10
Bubsat, wanin anay pakarabay ko a saray kapada ko nin Judio ket maisalba sara kumon. Siin tanay pirmi nin manꞌidasal-dasal ko para konra. 2 Matistigusan ko nin alaki a pakarabay ra nin mapaririket rayay Dios, baleꞌ kai ra nin matarusan no paꞌno a pamaririket kona. 3 Anaod, kai ra nin rabay nin alilbien a no paꞌnoy pamagꞌin nan Dios a mapteg saray tutawo sa pangingikit na tan nangwaꞌ saran padalan ran bukod a say panunumbok ra sa Gugan-gan. Ket, kai rayayna nin mantumbuken a padalan nan Dios nin mamapteg konra. 4 Anaod, sa padalan nan Dios, si Cristo, tinukid nayna a tikapen nin Gugan-gan sa pagꞌin nin mapteg ta pigaw nin ikwinta nasaran mapteg nin Dios a sarba ra ngaꞌmin nin tawon magmatalek sa ginwaꞌ na ni Cristo.5 Nisurat na ni Moises sa Masanton Kasuratan a ta pigaw nin si sayay tawo ket magꞌin ya nin mapteg sigon sa tikapen nin Gugan-gan, matkap nan tukiden lawas a sarba ngaꞌmin nin ipagwaꞌ, ket, mabyay yan iti konan Dios.a 6 Baleꞌ nipaisurat nan lamang nin Dios kona nin pakatandaan a say pagꞌin nin mapteg nin maipatukdoꞌ sa pagmamatalek ket amboꞌ gapo nin maidap nin magaꞌmuran. Wana,
“Andiꞌ moyo nin ipaꞌkaꞌ a matkap a main nin muliꞌ sa langit,” ta pigaw nin keen naya kalapen a Cristo.
7 “Andiꞌ moyo anamaet a lamang nin ipaꞌkaꞌ a matkap a main nin mako sa priswan nin ubot sa rarem nin lutaꞌ,” ta pigaw nin pasublien nayan mabyay a Cristo.
8 Anaod, wanti e a mabasa tamo et sa Masanton Kasuratan,
“Maabot anay bubibilin nan Dios ta adani komoyo;
mapagꞌiirgwan moyo a maipaꞌkaꞌ sa sayti tan pipanemtem moyo anamaet.”b.
No ibari-baritaꞌ mo konran tutawo a si Jesus ket syay Uunuren mo, tan masibulot a nakem mo nin mamper a pinasubliꞌ nayan mabyay nin Dios, maisalba ka.
10 Anaod, sa kanakman na ket mamper yay sayay tawo ket maikwinta nan Dios a mapteg ya. Anamaet, sa pangingipatutuo na ket maꞌkit a naisalba yayna. 11 Wanin ta wanan Dios a mabasa sa Masanton Kasuratan, “Si siꞌnuman a magmatalek kona, kai ya gapo nin maima-ima.”c 12 Wana nin “si siꞌnuman,” ta kasan pinilian kona, Judio man o amboꞌ nin Judio. Pari-pariho a syay Uunuren nin sarba tamon mampagmatalek kona tan kasan dugaꞌ nan ibi a ingangaꞌdo na konran sarba ran tumawag kona 13 ta mabasa tamo sa Masanton Kasuratan, “Sarba ran manawat nin paisalba konan si Uunuren, ket maisalba nasara.”d
Kasaynan Badaꞌnan ran Judio ta Narngeꞌ rayayna a Mabistan Patandaꞌ
14 Wanin man, bangliꞌ no wamoyoyna a kai rayaynaod nin magwaꞌ nin kidawatan nin tulong a sayay kai ra nin mampagmatalkan. Kai sara anamaet nin magmatalek kona no kai ra nin narngeꞌ a maipaꞌkaꞌ kona. Kai ran lamang nin marngeꞌ a maipaꞌkaꞌ kona no kasan mangipatandaꞌ konra. 15 Anamaet, magwaꞌ tamoꞌ a si sayay tawo ket mako ya nin ipatandaan na konra no ibakiꞌ ya. Ket anaod, mabasa tamon wana sa Masanton Kasuratan, “Aninay andaꞌ no rumateꞌ saray mangipatandaꞌ nin mabistan patandaꞌ!”e
16 Narngeꞌ rayayna baleꞌ a mabistan patandaꞌ. Wanin man, daiteꞌ sara tamoꞌ a namper ta wanayna sin saytaw et ni Isaias konan Dios, “Uunuren, baraꞌmon kasan namper sa niparateꞌ mi konra!”f 17 Edet, si sayay tawo, magkamain ya tamoꞌ nin pagmamatalek kona ni Cristo no narngeꞌ nay katutuꞌwan maipaꞌkaꞌ kona tan marngeꞌ na tamoꞌ a maipaꞌkaꞌ kona ni Cristo no ipatandaan kona.
18 Wanin man, ipaꞌkaꞌ tamoyna a saray Judio, bangliꞌ no kai sara nin mampagmatalek ta kai ra et nin narngeꞌ. Impusibli in baleꞌ! Anaod, naitayak yayna a Mabistan Patandaꞌ a bilang sa mabasan nipaisurat nan Dios,
“Sa sarban lugar, narngeꞌ yaynay patandaꞌ ra
ta nipatandaꞌ ya sa sarban nasyon iti sa mundo.”g
19 Magwaꞌ tamo et anamaet nin ipaꞌkaꞌ a angangko saray Israelita ket kai ra nin natarusan a niyakay konra. Baleꞌ matarusan rayna kumon. Maꞌkit nin wanin ta primiro, nipau-pauꞌna nayna nin Dios sa nipaisurat na kona ni Moises,
“Paimbelen katamo liꞌ yupaꞌ sa
pangingingaꞌdo ko konran tutawon wamoyo ket nipwira sara.
Pasagren katamo liꞌ banaꞌ ta
tandaꞌ rakon saray ignuranti.”h
20 Ikarwa, diritsawan na et nin nibaritaꞌ in nin Dios sa nipaisurat na kona ni Isaias maipaꞌkaꞌ konran amboꞌ nin Judio a wana,
“Nadumog rakon saray kai nin mampaningkap kongko,
tan abirno nin kai rako nin tiningkap, nikitandaꞌ ako konra.”i
21 Wana anamaet a lamang nin Dios maipaꞌkaꞌ konran saray puri na ni Israel,
“Niꞌnu-niꞌno koyna nin nisagyat a sumubliꞌ sara kongko baleꞌ kai sara gapo nin mangimbabaet ta pinasyan tuloy nin kabengedan tan kasupladwan ra.”j