Say Kaabigan nin Napapteg ana
5
Ket sawanin ta nikwinta natamoynan mapteg nin Dios banaꞌ ta nagmatalek atamo sa nipangakoꞌ na, nakakituno atamoyna kona yupaꞌ sa ginwaꞌ na ni Uunuren tamon Jesu-Cristo. 2 Sya, nikadani natamo konan Dios ket mangkagaꞌmuran tamoynay kamaungan na tan maririket atamo ta sigurado atamo nin kiramaꞌ atamo liꞌ sa rayo tan kataꞌgayan nan Dios. 3 Ket amboꞌ tamoꞌ nin siin a pakaririketan tamo no kai, maririket atamo anamaet ta mampangirangep atamon dyaꞌdyaꞌ. Wanin ta tandaꞌ tamo nin sa pangirangep tamo ket maadal tamoy mangitpel. 4 Ket no nasubok naynan Dios a mapangitpel atamo, mapagustwan yay Dios kontamo tan banaꞌ ta napagustwan yay Dios kontamo, main nin matagaꞌnan tamo mangibwat kona. 5 Sa sain a pananaꞌgan tamo, kai atamo gapo nin maima-ima ta linipos natamoynan pangangadoꞌ na nin Dios sin nibakiꞌ naya kontamo a Ispirito na nin mampagtrabaho kontamo.6 Oꞌ ta wanti a pangangadoꞌ na. Gindat kasan magwaꞌ tamo ta pigaw nin kiamigo atamo konan Dios. Baleꞌ sa panaon nin piniliꞌ nan Dios, si Cristo, imbis nin siꞌtamo nin sikakasalanan, ket sya a pinati. 7 Sangkabistawan no paalagawan tamoyti ta matalag a main nin tawon makaitpel nin akuen nan syay mati imbis a si sayay matunong a tawo. Wanin man, magwaꞌ a main nin magbuluntaryo nin akuen nan syay mati imbis a si sayay maong a tawo. 8 Baleꞌ si Dios, wanti na nin nipaꞌkit no paꞌnoy pangangadoꞌ na kontamo: Sin mangkuntrawen tamoya et, imbis nin siꞌtamo a patyen, pinati yay Cristo.
9 Ket sawanin ta napapteg atamoyna banaꞌ sa nipamaturoꞌ nan dayaꞌ na ni Cristo, mas laloyna edet nin yupaꞌ kona ni Cristo ket maipalꞌis atamo sa sager nan Dios. 10 Wanin ta, no sin mangkuntrawen tamoya a Dios ket naiyariglo atamo kona nin say nikapati nan Anak na, ket sawanin, ta amigo natamoyna, mas laloyna edet nin maipalꞌis atamo liꞌ sa panunusa na nin Dios banaꞌ ta mangkabyay ya a Anak na. 11 Nailamoꞌ et sa sain, ipasirayo tamoyay Dios banaꞌ sa kamaungan na kontamo nin nipaꞌkit na yupaꞌ sa gawaꞌ na ni Uunuren tamon Jesu-Cristo tan banaꞌ kona ket, nagꞌin atamoynan uamigo nan Dios.
Say Bungan Gawaꞌ ra ni Adan tan ni Cristo
12 Anaod, si uꞌnan tawo a si Adan, nagkasalanan ya ket nakasrep a kasalanan iti sa sangkamundwan. Banaꞌ sa sain a nipagkasalanan na, nagꞌin nin naisyay ya konan Dios. Ket anaod, mati a sarban tawo ta nagkasalanan anamaet a sarba. 13 Anaod, baꞌyo et nin naibi a Gugan-gan kona ni Moises, gindat saraynan mampagkasalanan a tutawo. Baleꞌ, banaꞌ ta kasa et nin Gugan-gan, kasa anamaet nin puon nin panintinsyawan konra banaꞌ sa sayti nin Gugan-gan. 14 Wanin man, nangibwat ana sin sinubag naya ni Adan a Dios angga sin naibi a Gugan-gan kona ni Moises, sarba ran tawo, nati. Wanin mataman no say kasalanan ra ket amboꞌ nin pariho sa kasalanan na ni Adan a sinubag nayay sayay gan-gan nan Dios.
Si Adan, niritrato naya a Cristo a syay mantagaꞌnan ra sin saytaw ta say bunga nin gawaꞌ ra ket nakaapikta sa sarban tawo. 15 Baleꞌ kai saran talaga nin mipada. Oꞌ, ta say bunga nin nipanubag na ni Adan ket amboꞌ nin pariho sa bunga nin nipangabswilto nan Dios kontamo nin nangibwat sa masibulot a nakem na. Mataman nin banaꞌ anaod sa nipagkasalanan nan saya a si Adan, ket say sarban tawo, matkap nin mati, mas et a kuri para konra anamaet nin sarban tawo a kamaungan nan Dios tan say pakaabswilto a mangibwat sa kamaungan nan si saya a si Jesu-Cristo. 16 Saytin bunga, naiduma anamaet nin adayoꞌ sa bunga nin nagwaꞌ nan kasalanan ni Adan. Anaod, banaꞌ sa nipagkasalanan nan niꞌsa ni Adan, sarban tawo, nasintinsyawan nin nagkasalanan tan manepeg nin madusa. Baleꞌ banaꞌ sa ginwaꞌ nan Dios nin masibulot a nakem na, nagkamain nin padalan a maikwinta natamon kai nin nagkasalanan abirno nin nagkasalanan atamo nin niꞌno. 17 Oꞌ anaod, mati a sarban tawo banaꞌ sa kasalanan nan sayay tawo a si Adan. Wanin man, say bunga nin ginwaꞌ nan sayay tawo a si Jesu-Cristo ket mas et a kuri. Wanin, ta saray siꞌnuman a mampangaꞌmor sa sain nin pinasyan kaalakyan a kamaungan nan Dios tan sa nipamapteg na nin masibulot, ket mabyay saran nanalo banaꞌ kona ni Jesu-Cristo.
18 Ket anaod, maꞌkit tamo a banaꞌ sa niꞌsan nipagkasalanan na ni Adan, sinintinsyawan nan Dios nin madusa a sarba; baleꞌ banaꞌ anamaet sa sayay manepeg a gawaꞌ a ginwaꞌ na ni Uunuren tamon Jesu-Cristo, magwaꞌ nan ikwinta nin Dios a say sarba ket kai nin nagkasalanan ta pigaw nin mabyan nasaran byay a iti kona. 19 Anaod, banaꞌ ta sinubag nayan sayay tawo a Dios, sarban tawo nagꞌin nin makasalanan. Baleꞌ banaꞌ anamaet ta tinmulok yay sayay tawo a si Jesu-Cristo konan Dios, manꞌikwinta naynan Dios a mapteg a abaw nin tawo.
20 Ket no maipaꞌkaꞌ anamaet sa Gugan-gan, nibi nayti nin Dios ta pigaw nin no subagen tamo ket maipaꞌkit a kaꞌbawan anan kukasalanan tamo. Baleꞌ abirno nin paꞌno man kaꞌbaw a kukasalanan tamo, mas alaki nin adayoꞌ a kamaungan nan Dios kontamo. 21 Wanin ta pigaw nin abirno nin mampangipalalako sa tutawo a pagkakasalanan ra kanyaꞌ nin mati saran naisyay konan Dios, mampangipalalako nin lamang a kamaungan nan Dios kontamo nin maikwinta natamoyna nin kai nin nagkasalanan tan byan natamon anggan-angga nin byay a iti kona banaꞌ sa ginwaꞌ na ni Uunuren tamon Jesu-Cristo.