Say Kabiangan nin Gugan-gan kontamo
7
Bubsat, tandaꞌ moyoy maipaꞌkaꞌ sa Gugan-gan kanyaꞌ nin sigurado ako a matarusan moyoy ibaritaꞌ ko komoyo maipaꞌkaꞌ sa layi, a si sayay tawo, say ubligasyon nan manukid sa layi ket mintras tamoꞌ nin mabyay ya. 2 Alimbawaꞌ a paꞌsar nan sayay babayin main nin asawa: Nitaker ya nin layi konan asawa na legꞌan nin mabyay yay asawa na. Baleꞌ udas a nati yay asawa na, kasaynan kabiangan nan layi kona maipaꞌkaꞌ kona nin asawa na. 3 Kanyaꞌ nin, no mintras nin mabyay ya et a asawa na ket, nikikalamoꞌ ya sa raruman lalaki, maibaritaꞌ a nikilalaki ya. Baleꞌ no nati yaynay asawa na, tinumgen anay pakibiang nin siin nin layi kona. Ket no nikikasal yan uman sa sayay lalaki, kai nin maibaritaꞌ a nikilalaki ya.4 Bubsat, wanin anamaet komoyo tan say Gugan-gan a naibi kona ni Moises. Kai kamoyna nin kabiangan nin saytin Gugan-gan ta, yupaꞌ sa nikairanod moyo kona ni Cristo, pinagꞌin kamoynan nati no maipaꞌkaꞌ sa sayti ta pigaw nin maipasaya kamo kona nin sya ket pinasubliꞌ ya nin mabyay ket, gumwaꞌ atamon say makapaririket konan Dios. 5 Sin say karabayan tamon bukod bilang nin tawo a mantumbuken tamo, say pakatandaꞌ tamo sa iyawaꞌ ket pinukaw ana edet a dukaꞌ a uapes tamo ket sain nin uapes tamo ana a rabay-rabay tamon gawꞌen. Ket sa nipangwaꞌ tamo, madusan patiti a piratꞌanan tamo. 6 Baleꞌ sawanin ket baraꞌmo atamoynan nati sa pakayadiꞌ nin Gugan-gan. Ket, ginlat natamoynan Dios sa kabiangan nin sain kontamo. Ket sawanin mantumbuken tamoynay karabayan nan Dios nin amboꞌ sa gindat nin panunumbok tamon Gugan-gan a naisurat, no kai, main nin baꞌyon dalan nin panunumbok tamon karabayan na sa tulong nan Ispirito na.
Amboꞌ a Gugan-gan a Puon nin Kasalanan
7 Sawanin, bangliꞌ nin manꞌipaꞌkaꞌ moyoyna a say Gugan-gan ana edet a puon nin kasalanan.
Amboꞌ gapo nin wanin! No kai edet say Gugan-gan, ipaꞌkit kontamo a kasubagan tamo. Alimbawaꞌ, si gan-gan a wana, “Andiꞌ mo nin ibegan nin maikon a ikon ran raruma,”a no kasa ya in nin gan-gan kai ko kumon nin natandaan a mansumubag ako yupaꞌ sa kaiibeg konran raruma. 8 Ket sin niyawaꞌ nan gan-gan a umibeg sa ikon ran raruma, laloynan napukaw a pangangapes kon magkasalanan, ket manꞌibegan koy abaw a bubagay. Anaod, no kasan gan-gan a mangiyawaꞌ, kai kumon nin mapukaw a pangangapes kon magkasalanan. 9 Gindat, sin kai ko et nin nataros a rabay ibaritaꞌ nin Gugan-gan, kuntinto ako sa byay ko, a say wangko ket kusto ngaꞌmin a man-gawꞌen ko. Baleꞌ sin nataros koy manꞌibaritaꞌ nin Gugan-gan, napukaw a pangangapes kon magkasalanan, 10 ket natandaan ko a say paꞌsar ko ket nati sa pangingikit nan Dios. Sayti a lamang nin Gugan-gan, nigagara nin ipatyoꞌ kumon a tutawo sa dalan nin magkamain nin byay a iti konan Dios,b baleꞌ sayti ana edet a nagꞌin nin puon no ambaleꞌ a madusa akon mati. 11 Baraꞌmo akon tinaktika nin say pangangapes kon magkasalanan ta say wangko ket limpyo anay byay ko banaꞌ ta mantumbuken koy Gugan-gan, baleꞌ kai ko anamain nin matumbok ket say piratꞌanan nin pangangapes ko, say madusan patiti. 12 Ket anaod, nipataoy nan Dios a Gugan-gan. Kasa gapo nin kakurangan nin sain tan say sarba nin ipagwaꞌ, no kai edet, ipaꞌkit no ani a maong tan mapteg.
