Magkabyay atamo Para konan Dios sa Tulong nan Ispirito na
8
Edet, banaꞌ ta naipasaya atamoyna sawanin konan Cristo a si Jesus, kai natamoyna gapo nin dusawen nin Dios. 2 Wanin ta sa pagꞌuuray na kontamo nin Ispirito nan Dios a mami nin byay yupaꞌ sa nikaipasaya tamo konan Cristo a si Jesus ket, ginlat natamoyna sa pagꞌuuray nin kasalanan nin puon nin pakadusa tamo nin maisyay konan Dios. 3 Anaod, si Dios, ginwaꞌ na para kontamoytaw say kai nin magwaꞌ nin panunumbok tamon Gugan-gan ta sikakasalanan atamo lawas a tutawo. Say ginwaꞌ na, nibakiꞌ nayadti a anak na ta pigaw nin ipaariglo na a kasalanan nin awit tamo. Ket, nagꞌin yan tawo si Cristo nin bilang kontamon siꞌtamon nanguntra konan Dios tan yupaꞌ sa nipagsakripisyo na nin nirangep nay dusa tamo sa lalaman na, nagwaꞌ nan sinintinsyawan nin Dios a kasalanan nin makasawan anan pakayadiꞌ nin magꞌuray kontamo. 4 Ginwaꞌ nayti nin Dios ta pigaw nin say kinamapteg a mantikapen nin Gugan-gan, ket maꞌkit kontamo a amboꞌ anay karabayan tamon diri a mantumbuken tamo sa byay tamo no kai edet, say manꞌipaingar nan Ispirito nan Dios kontamo.5 Saray tutawon say karabayan ra tamoꞌ nin diri a mantumbuken ra, say karabayan ra tamoꞌ anamaet nin diri a pipanemtem ra. Baleꞌ saray tutawon say manꞌiyakay nan Ispirito nan Dios a mantumbuken ra say kal-la iti sa nakem ra tana ket, say wanan Ispirito nan Dios. 6 Ket no si sayay tawo say pipanemtem na tana ket say karabayan nan diri, maisyay ya konan Dios tan madusa yan patiti, baleꞌ no si sayay tawo, say kal-la nin iti sa nakem na ket say mangwaꞌ nin wanan Ispirito nan Dios, mabyan yan byay a iti konan Dios tan makaingar yan katinekan nin mangibwat konan Dios. 7 Oꞌ ta si sayay tawo nin say karabayan na tamoꞌ nin diri a pipanemtem na, mapala-palaway a kuntra ya konan Dios ta kai na nin mantumbuken a nigan-gan nan Dios tan talagan kai na anamaet nin matumbok. 8 Ket saray mampagkabyay nin wanin, kai ya mapagustwan a Dios konra.
9 Siꞌtamo baleꞌ, amboꞌ anay karabayan tamo a mampagꞌuray sa byay tamo no kai edet, si Ispirito nan Dios ta iti yan mampiikap kontamo. Baleꞌ no konan sayay tawo ket kasa yay Ispirito nan Dios nin ibakiꞌ na ni Cristo, amboꞌ nayan tawo ni Cristo. 10 Baleꞌ no si Cristo iti ya kontamo, abirno nin say lalaman tamo ket mati anaod banaꞌ sa kasalanan, mabyay atamon lamang nin iti konan Dios banaꞌ ta si Dios nikwinta natamoynan kai nagkasalanan. 11 Saya et, ta mampisyon yayna kontamo a Ispirito nan Dios nin yupaꞌ kona ket, si Dios pinasubliꞌ nayan mabyay si Jesus a syay Cristo, pasublien naya liꞌ anamaet nin mabyay ti si lalaman tamo nin mati yupaꞌ kona.
