Main et nin Judio a Tutawo nan Dios
11
Anamaet, magwaꞌ tamon ipaꞌkaꞌ a wanti e: Angangko si Dios, ginurutan nasaraynay Israelita banaꞌ sa sain.Amboꞌ gapo nin wanin! Siꞌkon diri, Israelita akoynaod. Puri nako ni Abraham tan puon koya anamaet a lamang si puri na a si Benjamin. 2 Si Dios, kai nasara nin ginurutan a tutawon nangibwat et sin taranaꞌ ket piniliꞌ nasaraynan magꞌin nin tutawo na. Siguradon tandaꞌ moyay isturya sa Masanton Kasuratan maipaꞌkaꞌ kona ni Elias sin nagriklamo ya konan Dios kuntra konran kapada nan Israelita. Wana konan Dios, 3 “Uunuren, pinati-pati rasaraynay prupita mo tan yimba-yimbaꞌ ray ualtar nin pangraywan komo. Kal-la siꞌko tanay natraꞌ nin mansumunor komo, ket rabay rako et nin patyen.”
4 Ket wanti ey niꞌbat nan Dios kona, “Kai, amboꞌ mo nin bukod ta main saray nipurok koyna nin pitunribon kapada mon puri na ni Israel a kai nin mampangrayo konan si dios-dios a si Baal.”a 5 Wanin anamaet a lamang konan sitin panaon. Banaꞌ sa kamaungan na, main nin umno kami et nin Judio nin nipurok na. 6 Banaꞌ ta nipurok nakami banaꞌ sa kamaungan na, amboꞌ gapo in nin banaꞌ sa gugawaꞌ mi. No say puon a ipurok nasaran Dios a tutawo ket say gugawaꞌ ra, kai ana maibaritaꞌ a nipurok nasara banaꞌ sa kamaungan na.
7 Maꞌkit edet sa sain a saray kaꞌbawan konran puri na ni Israel nin manꞌipamuspusan ray magꞌin nin mapteg sa pangingikit nan Dios, kai sara nagꞌin nin mapteg. Saray umno ra nin piniliꞌ nan Dios, saraytaw a nikwinta na nin mapteg. Saray kaꞌbawan baleꞌ tinmibꞌey anay kukanakman ra ket kai rayna nin matarusan a katutuꞌwan. 8 Mabasa in nin peteg sa Masanton Kasuratan. Wana,
“Si Dios, baraꞌmon pinakdar nay kukanakman ra.
Ket, anggan sawanin ket kai ra et nin maꞌkit a manꞌipaꞌkit na tan kai ra et nin mataros a manꞌibaritaꞌ na.”b
9 Wana anamaet a lamang ni Adiꞌ David sa nisurat na,
“Manglaꞌwan pa kumon konra in say bubagay a mampamin karigawan konra.
Magꞌin nin baraꞌmon papan in kumon konra,
tan magꞌin nin pinakakablit nin pakadusawan ra;
10 kumapoy kumon a mata ra ta pigaw nin kai ra nin mapipigaw in,
tan gumukot sara kumon anggan-angga banaꞌ sa sain say mambalatayen ra.”c.
11 Magwaꞌ tamon ipaꞌkaꞌ a wanti e: Banaꞌ ta saray kapada kon Judio ket kai raya nin naalilbiꞌ a syay Cristo, ket nanganggayti sa nikasidaꞌ raynan anggan-angga.
Amboꞌ gapo nin wanin! No kai edet, sin kai sara nin nagmatalek konan Dios, ginwaꞌ na a maisalba saray amboꞌ nin Judio ta pigaw nin sa wanin ket, umibeg saray puri na ni Israel ket rabayen rayna anamaet a magmatalek kona. 12 Sawanin, maꞌkit tamo a sin nagsiandiꞌ saran mangakoꞌ a Judio sa ginwaꞌ nan Dios tan naꞌmet ra a pammindisyon na konra, iningangaꞌdo nasara tan binindisyunan nasaran Dios a abaw nin raruman tutawo. Ket no wanin a ginwaꞌ nan Dios, ay ket mas laloyna liꞌ nin anina nin andaꞌ no masibulot saraynan mayi kona a Judio!
