Mabyay atamoyna Yupaꞌ sa Kamaungan nan Dios
6
Ket sawanin, bangliꞌ a ipaꞌkaꞌ moyo nin manꞌibaritaꞌ kon ituloy tamoy gumwaꞌ nin dukaꞌ ta no pirdunawen nay kasalanan, mas maipaꞌkit na man layi nin Dios a kamaungan na.2 Andiꞌ gapo nin wanin a gawꞌen tamo! No maipaꞌkaꞌ sa pagkakasalanan, nati atamoyna; kai atamoyna gapo nin magwaꞌ nin magkabyay nin mampagkasalanan et! 3 Tandaꞌ moyoynaod a manꞌipaꞌkit nin say nikabawtismo tamon sarba a naipasaya atamoyna konan Cristo a si Jesus. Ket sa nikaipasaya tamo kona, nikiranod atamon nati kona sin nati ya. 4 Ket sin pinabawtismo atamo, naikitabon atamo anamaet kona ta nikiranod atamo sa patiti na ta pigaw nin kiranod atamo et sa nisubliꞌ na nin mabyay ni Cristo yupaꞌ sa nipangipadar nan pakayadiꞌ nan Dios a Ama tamo. Ket, siꞌtamo, mauman a kabibyay tamo nin bilang anamaet sa byay na. 5 Wanin ta, banaꞌ ta naipasaya atamo kona, nikiranod atamo sa patiti na; ket anaod, wanin anamaet a nairanod atamo sa nisubliꞌ na nin mabyay.
6 Sa gindat a pitatawo tamo pirmi atamo tanan nangwaꞌ nin kasalanan. Baleꞌ tandaꞌ tamo a sin nipasak ya sa kudos si Jesu-Cristo, sain a gindat a pitatawo tamo ket baraꞌmon anamaet nin naikipasak kona sa kudos, ta pigaw nin kai tamoyna nin sunuren a apes nin gumwaꞌ nin kasalanan ket kai ana nin magꞌuray a kasalanan sa byay tamo. 7 Anaod, si sayay nati ana, kasa yayna sa pakayadiꞌ nin mamagwaꞌ kona nin magkasalanan. 8 Ket banaꞌ ta nikiranod atamon nati kona ni Cristo, tumper atamo a kiramaꞌ atamo anamaet sa byay na. 9 Sayti a tandaꞌ tamo maipaꞌkaꞌ sa byay na:
Pinasubliꞌ ya nin mabyay si Cristo, ket kai yayna liꞌ gapo nin mati ta kai yayna nin maketegan nin patiti.
10 Wanin ta nati ya nin niꞌsa tamoꞌ nin sinidaꞌ nayna nin anggan-angga a pakayadiꞌ nin kasalanan, ket sawanin mabyay ya ta pigaw nin mami yan kagalangan konan Dios. 11 Wanin anamaet kumon komoyo. Ibilang moyo kumon a kadiryan moyo nin nati ana no maipaꞌkaꞌ sa pakayadiꞌ nin kasalanan sa byay moyo, tan mabyay kamoynan mami nin kagalangan konan Dios sa nikaipasaya moyo konan Cristo a si Jesus.
12 Edet andiꞌ moyo nin aburuyan nin pagꞌurayan nin kasalanan a lalaman moyon diri ket andiꞌ moyoyna nin sunuren a dukaꞌ a karabayan nin lalaman moyo nin mati a lamang. 13 Andiꞌ moyoyna nin agamirenen a animan nin parti nin lalaman moyo sa pangngawaꞌ nin dukaꞌ, no kai edet, isukoꞌ moyoy intiron byay moyo konan Dios. Nati a paꞌsar moyo nin gindat konan Dios, baleꞌ binyan nakamon byay a iti kona. Kanyaꞌ nin manepeg tamoꞌ a ibi moyoy intiro nin kadiryan moyo konan Dios nin usaren na sa kabistawan. 14 Anaod kai kamoyna nin mapagꞌurayan nin kasalanan ta amboꞌ anay panunumbok moyo sa Gugan-gan a puon nin pakaisalba moyo no kai edet, say kamaungan na nin Dios komoyo.
