Main et nin Biang na ni Pablo konran Judio
9
Sayti say ibaritaꞌ ko komoyo ket tutuo. Kai ako gapo nin mampibulaꞌ-bulaꞌ ta naipasaya ako kona ni Cristo tan mapatutuꞌwan nan Ispirito nan Dios a malinis a kunsinsya ko nin ibaritaꞌ a 2 pinasyan tuloy nin bereng ko. Kai gapo nin matambar a idap nin nakem ko 3 banaꞌ konran kadayaan kon diri a saray Judio ta ginurutan rayay Cristo. No magwaꞌ tamoꞌ kumon, sa tana a mamper sara kona ni Cristo, siꞌkoynay dusawen nan Dios tan maisyay ako kona ni Cristo. 4 Puri nasara ni Israel tan abaw a naibin pakaidumawan ra. Piniliꞌ nasaran Dios tan nikwinta nasaran aꞌnak na; nipadar na a kataꞌgayan na konra; nikitara-tarato ya konra a bindisyunan nasara; sara a namyan nan Gugan-gan na; niyakay na konra no paꞌno a manepeg nin pagsisirbi kona; tan abaw et a bubagay a nipangakoꞌ na konra. 5 Saray puon ra et ket tutawo saran magsen a pagmamatalek ra nin nipatandaan nan Dios konra a pangakoꞌ na konran tutawo na, tan si syay Cristo, no maipaꞌkaꞌ sa kinatawo na ket Judio ya nin kadayaan ra. Syay Dios a makapangyayadiꞌ sa sarba. Sya, marayo ya anggan-angga.Peteg a wanin!
Tukiden na et nin Dios a Nipangakoꞌ na
6 Naibaritaꞌ koyna a saray Judio, ginurutan rayay Cristo baleꞌ kai nin rabay nin irgwen a banaꞌ ta wanin ket kai nayna nin tinukid a nipangakoꞌ nan Dios. Say rabay ko nin irgwen, main saray Judio nin amboꞌ nasaran tutuon tutawo nin Dios mataman no puri nasara ni Israel. 7 Mataman nin saray puri ran aꞌnak na ni Abraham, amboꞌ nin sarba ra ket nikwintan puri nan peteg. No kai edet, bilang konan si nipangakoꞌ nan Dios kona ni Abraham sin saytaw, “Mangibwat sara tamoꞌ konan anak mo a si Isaac a ikwinta kon puri mo.”a 8 Iyakay nin sain kontamo a kai na nikwinta nin Dios a aꞌnak nasara a sarba ran aꞌnak na ni Abraham no kai sara tamoꞌ a puri nan si nipangakoꞌ nan Dios a ikwinta nan manawir. 9 Anaod, nipangakoꞌ nan Dios kona ni Abraham, “Mapalabas a sayay taon mangibwat sawanin, sumubliꞌ akodti liꞌ tan si asawa mon si Sara ket, nanganak yayna nin sayay lalaki.”b.
10 Ket amboꞌ tamoꞌ nin wanin. Kipada anamaet sa sain a nangyadiꞌ sa nipanganak na ni Rebecca nin singin a sara si Jacob tan si Esau. Sayan-saya a ama ra a si puon min si Isaac. 11-12 Anaod, baꞌyo sara et nin naiyanak a singin tan kasa et gapo nin nagwaꞌ ran matunong o nin abas man ket wanayna nin Dios kona ni Rebecca, “Si ari, pagsirbyan naya liꞌ nin kaka.”c Ginwaꞌ na in nin Dios ta pigaw nin ipaꞌkit na nin maong a say nigagara nan gawꞌen nin mabista ket, nangibwat sa karabayan na, amboꞌ nin banaꞌ sa matunong a gawaꞌ ran tawo, no kai edet, nangibwat sa pananagyat nan diri. 13 Wanin anaod a wana nin Dios a mabasa sa Masanton Kasuratan, “Kawaꞌnan koya si Jacob, baleꞌ si Esau, pauryan koya.”d.
Peteg nin Mapteg a Gawaꞌ nan Dios
14 Edet, mamirupa ya para anaod a Dios?
Amboꞌ na gapo nin wanin! 15 Main nin kanepegan nan mangingaꞌdo ta wanaynan gindat nin Dios kona ni Moises, “Iti ana kongko no siꞌnoy kaꞌdwan ko tan no siꞌnoy tulungan ko.”e 16 Matandaan tamo edet mangibwat konan siin a si Dios, kaꞌdwan nasaray tutawo amboꞌ nin banaꞌ ta rabay ra o manꞌipamuspusan ra nin magaꞌmuran a pangingingaꞌdo na, no kai edet, banaꞌ ta mapaingangaꞌdo ya. 17 Wanin a lamang anamaet no kai naya nin kaꞌdwan a sayay tawo, ta mabasa sa Masanton Kasuratan a wana nin Dios kona nin Adiꞌ sa Egipto sin saytaw, “Nipapadar katan adiꞌ ta pigaw nin sa pananalo ko komo ket maipaꞌkit a pakayadiꞌ ko, ket matandaan sa intiron mundo no siꞌno ako.”f 18 Matandaan tamo edet a si Dios kaꞌdwan nasaray rabay nan kaꞌdwan, tan patibꞌeyen nay ulo ran saray rabay nan patibꞌeyen.
