bilang wadiꞌ, no iti ako sa busel ran kapada kon Judio, pigagawaꞌ nin Judio a pigagawaꞌ ko ta pigaw nin maayat kosara. Oꞌ, abirno nin amboꞌ akoynan iti sa sirong nin pakauray nin Gugan-gan, no iti ako sa busel ran saray iti et sa sirong nin sain, tumbuken ko anamaet ta pigaw nin maayat kosara. 21 Ket no iti ako anamaet sa busel ran saray amboꞌ nin Judio a amboꞌ saran iti sa sirong nin say naduma-duman tumbuken nin tutawon Judio, mampagkabyay ako anamaet nin amboꞌ nin iti sa sirong nin sayti nin tumbuken min Judio ta pigaw nin maayat kosara. Kai baleꞌ rabay nin irgwen nin sain nin man-gawꞌen ko a kai ako nin mantumulok sa nigan-gan nan Dios, ta say katutuꞌwan, mantumulok ako sa nigan-gan na ni Cristo. 22 No iti ako sa busel ran saray amboꞌ et nin magsen a pammemper ra, bilang akon konra, kai ko nin gawꞌen taw say main nin pagdwadwawan ra ta pigaw nin mapagsen ko a pammemper ra. Mangkibagayan koy sarban klasin tutawo ta pigaw nin main nin maitagad kon maisalba nan Dios.

23 Sarban sain, man-gawꞌen ko ta pigaw nin maiparateꞌ koya a Mabistan Patandaꞌ nin maipaꞌkaꞌ kona ni Cristo tan ta pigaw nin makakiramaꞌ ako sa bubindisyon a ibi na.

24 Bilang wadiꞌ sa lumbaꞌ nin malayo, siguradon tandaꞌ moyo a sarba ran kilumbaꞌ ket malayo sara, baleꞌ saya tamoꞌ a mangrisibi nin primyo. Ket kapada nin sain, siꞌtamon mammemper kona ni Cristo, gawꞌen tamoy sarban mababaꞌ tamo sa panunumbok tamo kona ta pigaw nin mabyan atamo liꞌ nin primyo. 25 Barang saya nin kilumbaꞌ nin malayo, disiplinawen nay lalaman nan diri sa sarban bagay banaꞌ sa apes nan mangrisibi nin primyo. Siin nin primyo na baleꞌ ket kai ya gapo nin magnayon. Baleꞌ siꞌtamo, say manꞌipamuspusan tamon risibyen ket say primyo nin magnayon anggan-angga. 26 Kanyaꞌ nin bilang wadiꞌ siꞌko, sa kabibyay kon iti kona ni Cristo, bilang akon si sayay mangkilumbaꞌ nin malayo nin diri-diritso sa peteng. Bilang ako et nin sayay buksingiro nin matudyoꞌ a pammikas tan amboꞌ tamoꞌ nin siri a magket. 27 Man-gawꞌen koy intiron mababaꞌ ko nin madisiplina a lalaman ko ta pigaw nin suhito koya, ta no kai, bangliꞌ a siꞌko nin nangyakay konran raruma nin mangrisibin primyo, ket kai nin maikanaꞌ a kabibyay ko nin makarisibi.