Miaasikaswan a Barang Saya tan Saya
15
Ket, siꞌtamon napasaya a nakem tamo, antabayan tamo sarain saray main nin pagdudwadwa et. Amboꞌ tamoꞌ nin say makapaririket kontamo a asikaswen tamo 2 no kai edet, gawꞌen tamoy no ani a makapamaririket tan makapamaabig konran kapada tamon mammemper ta pigaw nin mapaꞌget a pammemper ra. 3 Wanin ta mismon si Cristo, kai na nin ginwaꞌ no ani tamoꞌ a makapaririket kona. Nangyadiꞌ a naipadles nin mabasa sa Masanton Kasuratan, “Say ibari-baritaꞌ ran dukaꞌ komo, O Dios, siꞌkoy dimpaan ngaꞌmin.”a 4 Nasambit ko in ta, say naisurat ana sin saytaw et sin nuꞌna sa Masanton Kasuratan ket maiyakay atamo ta pigaw nin magꞌin nin mapangitpel atamo nin dyaꞌdyaꞌ tan mapaksaw a nakem tamo. Ket ilalwan tamon tuloy a gawꞌen nan Dios a sarban nipangakoꞌ na. 5 Anaod, si Dios, syay mamin pangingitpel kontamo tan mamaksaw nin nakem tamo. Sapa kumon ta tulungan nakamon mitutuno sa saya tan saya, nin kapadan nipagkabyay nan Cristo a si Jesus. 6 Ket no wanin, magꞌin kamo nin sayan-saya nin mangrayo konan Dios a syay Ama na ni Uunuren tamon Jesu-Cristo.7 Kanyaꞌ edet anaod nin, kapada a siririket nakamon inakoꞌ ni Cristo, wanin a gawꞌen moyo sa saya tan saya komoyon mammemper ket, no wanin, mapagalangan yay Dios. 8 Anaod, ibaritaꞌ ko komoyo a si Cristo, nagꞌin yan sayay katulungan para konran Judio ta pigaw nin ipaꞌkit na konra a gawꞌen nan Dios a nibaritaꞌ nan gawꞌen na. Pinatutuꞌwan na a gindat anan nipangakoꞌ nan Dios konran pupuon ran Judio. 9 Nagꞌin ya anamaet a lamang nin katulungan ran amboꞌ nin Judio ta pigaw nin raywen rayay Dios banaꞌ sa ingangaꞌdo na konra. Sain a manꞌibaritaꞌ sa Masanton Kasuratan a wana,
“Sa busel ran amboꞌ nin Judio, kisalamatan kata, O Dios,
tan mangansyon akon pangrarayo komo.”b
10 Wana et sa Masanton Kasuratan a mabasa tamo,
“Siꞌkamon amboꞌ nin Judio, kiririket kamo konran Judio a piniliꞌ nan Dios nin tutawo na.”c
11 Mabasa et a lamang sa Masanton Kasuratan,
“Siꞌkamon amboꞌ nin Judio, raywen moyay Dios.
Sarba moyon tutawo, raywen moyan maong.”d
12 Nipadles na anamaet ni Isaias a wana,
“Main liꞌ nin puri na ni Jessee nin rumateꞌ tan
sya liꞌ a magꞌuray konran amboꞌ nin Judio.
Sya liꞌ a puon nin ilalo ra sa nipangakoꞌ na.”f
13 Kanyaꞌ edet nin, si Dios a puon nin ilalo tamo. Sapa kumon ta byan nakamon peteg nin ririket tan katinekan banaꞌ ta mampagmatalek kamo kona, ta pigaw nin mangibwat sa pakayadiꞌ nan Ispirito nan Dios ket laloynan umget a pangingilalo moyo.