12 Ket, maꞌkit moyo, bubsat, a kaukulan a tumbuken tamoyay Ispirito na, amboꞌ anay uapes nin lalaman tamon diri. 13 No say tumbuken moyo ket say uapes nin lalaman moyon diri, say piratꞌanan moyo ket say madusan patiti. Baleꞌ no, sa tulong nan Ispirito nan Dios ket, man-gurutan moyoynay dukaꞌ a pigagawaꞌ moyo, magkamain kamon byay a iti konan Dios. 14 Anaod, no si tawo ket manꞌidalan nayan Ispirito nan Dios, sitin tawo, anak nayan Dios. 15 Maꞌkit tamo nin wanin ta si Ispirito na nin nibi nan Dios komoyo ket kai nakamo nin ginwaꞌ nin baraꞌmon aripen anamanaet nin awit a liꞌmo, no kai edet, ginwaꞌ nakamon aꞌnak nan Dios. Ket sa gawaꞌ nan Ispirito na magwaꞌ tamoyan tawagen nin “Tatay!” a Dios. 16 Si Ispirito nan Dios nin diri a mangipaingar kontamo a aꞌnak natamon Dios 17 ket banaꞌ ta aꞌnak natamon Dios, tumawir atamo anamaet. Risibyen tamo liꞌ a bubagay nin ibi nan Ama tamo, si Dios, ta kitawir atamo kona ni Jesu-Cristo sa ibi na liꞌ nin Dios. Kiranod atamo anaod kona ni Cristo nin mangirangep nin dyaꞌdyaꞌa ta pigaw nin kiramaꞌ atamo anamaet liꞌ sa kataꞌgayan nan tuloy ni Cristo.
Mantagaꞌnan tamoy Pakailaꞌpos nin Pakaisalba tamo
18 Ikwinta ko a say dyaꞌdyaꞌ a manꞌirangep tamo konan sitin byay ket kasa gapo nin kwinta no ikumpara tamo sa pinasyan andaꞌ liꞌ nin kapapaꞌsar a ipadar nan Dios kontamo. 19 Mataman nin say intiron pinarsa nan Dios, masulit nin mantagaꞌnan a tyimpo a si Dios ket ipadar nasaraynay aꞌnak na. 20 Anaod, nisintinsya nan Dios a nagꞌin nin amboꞌ nin manepeg a nakaikanaan nin intiron pinarsa na. Baleꞌ, amboꞌ nin wanin a gagara nin nikaparsa sin ginwaꞌ na in. Main et nin pangingilalo 21 sa gagara na a gawꞌen na liꞌ a pinarsa na nin kasan pakasidaꞌ tan makakiramaꞌ sa pinasyan andaꞌ liꞌ nin kapapaꞌsar a ibi nan Dios konran aꞌnak na. 22 Maꞌkit tamo a say sarban pinarsa nan Dios, mampangitpel anggan sawanin nin mantumaꞌgan konan siin nin awro nin bilang sa sayay mampangingar nin mangabing. 23 Wanin anamaet a lamang kontamo nin nangaꞌmor ana konan si muꞌnan nigagara nan ibi nin Dios a syay si Ispirito na. Mampangitpel atamon mantumaꞌgan sa pangngilaꞌpos nan pagꞌin tamon aꞌnak na liꞌ no pabaꞌyuwen na anayti say lalaman tamo nin magꞌin nin kasaynan pakasidaꞌ. 24 Siin a mantagaꞌnan tamoynan mangyadiꞌ nangibwat et sin naisalba natamon Dios. Syimpri a, kai nayna tagaꞌnan nin sayay tawo a sayay nangyadiꞌ ana ta rinmateꞌ ana. 25 Baleꞌ banaꞌ ta mantagaꞌnan tamo et in say kai et nin nangyadiꞌ, mangitpel atamon tumaꞌgan nin sisusulit sa sain.
26 Bilang sa tulong nin sain nin pangingilalo tamo, si Ispirito nan Dios, no mampangirangep atamo, ket tulungan natamo anamaet no makapoy atamoyna. Bilang wadiꞌ, kai tamo nin tandaꞌ a dumasal nin manepeg ket, syan diri a kidawat konan Dios para kontamo nin maiparateꞌ na pa et mataman nin say kai tamo nin maibalikas. 27 Anamaet, si Dios a sya ket masrepan nan usisaen a kanakman, matarusan na a kaisipan nan Ispirito ta naipatukdoꞌ sa karabayan nan Dios a dawaten nan Ispirito para kontamon tutawo na.