Say Pakilaban sa Kasalanan nin iti kontamo
13 Edet, ibaritaꞌ tamoyna para a si sayay mabista, a siti ket say Gugan-gan, ket puon kon madusan patiti?
Amboꞌ gapo nin wanin! No kai edet, say puon ket say pangangapes kon magkasalanan a nikasintinsyawan ko nin madusan patiti yupaꞌ sa sain nin mabistan Gugan-gan. Nasintinsyawan ako nin patiti ta pigaw nin maipapalaway no ani anaod a kasalanan tan maꞌkit tamo a makaparmay nin tuloy a kasalanan.
14 Tandaꞌ tamo nin mabista anaod a Gugan-gan ta nangibwat ti konan Dios. Siꞌko baleꞌ, tawo ako tamoꞌ. Baraꞌmo ako sawanin nin sayay aripen a nilakoꞌ nin gindat ket iti sa sakop nin kasalanan. 15 Anaod, makaꞌngap ako sa man-gawꞌe-gawꞌen ko. No miꞌsa, say rabay kon gawꞌen ket kai ko maituloy nin gawꞌen, tan no ani a guraꞌ kon gawꞌen ket saytaw a man-gawꞌen ko. 16 Banaꞌ ta wangko a kai ko kumon nin gawꞌen a man-gawꞌen ko, manꞌalilbien ko a kusto a Gugan-gan. 17 No wanin edet, amboꞌ ana nin mampangibwat sa kanakman ko in say kadukaan no kai, sa kasalanan a awit nin pagꞌin kon tawo. 18 Anaod, natandaan ko nin kasan maong a magwaꞌ ko no say kinatawo ko a pagꞌirgwan ta abirno nin gagarawen koy mangwaꞌ nin maong kai ko maituloy nin gawꞌen. 19 Say maong nin rabay ko nin gawꞌen ket amboꞌ taw a man-gawꞌen ko no kai edet, say dukaꞌ nin guraꞌ ko, saytaw ana edet a man-gawꞌen ko. 20 Ket banaꞌ ta wanin a say dukaꞌ nin guraꞌ ko a man-gawꞌen ko, amboꞌ ana edet nin say lalaman kon diri a mampangwaꞌ no kai, say kasalanan nin awit nin pagꞌin kon tawo.
21 Ket wanti anaod ey mampangyadiꞌ kongko: abirno nin rabay koy mangwaꞌ nin say maong, kai ko nin magwaꞌ no kai say dukaꞌ ana edet a magꞌuray kongko. 22 Sa kanakman ko rabay kon talagan tumbuken a Gugan-gan nan Dios, 23 baleꞌ nadiskubri ko nin amboꞌ in say Gugan-gan a mampagꞌuray kongko ta main nin mangkumuntra sa panunumbok kon sain. Ket baraꞌmo akon aripen nin say pangangapes kon magkasalanan ta say kadukaan nin awit nin pagꞌin kon tawo a mantumbuken ko. 24 Undoꞌ anay kapapaꞌsar ko! Siꞌno kadiꞌ a makapanglat kongko sa pakaaripen nan sitin sikakasalanan a kadiryan ko nin umangga sa pakadusan patiti nin anggan-angga?
25 Si Dios anaod a makapanglat kongko sa sain a kapapaꞌsar ko banaꞌ sa ginwaꞌ na ni Uunuren tamon Jesu-Cristo!
Ket kisalamatan koyan alaki!
Wanti ko e: Sa kanakman ko, rabay kon gawꞌen a karabayan nan Dios, baleꞌ banaꞌ sa kapapaꞌsar ko nin sikakasalanan, say kasalanan a magwaꞌ ko.