Raywen tamoyay Dios Yupaꞌ sa Pangngisukoꞌ tamon Byay tamo kona
12
Sawanin edet, bubsat, wanti e a ayꞌay ko pa komoyo: Banaꞌ sa alakin ingangaꞌdo nan Dios kontamo, isukoꞌ moyoy kadiryan moyo kona nin tubaleꞌ kona. Daꞌton in kona nin paririketen yan pagkakabyay moyo nin para tamoꞌ kona tan say pamaringgas moyon byay moyo. Wanin a manepeg nin pagsisirbi moyo kona. 2 Andiꞌ kamo nin kikumpurmi sa padalan nin pagkakabyay sa sitin kapresan a panaon. Say gawꞌen moyoyna edet, aburuyan moyon birngen nan Dios a kukanakman moyo ket masilyan a pitatawo moyo. Sa wanin, maamingaw moyoyna liꞌ no ani a rabay nan Dios para komoyo. Sayti ket say matunong tan mabista, say makapaririket konan Dios, tan say kasan kakurangan nin pagkakabyay moyo sa pangingikit na.3 aAnaod, mangibwat sa nipuyaꞌ nan Dios kongkon ibabakiꞌ na, ibaritaꞌ koyti sa barang saya komoyo: Matkap nin andiꞌ nin ataꞌgay a pangingikit moyo sa lalaman moyon diri dyan say peteg nin kablyan moyo, no kai edet, timbangen nan kusto nin barang saya a lalaman nan diri nin sumekeꞌ sa lugaren na, dipindi sa puyaꞌ a nibi nan Dios kona sin nagmatalek ya. 4 Kapada nan lalaman a saya ya tamoꞌ baleꞌ abaw a parti na tan barang sayay parti ket sakalakoy kausaran, 5 siꞌtamo anamaet nin mampagmatalek kona ni Cristo, abirno nin abaw atamon saka-sakalakon tutawo, paꞌsar tamo a sayan-sayay lalaman banaꞌ sa nikaipasaya tamo kona ni Cristo. Say nikaikalamoꞌ tamo anamaet a lamang sa barang saya tan saya ket paꞌsar say nikaikalamoꞌ nin puparti nan lalaman sa saya tan saya.
6 Ket, mangibwat sa kamaungan nan Dios nibi nay lugaren tamo ket main ana a barang saya kontamo nin saka-sakalakon naiduman pakababaꞌ nin maisekeꞌ sa sain nin lugaren tamo. Bilang wadiꞌ anaod, si saya ket napuyaan yan pakababaꞌ nin mangipatandaꞌ nin say iti sa kanakman nan Dios, ket matkap kumon a sayti nin ipatandaan na ket maitukoy sa mantepren na a nibaritaꞌ nan Dios kona. 7 No say naipuyaꞌ kona ket say pakababaꞌ nin magsirbi konran raruman tawo, sain kumon a gawꞌen na. No say pakababaꞌ nin mangyakay nin katutuꞌwan a nipuyaꞌ kona, sain kumon a gawꞌen na. 8 No say pakababaꞌ nin mamagsen nin pammemper a nipuyaꞌ kona, sain kumon a gawꞌen na. No say pakababaꞌ nin mami a nipuyaꞌ kona, mami ya nin masibulot a pinanakem. No say pakababaꞌ nin mangipangulo a nipuyaꞌ kona, pakandaen nay pangingipangulo na. Ket no say pakababaꞌ nin tumulong konran makatkap nin tulong a nipuyaꞌ kona, gawꞌen nan siririket.
Say Matkap a Pigagawaꞌ sa Kapadan Tawo
9 Peteg kumon a pangangadoꞌ moyo tan amboꞌ tamoꞌ nin wadiꞌ-wadiꞌ:
Guraen moyoy kadukaan ket, tedꞌen moyoynay pangwaꞌ nin maabig. 10 Mikawaꞌnanan kamon pikawaꞌnanan nin mibubsat. Uꞌnawen moyon igalang a saya tan saya. 11 Andiꞌ kamo tumamlad no kai edet, pakaseseg kamo. Sirbyan moya nin masibulot a kanakman a Uunuren tamo. 12 Paririketen kamo nin pangingilalo moyon mabistay marateꞌ moyo liꞌ. Agwantawan moyoy dyaꞌdyaꞌ a rumateꞌ-rateꞌ komoyo. Andiꞌ moyo nin lingatan no kai edet, lawas kamon dumasal. 13 Itao moyoy main moyo konran kapada moyon tawo nan Dios nin mampagkurang tan siririket kamo kumon lawas nin mananꞌili. 14 Idasalan moyo saray mampamadyaꞌdyaꞌ komoyo nin bindisyunan nasaran Dios. Andiꞌ moyo idasal a dusawen nasara kumon nin Dios. 15 Kiririket kamo konran saray main nin puon nin rumiriket, tan kibereng kamo konran iti sa kaberengan. 16 Miaaluyon kumon a kukanakman moyo. Andiꞌ kamo nin mipataꞌgay no kai edet, kilimug-limog kamo konran saray main nin mampagkurangan komoyo.b Andiꞌ moyo nin ipaꞌkaꞌ a madunong kamoynan tuloy. 17 Andiꞌ moyo sara nin amanwen nin kadukaan a mangwaꞌ nin dukaꞌ komoyo. Ipamuspusan moyo a say gawꞌen moyo ket kusto sa angan-angan nin sarban tutawo. 18 Sa anggawan nin mababaꞌ moyo, ipamuspusan moyo a katuno moyo a sarban tawo no magwaꞌ.
19 Bubsat, andiꞌ kamo nin gumaleꞌ konran magkasalanan komoyo. IpaDios moyoynay panunusa konra banaꞌ sa sager na ta wanan Dios a mabasa sa Masanton Kasuratan,
“Iti kongko a kanepegan nin gumaleꞌ. Siꞌkoy manusa.”c
20 Say gawꞌen tamoyna edet ket sayti e nin wanan Masanton Kasuratan,
“No si kalaban moyo ket mabitil ya, pakanen moya. No milataꞌ ya, painumen moya.
Sa wantin gawꞌen moyo dumingꞌey yan maong sa dukaꞌ a ginwaꞌ na komoyo.”+\xo.
21 Matkap a andiꞌ kamo nin talwen nin say kadukaan no kai edet, talwen moyoy kadukaan yupaꞌ sa pangwaꞌ moyo nin say maabig.