Say Pangingitandudoꞌ kona ni Febe
16
Manꞌitandaꞌ koya sawanin komoyo a busat tamo sa pammemper a si Febe a saya nin katulungan sa trabaho sa dupong ran mammemper itaw sa Cencrea. 2 Akuen moyadsen komoyo banaꞌ ta tawo naya ni Uunuren, ta wanin a manepeg nin gawꞌen ran tutawo nan Dios. Tulungan moya sa animan a pakatkapan na ta abaw saraynay tutawon tinulungan na, ket saya akoyna konra.Pammakumusta konran Tutawo
3 Pakumustawen moyo sara pa si Priscila tan si Aquila nin katrabahwan ko sa pagsisirbi ko konan Cristo a si Jesus. 4 Nisanlaꞌ ray byay ra banaꞌ kongko, kanyaꞌ nin alaki a utang kon maong a nakem konra. Wanin anamaet a sarban dudupong ran amboꞌ nin Judio a mammemper. 5 Pakumustawen moyo sara anamaet pa a mammemper nin mididinep isen sa bali ra ni Priscila tan Aquila.
Pakumustawen moya anamaet pa a mablin amigo kon si Epeneto. Syay sangkauꞌnawan nin nagmatalek kona ni Cristo itaw sa prubinsyan Asia.
6 Pakumustawen moya pa si Maria; nipakapaidap yan kusto nin tumulong komoyo.
7 Pakumustawen moyo sara pa a kadayaan kon Judio a sara si Andronico tan Junia, nin nakalamoꞌ ko sa priswan. Apostoles sara nin bantog tan nuꞌna saran nagmatalek kona ni Cristo dyan siꞌko.
8 Pakumustawen moya pa si Ampliato. Mabli ya anamaet kongko nin tawo na nin Uunuren.
9 Pakumustawen moya et pa si Urbano nin katrabahwan mi sa pagsisirbi mi kona ni Cristo, tan si mablin amigo kon si Estaquis.
10 Wanin anamaet kona ni Apeles nin napatutuꞌwan anan tutuon tawo na ni Cristo.
Pakumustawen moyo sara anamaet pa a pamilya na ni Aristobulo, 11 tan si kapada kon Judio a si Herodion, tan saray mammemper itaw sa bali na ni Narciso.
12 Pakumustawen moyo sara et pa si Trifena tan si Trifosa. Maseseg saran tawo nan Uunuren.
Pakumustawen moya pa si mablin amiga tamon si Persida nin abaw anay nagwaan na sa pagsisirbi na konan Uunuren.
13 Pakumustawen moya pa si Rufo a saya yan napiliꞌ nan tawo na anaod nin Uunuren, tan si ina na nin ina koyna sa kwinta.
14 Pakumustawen moyo sara anamaet pa si Asincrito, si Flegonte, Hermes, Patrobas, Hermas, tan saray bubsat sa pammemper nin kalalamoꞌ ra.
15 Pakumustawen moyo sara anamaet pa si Filologo, Julia, Nereo tan si busat nan babayi, tan si Olimpas tan saray tutawo nan Dios nin kalalamoꞌ ra.
16 Mipasamanwan kamon mikumustawan nin mangipaꞌkit nin pilalabyan moyo nin mibubsat sa pammemper kona ni Cristo.
Mampakumustawen kamo nin sarba nin dudupong ran tumper kona ni Cristo nin dinalan-dalanan ko.
Say Masusuyot a Dawat na ni Pablo
17 Bubsat, dawaten ko komoyo a pakatalad kamo konran sarain saray manidaꞌ nin uksoy moyo tan sidaen a pammemper ran tutawo banaꞌ sa akay ra nin swawiꞌ sa katutuꞌwan a niyakay anan gindat komoyo. Andiꞌ kamo gapo nin kilimug-limog konra 18 ta sarain nin tutawo ket amboꞌ nin si Uunuren tamon Cristo a mampagsirbyan ra, no kai edet, say karabayan ran bukod. Mabibistay irgo ra tan mamaꞌyu-paꞌyok sara ket manlingwen rasara tamoꞌ a tutawon amboꞌ nin mapangadal. 19 Anaod, pitanda-tandaꞌ ran mammemper sa nagsikabarang nin lugar a maipaꞌkaꞌ sa katutulok moyo kona ni Cristo, ket maririket akon tuloy maipaꞌkaꞌ komoyo. Wanin man, dawaten ko nin pakatalad kamo ta rabay kon magꞌin nin mautek kamo no maipaꞌkaꞌ sa pangwaꞌ nin kamaungan, baleꞌ kasan tandaꞌ moyo no maipaꞌkaꞌ sa pangwaꞌ nin kadukaan. 20 Ket no wanin moyo, si Dios a syay puon nin pitutuno, sa amboꞌ anan maꞌteng ket liso nayan ipatalo komoyo si Satanas.
Rumateꞌ kumon komoyo a bindisyon na ni Uunuren tamon Jesu-Cristo.
Say Pammakumusta ran Kalalamoꞌ na ni Pablo
21 Si Timoteo nin katrabahwan ko, pakumustawen nakamo; wanin ra anamaet ni Lucio, Jason tan Sosipatro nin kapada kon Judio.
22 Siꞌko anamaet nin si Tercio a tagasurat ni Pablo sa nibaritaꞌ na konan sitin surat na, mampakumustawen katamo bilang kapada moyon mammemper kona ni Cristo.
23-24 Si Gayo nin mampagtuluyan ko a siꞌkon si Pablo, a sa bali nay pididinepan ran mammemper iti, mampakumustawen nakamo.
Mampakumustawen nakamo et ni Erasto nin trisuriro nan syudad nin Corinto. Mampakumustawen nakamo et anamaet ni Cuarto nin busat tamo sa pammemper.a
Pangrarayo konan Dios a Sangkadunungan
25 Raywen tamoyay Dios!
Sya tamoꞌ a makapamaꞌget nin pammemper moyo mangibwat konan Mabistan Patandaꞌ
a manꞌipatandaꞌ ko maipaꞌkaꞌ kona ni Jesu-Cristo.
Sin gindat a panaon, baraꞌmon niyadi yaytin katutuꞌwan
baleꞌ sawanin, mayadiꞌ a pinasyan kaanrwan nin panaon a linmabas, 26 ket nipatandaan nayna in nin katutuꞌwan nin Dios.
Nipaisurat-surat na in konran prupita sin naꞌteng anan panaon tan sawanin
ket nigan-gan na anamaet a ipatandaan ti nin katutuꞌwan sa sarban tutawodti sa mundo
nin si Dios a kasan taranaꞌ tan kasan lamang nin anggawan,
ta pigaw nin say sarba ket tumulok kona banaꞌ sa pagmamatalek ra kona.
27 Si Dios, syan bukod a sangkadunungan sa sarba!
Marayo ya anggan-angga banaꞌ sa ginwaꞌ na yupaꞌ kona ni Jesu-Cristo.
Peteg a wanin!