Say Nipanurat konan sitin Surat ket Partin Nakaibakian na ni Pablo
14 Bubsat, peteg a ilalo ko komoyo. Tandaꞌ kon peteg a napnoꞌ kamon kamaungan konran raruma. Tandaꞌ ko et a lamang a masadag anay tandaꞌ moyo maipaꞌkaꞌ sa katutuꞌwan ket makapiakayan kamoynan saya tan saya. 15 Baleꞌ mataman nin wanin, konan sitin surat ko komoyo ket main nin tepel ko nin ipapanemtem koy umnoy bubagay. Nipatpel akon ipapanemtem in banaꞌ sa nakaibakian kon banaꞌ sa kamaungan nan Dios kongko, 16 nin pagsisirbi ko konan Cristo a si Jesus nin maipaꞌkaꞌ konran amboꞌ nin Judio. Nibakiꞌ nakon magsirbi sa masagradon gawaꞌ nin pangingipatandaꞌ konan Mabistan Patandaꞌ nin nangibwat konan Dios. Ket nipatpel ako maipaꞌkaꞌ komoyo ta pigaw nin yupaꞌ konan Ispirito nin ginwaꞌ nakamon kumanaꞌ konan Dios ket, mapagustwan ya sa pangidaꞌton ko komoyo kona. 17 Siin a trabaho ko, kanyaꞌ anaod nin manꞌipasirayo koya a Cristo a si Jesus maipaꞌkaꞌ sa ginwaꞌ nan Dios. 18 Anaod, say kal-la tamoꞌ nin ipasirayo ko ket say nagwaan na ni Cristo sa nipagwaꞌ kongko, si main anan amboꞌ nin Judio nin mantumulok kona ni Cristo. Inusar na a narngeꞌ ran nibaritaꞌ ko tan naꞌkit ran pagkabyay ko 19 tan say makapakaꞌngap nin nangyadiꞌ nin pammatutuo nin maipaꞌkaꞌ kongko a ginwaꞌ nan Ispirito nan Dios yupaꞌ sa pakayadiꞌ na. Sa sarba nin lulugar, mangibwat sa Jerusalem anggan sa Ilirico, nailaꞌpos koyaynan nipatandaꞌ a Mabistan Patandaꞌ nin maipaꞌkaꞌ kona ni Cristo. 20 Anaod, natukid ko a apes kon tuloy nin gawꞌen a si ipatandaꞌ koyay Mabistan Patandaꞌ sa lulugar a kai raya et gapo nin tandaꞌ si Cristo, ta pigaw nin kai akoyna nin mangipatandaꞌ sa nangipatandaan raynan raruma. 21 Ket, sain a gawꞌen ko, maitukoy sa sayti a mabasa sa Masanton Kasuratan,
“Saraytaw saray tutawon kai et nakarngeꞌ maipaꞌkaꞌ kona,
makatandaꞌ raya liꞌ a lamang,
tan saraytaw saray kai et napatandaan,
mataros ra liꞌ a lamang a maipaꞌkaꞌ kona.”g
Plano na ni Pablo nin Bisitawen yay Roma
22 Say paku-pako ko sa lulugar a saray tutawodtaw ket kai ra et nin narngeꞌ a maipaꞌkaꞌ kona ni Cristo a makabadaꞌ a kai ako pakapikaꞌ isen komoyo sa Roma. 23-24 Baleꞌ sawanin ta nayadiꞌ koynay gawaꞌ ko sa sain a lulugar, dumalan akodsen liꞌ komoyo no mako ako sa Espanya, banaꞌ ta naꞌteng anan rabay koy makapikaꞌ isen komoyo. Ket mayadiꞌ liꞌ a anted a panaon kodsen komoyo nin mamin ririket kongko, ilalwan kon matulungan rako liꞌ sa pangituloy koyna nin pako ko sa Espanya. 25 Baleꞌ sawanin, matkap a mako ako yapoꞌ sa Jerusalem ta main nin iyater kon tulong konran tutawo nan Dios itaw, 26 ta saray mammemper iti sa prubinsyan Macedonia tan Acaya, naisip ran mabista a byan rasaran tulong a mumaidap nin tutawo nan Dios itaw sa syudad nin Jerusalem.h 27 Nangibwat sa nakem ran bukod a ginwaꞌ ra in. Baleꞌ matkap nin tuloy a tulungan rasaray mumaidap itaw sa Jerusalem ta baraꞌmon siuutang sara konra. Wanin banaꞌ ta nangibwat konran Judio, mangkakiramaꞌ saray amboꞌ nin Judio sa bubindisyon sa byay nin naipasaya konan Dios. Ket anaod, manepeg tamoꞌ a tulungan rasaray Judio yupaꞌ sa bubindisyon a mausar sa inawru-awron byay a manꞌibi nan Dios konra. 28 Ket no nayadiꞌ koynayti liꞌ nin gawaꞌ ko tan naiparisibi koyna liꞌ a kwartan tulong konradtaw sa Jerusalem, mako akoyna liꞌ sa Espanya tan dumalan akodsen komoyo. 29 Ket, tandaꞌ ko nin sa kappako kodsen komoyo, mabindisyunan natamo liꞌ nin kusto ni Cristo.
30 Bubsat, sa kakanaan na ni Uunuren tamon Jesu-Cristo, tan sa pangangadoꞌ tamo sa sayan-saya nin mampangibwaten nan Ispirito nan Dios, mairot kon dawaten komoyo a tulungan rako nin masuet moyon kadadasal. 31 Idasal moyo pa a idipinsa nakon Dios nin kai rako mapaꞌno nin saray kai raya akuen si Cristo itaw sa Judea. Idasal moyo et a say tulong nin kwarta nin ikaꞌ kodtaw sa Jerusalem ket siririket ra kumon nin risibyen nin saray tutawo nan Dios itaw. 32 Idasal moyo a wanin, ta pigaw nin no karabayan nan Dios ket maririket akon makarateꞌ isen komoyo tan, sa pakakikalamoꞌ ko komoyo ket mainawnan atamo.
33 Sapa kumon ta si Dios a syay puon nin pitutuno ket isen ya komoyo ngaꞌmin.
Peteg a wanin kumon!