19 Sawanin, banaꞌ ta wanin, bangliꞌ a wamoyoynan ibaritaꞌ, “Wanin na anamain nin Dios, ambaleꞌ ey nin seselen nasara et a tutawo banaꞌ sa kasalanan ra? Kai ra anaod nin mapaed a nigagara nan mangyadiꞌ!”
20 Baleꞌ iꞌbat ko konan siin a pinarsa naka tamoꞌ nin Dios, siꞌno ka nin mangibaritaꞌ nin wanin kona? Bilang wadiꞌ si sayay kuden, magwaꞌ paran seselen nayay nangwaꞌ kona a wana, “Ambaleꞌ a ginwaꞌ nakon wanti?”g 21 Si mangangwaꞌ nin kuden, iti kona no ani a rabay nan gawꞌen sa sakagemgem nin lutaꞌ. Magwaꞌ a mangwaꞌ yan rwa ray kuden a si saya ket pinasyan andaꞌ na, baleꞌ si saya anamaet ket urdinaryo ya tamoꞌ.
22 Wanin anamaet konan Dios. Main nin kanepegan nan gawꞌen a rabay na. Ket mataman no rabay nayna nin ipaꞌkit a alakin sager na tan say pakayadiꞌ na, nitpel na et a lamang a sager na konran tutawo nin manepeg nayna kumon nin dusawen tan sidaen. 23 Ginwaꞌ na in nin Dios ta pigaw nin maipaꞌkit nay pinasyan andaꞌ nin pigagawaꞌ na konran saray tutawon ingangaꞌdwen na, saray tutawon binyan nan kanepegan ana nin gindat sin nuꞌna et nin makarateꞌ sa pinasyan andaꞌ nin kapapaꞌsar na. 24 Siꞌtamoynaod in saray tutawo nin piniliꞌ tan nisadyaꞌ na. Amboꞌ tamoꞌ nin siꞌkami nin Judio, pati siꞌkamo anamaet et a lamang nin amboꞌ nin Judio. 25 Siin a wana nin Dios itaw sa libron nipaisurat na kona ni Oseas. Wana,
“Saray amboꞌ nin gindat nin tutawo ko,
ikwinta kosaraynan tawo ko.
Saray gindat a amboꞌ ko nin kawaꞌnan,
saraynay ibaritaꞌ kon kawaꞌnan ko.”h
26 Wana et nin Dios,
“Itaw sa siin nin lugar a nibaritaꞌ ko intaw konran tutawodtaw a amboꞌ kosaran tutawo,
naalilbiꞌ ana a aꞌnak kosara, siꞌko nin si sibibyay a Dios.”i
27 Maipaꞌkaꞌ anamaet konran Israelita, wanan naꞌteng ana ni Prupita Isaias, “Abir nin baraꞌmo sara kaꞌbaw nin buyangin sa baybay a puri na ni Israel, daiteꞌ sara tamoꞌ liꞌ a maisalba sa panunusa na nin Dios, 28 ta talaga nin, si Dios ket daliꞌ-dalien nayna liꞌ nin yadien a paninintinsya na konran tutawo.”j. 29 Nipadles nan lamang ni Prupita Isaias a wana,
“No si Uunuren nin Mampagꞌuray sa Sarba,
ket kai natamo nin kinaꞌdwan nin nibatiꞌ a siꞌtamon umno tamoꞌ,
impos natamo kumon nin
bilang sa nangyadiꞌ konran tutawo sa Sodoma tan sa Gomorra.”k
Nipatukdoꞌ a Kinamapteg sa Pagmamatalek
30 Edet, ani a naadal tamoyna mangibwat sa sain? Wanti e: Saray amboꞌ nin Judio, kai ra nin nipamuspusan a magꞌin saran mapteg sa pangingikit nan Dios, baleꞌ nikwinta nasaran mapteg nin Dios banaꞌ sa nipagmatalek ra sa man-gawꞌen na para konra. 31 Sara anamaet baleꞌ a puri na ni Israel a nipamuspusan ray magꞌin nin mapteg sa pangingikit nan Dios yupaꞌ sa panunumbok ran Gugan-gan, amboꞌ sara et nin mapteg sa pangingikit na. 32 Ambaleꞌ? Banaꞌ ta say padalan ra ket say mabistan gugawaꞌ ra imbis a magmatalek sara sa gawꞌen nan Dios. Sa kaaandiꞌ ran akuen yay sya a makapamapteg kumon konra a sya si Cristo, baraꞌmo sara nin tutawon nipadugpaꞌ nin nisakin konan si bato. 33 Wanin a wanan Dios nin mabasa sa Masanton Kasuratan. Wana,
“Rengꞌen mo. Isen sa Sionl, mangikwa ako nin sayay baraꞌmon bato nin pisakinan raya.
Ket, maipadugpaꞌ sara ta inuryan raya.
Baleꞌ si siꞌnuman nin magmatalek kona,
kai ya gapo nin maima-ima.”m