Sayay Pammau-pauꞌna Mangibwat konran Nuꞌnan Tutawo
10
Bubsat, adal-adalen moyo in pa a man-gawꞌen ko ta rabay kon ipapanemtem komoyo a nangyadiꞌ konran pupuon tamon Judio sin linmakwan saradtaw sa Egipto. Sarba ra, nidwaꞌdwaꞌ sara tan sirong rayaytaw si gunem nin itin pirmi sa temben ra. Sarba raynamaet, nalasat rayay mantawagen nin Muꞌdit nin Taaw.a 2 Siin nin nasariꞌ ran sarba, baraꞌmon binawtismwan saran sarba ta pigaw nin magꞌin saran tumutumbok na ni Moises. 3 Sarba ra, pari-parihon nangan nin kanen a nibi nan Dios,b 4 tan sarba ra ket ninom sa parihon ranom nin nangibwat konan Dios. Anaod, sitaw si batoc nin nami nin matkap ra ket si Cristo a kalamoꞌ raya tanan lawas adtiman a kinaꞌ ra. 5 Baleꞌ abirno nin wanin a ginwaꞌ nan Dios para konra, say kaꞌbawan konra ket kai nin nakapaririket konan Dios ta nagribildi sara kona. Anaod, pinati nasara ket nidadamuyak a bangkay radtaw sa lugar a kasan tawo.6 Sarban sain say nangyadiꞌ konra ket mausar nin pammatalad kontamo, ta pigaw nin kai tamo nin apesen a dukaꞌ 7 o mangrayo nin dios-dios bilang sa ginwaꞌ ran raruma konra. Mabasa tamo a ginwaꞌ ra a nangatang sara nin wana sa Masanton Kasuratan, “Tumekreꞌ saray tutawo nin mangan tan minom sara. Miꞌsa umdeng sara ta miririga saran maong.”d. 8 Andiꞌ atamo nin kiraray konran amboꞌ tamon asawa a bilang sa ginwaꞌ ran saray raruma konra, ket banaꞌ sa sain, sa luob nin sayay awro tamoꞌ ket rwampuloꞌ tan tulo nin ribo sara konra a nati.e 9 Andiꞌ tamo nin subuken no adti nin angga a pangingitpel nan Cristo a bilang sa ginwaꞌ ran saray raruma konra ket pinati-pati nasaran ulay.f 10 Wanin a lamang a andiꞌ kamo nin magriklamo sa no ani a nigagara nan Dios para kontamo nin bilang sa ginwaꞌ ran saray raruma konra, ket si anghil nin nibakiꞌ nan Dios, pinati-pati nasara.g
11 Sarban sain, nangyadiꞌ konra nin pagꞌadalan ran raruma. Naisurat in ta pigaw nin matandaan tamo a mangyadiꞌ konran tutawon mangwaꞌ nin sain say ginwaꞌ ra ta iti atamoyna sa panaon a dandani ana nin mangangga. 12 Kanyaꞌ nin si siꞌnuman a sa wana ket madaer yayna sa pammemper na, pakailag ya ta bangliꞌ no rumateꞌ a tukso kona ket masidaꞌ ya anamaet. 13 Say subok nin rumateꞌ-rateꞌ kontamo ket say talagan rumateꞌ-rateꞌ sa tutawo. Baleꞌ si Dios, mailalwan ya banaꞌ ta kai na nin iyaburoy a masubok atamon kai tamo nin maꞌwit. No rumateꞌ a tukso kontamo, gawꞌen nan lamang a maagwantawan tamo ta pigaw nin malasat tamo ket mapalꞌisan tamoy magkasalanan.
14 Edet, manꞌaduen kon bubsat, banaꞌ ta wanin na nin Dios, palꞌisan moyo a mangrayon dios-dios.
15 Siꞌkamo, manakem kamo, kanyaꞌ nin adalen moyon maong ti say iyalimbawaꞌ ko komoyo: 16 Sa pidudungo tamo, no kisalamatan tamoya a Dios konan sitaw si piiinuman tamo, kai para a mangkiramaꞌ atamo sa kaabigan nin dayaꞌ na ni Cristo nin tinmuroꞌ? No piraramaan tamo anamaet a siping-sipingen tamon tinapay, kai para a mangkiramaꞌ atamo sa lalaman na ni Cristo nin nibi na para kontamo? 17 Anaod, banaꞌ ta sayan-saya ya tamoꞌ nin tinapay a piraramaan tamo, manꞌipatarusan nin siin a siꞌtamo nin abaw nin tutawo ket naipasaya atamoyna sa sayan-sayay lalaman. 18 Kiten moyo saraynamaet a Israelita; no kipangan sara sa no ani a nidaꞌton konan Dios, manꞌipaꞌkit ra a mangkipasaya saran mampangrayo konan Dios.
