13
Say barang saya komoyo ket matkap a paisirong konran saray iti sa uray ta kasan pakayadiꞌ ran mampagꞌuray nin sarain no kai nasara nin binyan nin Dios, tan sarain saray iti sa uray ket si Dios a lamang a nangikwadsen konra. 2 Ket saray manguntra konran mampagꞌuray, mangkuntrawen ra anamaet nin lamang a nitalaga nan Dios; ket banaꞌ sa pangunguntra ra, madusa sara. 3 Paisirong kamo anamaet konra ta andiꞌ rasara nin sukat nin ikaliꞌmo nin saray matunong a man-gawꞌen ra. Saray sukat nin maliꞌmo ket saray mampangwaꞌ nin abas. Ket ta pigaw nin kasan ikaliꞌmo moyo konran iti sa uray, say maabig a gawꞌen moyo ket mapagustwan sara et komoyo. 4 Anaod, nikwa nasaradsen nin Dios nin mamaga nin kaabigan moyo. Baleꞌ no mampangwaꞌ kamon abas, talagan manepeg a ikaliꞌmo moyo sara ta talagan main nin pakayadiꞌ ran manusa komoyo. Si Dios a nangikwa konra ta pigaw nin balꞌen nasaran dusawen a gumwaꞌ nin abas. 5 Ket, paisirong kamo konran iti sa uray, amboꞌ tamoꞌ nin banaꞌ ta maliꞌmo kamo nin mabaleꞌ nin madusa, no kai edet, banaꞌ et ta tandaꞌ moyon sain a manepeg moyon gawꞌen.6 Siin et anamaet a rason a mamayad atamon buis ta, sarain saray mampagꞌuray ket, mampagsirbyan rayay Dios leleg a mampagtrabaho sara sa sain nin nangwan nan Dios konra. 7 Kanyaꞌ nin ibi tamo konra a sarban nepegen ra, baraꞌmon say pammayad tamon buis tan raruma et nin singiren nan gubyirno, tan say pangingibilang tan pammagalang tamo konran tutawon gubyirno.
8 Matkap a kasayna gapon utang moyo et konan mataman nin siꞌnuman; bayadan moyo no ani a nitarusan. Si paꞌsar utang anamaet a lamang nin pirmi tamo nin kapilitan nin bayadan ket, si aduen tamo saray kapada tamon tawo, ta no gawꞌen tamo in, tinukid tamoynay Gugan-gan. 9 Bilang wadiꞌ saytin Gugan-gan: “Andiꞌ ka nin mamabayi o kilalaki; andiꞌ ka nin mangmati; andiꞌ ka nin manakaw; andiꞌ mo nin ibegan a ikon ran kapada mon tawo.”a Sain tan say raruma et nin gugan-gan ket matukid tamo ngaꞌmin no tukiden tamoyay gan-gan a wana, “Aduen moy kapada mon tawo nin kapada nin pangangadoꞌ mo sa lalaman mon diri.”b 10 Anaod, no inadoꞌ tamo saray kapada tamon tawo, kai atamo nin gumwaꞌ nin makadukaꞌ konra. Ket sa pangangadoꞌ tamo, natukid tamoynay intiron Gugan-gan.
Ipaꞌkit ma si Jesu-Cristo sa Kabibyay mo
11 Matkap a lalo moyoyna nin gawꞌen in ta tandaꞌ moyoyna a pipaꞌkaan nin say kapapaꞌsar sawanin. Mimata kamoyna tan isadyaꞌ moyoy byay moyo ta si tyimpo a si Dios ket isalba natamo, mas adani ana sawanin dyan sin tinmaranaꞌ atamon nagmatalek kona. 12 Say iyayangga nin panaon nin kadukaan ket iti ana nin bilang sayay dandani napalabas ana nin yabi ta paꞌsar parbangon ana. Ket gurutan tamoynay dukaꞌ a gugawaꞌ tamo tan magkabyay atamoyna nin lumaban nin para sa palaway.c 13 Sain a gawꞌen tamo ta sain a manepeg nin pigagawaꞌ ran tutawon mampagkabyay sa palaway. Andiꞌ atamo nin kibiang-biang sa kasan dugaꞌ a piririga, andiꞌ atamo nin mipabok. Galten tamoy nikasamaꞌ tan inaayep a gawaꞌ-gawaꞌ. Andiꞌ atamo nin miaaway tan miimbelan. 14 Say matkap ana edet, si Uunuren tamoynan Jesu-Cristo a maꞌkit nin mampagkabyay sa kabibyay tamo. Andiꞌ moyoyna gapo nin byan nin lugar a kadukaan nin rabay nin gawꞌen nin lalaman moyon diri.