28 Anamaet, tandaꞌ tamo a say sarba nin mangyadiꞌ, gawꞌen nan Dios a say bunga ket sa kaabigan tamo nin mampangawaꞌnan kona. Para in sa kaabigan tamo nin nasagyat na nin Dios nin naipatukdoꞌ sa niplano nayna 29 ta nangibwat et sin taranaꞌ, tandaꞌ naynan Dios no siꞌno saray ikon na ket nigagara nasaraynan magꞌin nin bilang konan Anak nan si Jesus ta pigaw nin kaka raya si Jesus nin abaw saran mibubsat. 30 Ket saraytin lamang nin nigagara nan magꞌin nin bilang konan Anak na, sinagyat nasara et. Sarayti et ket nikwinta nasaran mapteg. Sarayti et ket nikiramaꞌ nasara sa kataꞌgayan nan Anak nan diri.
Ayon yay Dios kontamo
31 Edet, ani a rabay nin ibaritaꞌ nin sain a ginwaꞌ nan Dios? Si Dios, ayon yaynaod kontamo ket, kasa gapo nin makadaeg kontamo! 32 Si Anak na nin diri, ket kai naya gapo nin nisiblet no kai edet, nibi nayan mati nin nangalap nin lugar tamo. Ket kapada anaod nin sain, masibulot a nakem nan ibi et a sarban matkap tamo ta pigaw nin magkabyay atamo para kona! 33 Siꞌnoy makapamaritaꞌ a siꞌtamo nin piniliꞌ nan Dios ket sikakasalanan atamo? Kasa! Si Dios anan mismo a nangikwinta kontamo nin mapteg! 34 Siꞌno et a makapamaritaꞌ a matkap atamon madusa? Kasa! Pinati ya anaod a Cristo a si Jesus nin dusa nin kasalanan tamo! Amboꞌ in tamoꞌ ta pinasubliꞌ yan lamang nin mabyay tan sawanin ket, iti ya sa lugar na nin Dios nin pagalangan naya tan sya ket, mangkiirgo ya konan Dios para kontamo! 35 Kasa anaod gapo nin makapangisyay kontamo sa pangangadoꞌ na ni Cristo! Kai magwaꞌ nin abirno nin kaidapan man, o pakaaburido man, o pakarumiꞌ man, o bitil man, o kakurangan man nin seket, o piligro man, o pakapati man. 36 Say pamai-paidap kontamo nin wanin ket mabasa tamo sa Masanton Kasuratan a wana:
“Banaꞌ ta tutawo rakami, pirmi mi tanan adapen a mapati. Manꞌikwinta rakami tamoꞌ nin raruma nin tutawo nin bilang ayep nin patyen.”b
37 Abirno baleꞌ nin wanin a kapapaꞌsar tamo, kai in nin makadaeg kontamo no kai edet, malasat tamo in lawas ngaꞌmin banaꞌ kona ni Cristo a mampangadoꞌ kontamo. 38 Wanin ta tandaꞌ kon peteg a kasa gapo nin makapangisyay nin pangangadoꞌ nan Dios kontamo; mati o mabyay atamo man, kawaꞌnan natamo lawas. Ni saray uanghil o say uispirito nin mampagꞌuray sa langit, o saray main nin kapangyadian nin makapaliꞌmo, kai ratamo nin maisyay; tan mataman et nin say kapresan nin mampangyadiꞌ o say mangyadiꞌ et; 39 ni pwirsa sa taꞌgay o mataman et sa sirong nin lutaꞌ, o ani man et sa sarbayna ngaꞌmin nin pinarsa, kai ratamo gapo nin maisyay sa pangangadoꞌ nan Dios kontamo nin nipaꞌkit na ni Uunuren tamon si Jesus a syay Cristo.