19 Baleꞌ kai ko nin rabay nin ipaꞌkaꞌ moyo nin manꞌibaritaꞌ ko a si sayay dios-dios ket peteg ya, tan kai ko nin manꞌibaritaꞌ a say kanen a niyatang kona ket main nin magwaan. 20 Wanin man, say iyatang konran dios-dios ket amboꞌ nin konan Dios a pangidaꞌtunan no kai edet, konan dukaꞌ a ispirito nan dios-dios. Anaod, kai ko nin rabay a magkamain kamon kabiangan sa dukaꞌ a uispirito. 21 No kiinom kamo sa pammanemtem nin dayaꞌ na ni Uunuren a Jesus, paꞌno moyo kadiꞌ et nin magwaꞌ a kiinom anamaet sa niyatang sa dukaꞌ a ispirito? Wanin a lamang, no kipangan kamo nin tinapay nin mangipapanemtem kontamo sa lalaman nan si Uunuren a Jesus, paꞌno moyo kadiꞌ et nin magwaꞌ a kipangan sa niyatang sa dukaꞌ a ispirito? 22 Mansugsugen moya paran mangimon a Catawan sa man-gawꞌen moyo? Manꞌisipen moyo para nin wanin ana a pwirsa moyo ket kai nakamoyna nin madusa?
Say Pagdadangkaꞌ sa Pagꞌin Librin Gumwaꞌ nin Animan
23 “Pagkanawanawa tamo a gumwaꞌ nin animan a rabay tamo,” wanra. Abirno nin tutuo baleꞌ nin main pagkanawanawa tamo, amboꞌ nin say ngaꞌmin ket makatulong sa raruma. Amboꞌ nin sarban gawꞌen tamo ket makapamagsen nin pammemper ran kalalamoꞌ tamo. 24 Matkap nin amboꞌ tamoꞌ a kaabigan tamon bukod a isipen tamo no kai edet, say kaabigan ra et anamaet nin kapada tamon tawo.h
25 Mangnaꞌ kamo ana bungat nin animan a karnin sinaliw sa palingki nin andiꞌ moyo nin gulwen a kunsinsya moyon manepet et no say karni ket niyatang o kai. 26 Anaod, mabasa sa Masanton Kasuratan, “Si lutaꞌ tan say sarba nin iti kona, ikon na ngaꞌmin nin Dios.”i
27 Bilang wadiꞌ, main nin amboꞌ nin mammemper a managyat komo nin mangan sa bali na ket mako ka. Kanen mo a animan nin ipadungo na komo; andiꞌ moyna nin tepeten no sain ket niyatang sa dios-dios. 28 Baleꞌ no main nin sayay mangkidungo nin mamaritaꞌ a wana, “Niyatang ti sa dios-dios,” andiꞌ ka nin mangan para sa kaabigan nan si namaritaꞌ tan para sa katinekan nin kunsinsya na; 29 amboꞌ a katinekan nin kunsinsya mo, no kai say kunsinsya na.
Anaod, say pagkanawanawa ko ket kai kumon nin makabiangan nin kunsinsyan raruman tawo. 30 No nikisalamatan koyay Dios sa kanen ko, mayin ey a mabalaw ako sa pangangan ko? 31 Edet anaod, matkap a para sa pakaitaꞌgay nan Dios a pangwaꞌ moyo nin sarba ngaꞌmin, mataman nin say pangangan moyo o say pinnom moyo. 32 Andiꞌ kamo nin mangwaꞌ nin animan a pakaibarangan nin siꞌnuman, Judio ya man o amboꞌ, o tutawo nan Dios. 33 Say matkap nin gawꞌen moyo ket say kipada sa man-gawꞌen ko a say makapaabig sa raruman tawo a pirmi kon man-gawꞌen, ta amboꞌ a kaabigan ko a mantikapen ko, no kai say kaabigan ran sarban raruma, awaꞌ lamang a mamper sara kona ni Cristo ket maisalba sara.j