Andiꞌ moyo sara nin Balawen a Judio
13 Ket komoyo nin amboꞌ nin Judio, ibaritaꞌ koyti:
Nibakiꞌ nakon Dios nin apostol na komoyon amboꞌ nin Judio, ket mantedꞌen koytin trabaho nin nipagwaꞌ kongko 14 sa ilalo ko nin banaꞌ sa panunulong ko komoyo ket umibeg sara komoyoy kapada kon Judio. Ket yupaꞌ sa wanin, magmatalek sara anamaet ket maisalba nasaran Dios.
15 Anaod, no say nipamauryan na konran Judio ket nagꞌin nin nakakituno a abaw nin raruman tutawo konan Dios, anina liꞌ nin andaꞌ no akuen nasarayna a Judio nin Dios! Baraꞌmo liꞌ anaod nin pinasubliꞌ saran mabyay a nati!
16 Tandaꞌ tamo a no si nuꞌnan nagwaꞌ nin tinapay ket maikanaꞌ ya konan Dios, maikanaꞌ ya anamaet a lamang a masa a pangibwatan na. Anamaet, no si puon nan sayay kayon olibo ket naipurok yan para konan Dios, naipurok anamaet a lamang a susanga nan siin a kayo. Kipada sara sa sain a Judio a sara a susanga tan saray puon ra a puon nin olibo. 17 Sawanin baleꞌ, pinukan nan Dios a raruman sanga nan sitin kayo. Siꞌkamo anamaet nin amboꞌ nin Judio, baraꞌmo kamon sanga nin raruman kayon olibo a basta nin tinmuboꞌ. Kinalap kamo tan nisuꞌpek kamo sa gindat nin kamiꞌnan nin pinukan nin sanga, nin mangkibyay kamo konan nimula a kayo. Kapadan nisuꞌpek nin sanga nin mangkibyay mangibwat sa marigsa nin yamot, mangkiramaꞌ kamo sa abaw nin bindisyon a nipangakoꞌ nan Dios konran puon ran Judio. 18 Ket andiꞌ kamo anaod rumangas a wamoyo mas maong kamo dyan saray Judio nin baraꞌmon sangan pinukan. Panemtemen moyon sanga kamo tamoꞌ. Kai nin mangkibyay a yamot komoyo no kai edet, siꞌkamoy mangkibyay sa yamot.
19 Bangliꞌ no rumangas kamoyna a wamoyo “Ya, no kai kami nin mas mabli nin amboꞌ nin Judio dyan saray Judio nin baraꞌmon sangan napukan, mayin a nisili nakamin Dios sa lugar ra?”
20 Oꞌ, tutuon pageꞌ a nisili nakamo banaꞌ ta kai sara nin magmatalek kona. Siꞌkamo anamaet, nisili nakamon Dios konra banaꞌ tamoꞌ ta nagmatalek kamo kona. Edet, andiꞌ kamo nin rumangas no kai pakandaꞌ kamo sa magwaꞌ na nin gawꞌen ana bungat komoyo. 21 No si Dios ket kai nasara nin iningangaꞌdo a Judio nin sara a baraꞌmon peteg nin sanga nan kayo, lalo nakamoynan magwaꞌ nin kai nin ingangaꞌdwen no gawꞌen moyoy kapadan ginwaꞌ ran Judio.
22 Adalen moyo edet nin maong no paꞌno ya kamaong a Dios, tan no paꞌno yaynamaet nin mabayani nin manusa. Dinusa nasaray Judio a sinmubag kona, baleꞌ komoyo, mapaingangaꞌdo ya dapot no ituluy-tuloy moyoy magmatalek sa kamaungan na komoyo. Baleꞌ no kai, pukanen nakamo anamaet. 23 Sara anamaet a Judio nin baraꞌmon sangan pinukan, no sumubliꞌ saran magmatalek ana sa ginwaꞌ nan Dios para konra, akuen nasaran uman nin Dios a baraꞌmo saran sangan naisubliꞌ nin nigalet konan puon ta magwaꞌ nan gawꞌen in nin Dios. 24 Anaod, amboꞌ nin urdinaryo in a ginwaꞌ nan Dios komoyon amboꞌ nin Judio a baraꞌmon sangan kayon basta nin tinmuboꞌ nin kinalap miꞌsa nisuꞌpek konan nimulan manꞌalilaen. Edet, mas maibagay nin adayoꞌ nin isubliꞌ nasaran Dios sa gindat a lugar ra a Judio nin sara a baraꞌmon peteg a sanga nan kayon nimula.
