Matkap tamon Akuen a Saya tan Saya
14
Akuen moyo sara sa dupong moyo a kai ra et nin tuloy nin mapibarawes a bagay-bagay maipaꞌkaꞌ sa pammemper tan andiꞌ moyo sara nin diskusyunen sa manꞌipaꞌkaꞌ ran naiduma sa manꞌipaꞌkaꞌ moyo. 2 Bilang wadiꞌ, isen komoyo main nin sayan tepren na a say sarba ket magwaꞌ nin kanen. Ket main anamaet nin saya a kai ya mangnaꞌ nin karni ta sa wana ket maiyawaꞌ nin kanen. 3 Ket no wanin, siin si mamper a sarba ket magwaꞌ nin kanen, andiꞌ naya nin kai baga-bagawen in si kai nin mampangnaꞌ nin karni. Wanin anamaet, siin si sa wana ket maiyawaꞌ a mangnaꞌ nin karni andiꞌ na ibaritaꞌ a mampagkasalanan ya in si mampangnaꞌ nin karni ta inakoꞌ naya in anamaet nin Dios. 4 Anaod, kasa gapo nin kanepegan tamon mangibaritaꞌ a kusto o abas a man-gawꞌen nan katulong nan sayay tawo ta sya tamoꞌ nin amo na a main nin kanepegan nin mangibaritaꞌ nin wanin. Si Dios a Uunuren na, ket maakoꞌ naya nin Dios ta tulungan nayan mangwaꞌ nin say kusto.5 Main anamaet nin mammemper a main nin uawron ngilinen ra. Ket main sara et anamaet a para konra, pari-pariho ngaꞌmin a awro nin maikanaꞌ sa pagsisirbi konan Dios. Sa maipaꞌkaꞌ sa sayti, say saya tan saya ket matkap nin talagan disisyunan nayti sa lalaman nan diri. 6 Si saya ket main nin ngilinen nan uawro ta sa wana ket sain a manepeg sa pangingikit nan Dios, ket rabay nayan paririketen a Dios. Wanin anamaet, si mamper a sarba ket magwaꞌ nin kanen, igalang nayay Dios no mangan ya ta kisalamatan naya banaꞌ sa kanen na. Siin anamaet si kai nin mangnaꞌ nin karni, igalang naya anamaet a lamang a Dios no kai ya nin mangnaꞌ tan kisalamatan nayan lamang. 7 Anaod, kasa kontamon mammemper a mabyay nin kabukudan na tan kasa anamaet lamang a mati nin kabukudan na, 8 ta mabyay atamo ta pigaw nin paririketen yay Dios. Wanin anamaet a lamang no mati atamo. Kasaynan raruma no kai si Dios tamoꞌ a main ikon kontamo, mabyay o mati atamo man. 9 Si rason anaod a nati tan sinmubliꞌ yan mabyay si Cristo ket, ta pigaw nin syay magꞌadiꞌ sa sarba, saray mabyay et man o saray nati ana.
10 Siꞌka edet, kasa gapo nin kanepegan mon istrikto mosaran sintinsyawan a kapada mon mammemper maipaꞌkaꞌ sa riglaminto. Siꞌkan saya et anamaet, abas a balawen mosaray kapada mon mammemper a kai nin sumunor sa riglaminto. Marateꞌ liꞌ a awro a, sarba tamo ket, umadap konan Dios ket sya liꞌ a manintinsya sa barang saya tan saya kontamo 11 ta wanan Dios a mabasa sa Masanton Kasuratan,
“Siꞌkon mismo nin si Dios, edengan koy ibaritaꞌ ko a rumateꞌ liꞌ a awro a say sarban tawo,
manalimukod sa adapan ko tan alilbien rako nin Dios.”a
12 Ket anaod say barang saya kontamo umadap liꞌ konan Dios nin umbat sa sarban ginwa-ginwaꞌ tan inirgu-irgo na.
Andiꞌ ma nin Pagkasalananen a Kapada mon Mammemper
13 Edet, andiꞌ atamoyna nin mamakasalanan no kai edet, disisyunan tamon ilagen tamoy makagwaꞌ nin animan a pangibwatan ran magkasalanan nin kapada tamon mammemper. 14 Bilang wadiꞌ, banaꞌ ta naipasaya ako kona ni Uunuren tamon Jesus, tandaꞌ kon peteg a kasan maiyawaꞌ nin kanen sa pangingikit nan Dios.b Baleꞌ no konan sayay tawo ket maiyawaꞌ yayti wadiꞌ e nin kanen, magkasalanan ya no mangan yan siti. 15 No banaꞌ ta kanen mo ket si kapada mon mammemper ket mapaidap a nakem na, sain say man-gawꞌen mo mangipaꞌkit a kasan pangangadoꞌ mo kona. Nati ya si Cristo para anamaet a lamang kona kanyaꞌ nin andiꞌ mo sidaen a pakikalamoꞌ na konan Dios banaꞌ tamoꞌ sa pangangan mo! 16 Ket, sa tanay kasan mairgo ran makasidaꞌ, andiꞌ moyoyna nin gawꞌen abirno nin tandaꞌ moyon manepeg a man-gawꞌen moyo. 17 Wanin ta no maipaꞌkaꞌ sa say maalaga konan Dios sa pagꞌuuray na kontamo, amboꞌ nin no ani a manepeg o amboꞌ nin manepeg nin kanen o inumen, no kai edet, a mapteg a kabibyay tamo sa pangingikit nan Dios, a makapitutuno atamo tan a maririket atamo. Sarban sayti ket pangibwaten nan Ispirito nan Dios. 18 No wanin a kabibyay tamo sa panunumbok tamo kona ni Cristo, paririketen tamoyay Dios tan raywen ran kapada tamon tawo a pigagawaꞌ tamo.
19 Kanyaꞌ nin say ipamuspusan tamoynan gawꞌen ket saytaw say makapamitutuno kontamo tan say makapamaꞌget nin pammemper nin barang saya tan saya. 20 Andiꞌ tamo nin sidaen a nagwaan nan Dios banaꞌ tamoꞌ sa kanen. Tutuon say sarba ket magwaꞌ nin kanen, baleꞌ no say pangangan tamo ket pangibwatan nin pagkakasalanan ran raruma, say pangangan tamo, abas. 21 Mabista nin kai atamo mangan nin ipaꞌkaꞌ a maiyawaꞌ nin kanen, o kai atamo minom nin arak, o kai atamo mangwaꞌ nin animan a pangibwatan nin pagkakasalanan ran kapada tamon mammemper. 22 Animan a tepren moyo maipaꞌkaꞌ sa saytin bubagay, iti tana komoyo tan konan Dios; kai moyoyna nin matkap nin ipatandaan et konran raruma. Makarmaꞌ yay tawon sa angan-angan na ket manepeg yay ginwaꞌ na nin sayay bagay ket, kasa anamaet lamang nin puon mangibwat sa ginwaꞌ na a gulwen ya nin kunsinsya na. 23 Baleꞌ si siꞌnuman a mangan nin magdwadwa ya, masintinsyawan yan nagkasalanan ta ginwaꞌ na a mantepren na nin abas. Say katutuꞌwan, no kai atamo nin magmatalek a say man-gawꞌen tamo ket say makapaririket konan Dios, mampagkasalanan atamo.