Matkap nin Pagꞌurayan natamo nin Dios ta Nisalba natamo
15 Ket sawanin, bangliꞌ nin manꞌipaꞌkaꞌ moyoyna a banaꞌ ta kasa nin gan-gan a matkap tamon tumbuken ta pigaw nin maisalba atamo, ket magwaꞌ tamo tana nin subagen a Gugan-gan ta say makauray man layi kontamo ket say kamaungan nan Dios.
Andiꞌ gapo nin wanin a gawꞌen tamo! 16 Isipen moyo anaod a pipaꞌkaan nan siin. No isukoꞌ tamoy lalaman tamon diri konan sayay tawo nin syaynay magꞌuray sa byay tamo, magꞌin nin aripen natamoynan siin a tawo. Ket wanin a diri sa kasalanan. No aburuyan tamo in nin magꞌuray sa byay tamo, magꞌin nin aripen atamon kasalanan tan say piratꞌanan tamo ket si maisyay anggan-angga konan Dios nin madusa atamo. Baleꞌ no si Dios a aburuyan tamon magꞌuray sa byay tamo, say piratꞌanan tamo ket si mapteg atamo sa pangingikit nan Dios.
17 Pageꞌ a gindat ket aripen kamon dukaꞌ a gugawaꞌ moyo, baleꞌ kisalamatan koyay Dios ta sawanin ket mansunuren moyo nin intiron kukapusuan moyo a kukatutuꞌwan nin nangipasirungan na komoyo nin Dios. 18 Ginlat nakamon Dios sa pakaaripen moyo sa kasalanan tan sawanin ket nagꞌin kamon aripen nin mampangwaꞌ tanan mapteg. 19 Nangusar ako nin urdinaryon bubagay, bilang sa aripen tan amo, ta pigaw nin mataros moyon madaliꞌ a manꞌibaritaꞌ ko komoyo ta amboꞌ et nin kusto a nakem moyo no maipaꞌkaꞌ sa pammemper moyo. Pageꞌ a gindat ket kaririktan moyon inagamir a lalaman moyo sa pangwaꞌ nin sarbaynan bakas nin kadukaan a baraꞌmon aripen nakamo ket nagꞌin abaw a sinubag moyon mapteg. Wanin anamaet anaod sawanin, matkap nin kaririktan moyon agamirenen a lalaman moyo nin mangwaꞌ nin mapteg a bilang nin aripen nakamon Dios ket sa wanin mampagꞌin kamon maikanaꞌ konan Dios.
20 Sin say kasalanan et a mampagꞌuray sa byay moyo, kai kamo inubligan gawꞌen no ani a mapteg. 21 Ket, ani a nagꞌin nin kaabigan moyo sa dukaꞌ a gugawaꞌ moyo sin saytaw a no mapanemtem moyo sawanin ket dumingꞌey kamo tamoꞌ? Kasa, no kai patiti tan pakadusa sa impyirno! 22 Baleꞌ sawanin, ginlat nakamoynan Dios sa pakaaripen nin kasalanan tan nagꞌin kamoynan aripen na. Ket main anan kaabigan moyo ta man-gawꞌen nakamoynan maikanaꞌ nin Dios para konan diri tan say piratꞌanan moyo, say anggan-angga nin byay a iti konan Dios. 23 Wanin ta say upaꞌ nin paaripen sa kasalanan ket say patiti tan pakaisyay konan Dios; baleꞌ say ibi nan Dios mangibwat sa masibulot a nakem na ket say anggan-angga nin byay a iti kona yupaꞌ kona ni Uunuren tamon si Jesus a syay Cristo.