25 Bubsat, rabay kon matandaan moyaytin katutuꞌwan a gindat nin kai manꞌipatandaan. Ipatandaan koyti komoyo ta pigaw nin kai magꞌin nin pinasyan kataꞌgayan anan pangingikit moyo sa lalaman moyon diri. Sain say katibꞌeyan nin ulo ran raruman puri na ni Israel nin kai magmatalek konan Dios, amboꞌ in nin pirmaninti. Miꞌteng tamoꞌ in anggan marateꞌ a awro a sarba ran amboꞌ nin Judio nin rinabay nan Dios nin magmatalek kona ket magmatalek sarayna kona. 26 No saytaw liꞌ, maisalba nasaraynay puri na ni Israel. Main nin mabasan wanan Dios sa Masanton Kasuratan maipaꞌkaꞌ sa sain. Wana,
“Si Mangingisalba, mangibwat ya konran tutawo sa Jerusalemd.
Galten na liꞌ a puon nin pakadusa ran saray puri na ni Israele.
27 Matukid ana in liꞌ nin nipangakoꞌ ko konra a pakasawen koynay kasalanan ra.”f
28 Banaꞌ anaod ta kai raya timper a Mabistan Patandaꞌ, nagꞌin saran kakuntra na nin Dios ket, komoyo nin amboꞌ nin Judio, naibi a pagkanawanawan maisalba kamo. Wanin man, banaꞌ ta saray piniliꞌ nan tutawo na, tan banaꞌ sa nipangakoꞌ na konran puon ra, mabli sara et a lamang konan Dios. 29 Anaod, kai na gapo nin babawien nin Dios no siꞌno saray sinagyat nayna tan say abaw a bindisyon a nipangakoꞌ nayna konra. 30 Siꞌkamon amboꞌ nin Judio, gindat a kinmuntra kamo konan Dios. Baleꞌ banaꞌ sa pangunguntra ran Judio kona, nipaꞌkit nan Dios a ingangaꞌdo na komoyo. 31 Wanin ra anamaet sawanin nin Judio komoyo sin saytaw a mangkumuntra sara konan Dios. Ket, yupaꞌ sa parihon padalan sa ginwaꞌ nan Dios komoyo, ingangaꞌdwen nasara liꞌ anamaet. 32 Sawanin si Dios, nipaꞌkit na a sarba ket sikakasalanan tan manepeg nin madusa ta pigaw nin magkamain nin padalan a maipaꞌkit nay ingangaꞌdo na sa sarban tutawo.
Marayo yay Dios
33 Wanin anay kamaungan nan Dios! Say kadunungan tan pakatandaꞌ na ket kai gapo nin matukod! Kasa gapo nin siꞌnuman a magwaꞌ nin manita sa paninintinsya na tan makapangipapalaway sa man-gawꞌen na!
34 Anaod, wanan mabasa sa Masanton Kasuratan,
“Siꞌnoy masrepan nay pangingisip nan Dios?
Siꞌno anamaet a makapangipapalaway no ani a mabista nin gawꞌen na?
35 Siꞌnoy nakautangan nan maong a nakem ta pigaw nin matkap a tubaleen naya?
Kasa gapo!”g
36 Syay namarsa nin bungat ana. Syan lamang anamaet a mampangalinya nin sarba, tan say sarba ket nigagaran pangibwatan nin rayo na. Itandudoꞌ ya kumon a ngaran nan Dios anggan-angga!
Peteg a wanin!