Say Pangarigan sa Nipamapteg kona ni Abraham
4
Panemtemen tamo a nipamapteg kona ni Abraham,a si puon tamo nin Judio. 2 No napapteg ya banaꞌ sa maong a gugawaꞌ na, puon in kumon a nirayo ya si Abraham. Baleꞌ sa katutuꞌwan, kai ya gapo nin makapirayo konan Dios si Abraham 3 ta wanaytin mabasa sa Masanton Kasuratan, “Nagmatalek ya si Abraham konan Dios, ket nikwinta nayan mapteg nin Dios.”b4 Tandaꞌ tamo a si sayay tawo ket upaan ya banaꞌ sa trabahon gawꞌen na ta kanepegan na in. Say bayad nin risibyen na, kai nin maikwinta nin sayay rigalo kona. 5 Ket anamaet, siꞌno ya a tawo nin ikwinta nan mapteg nin Dios? Amboꞌ yay si magtrabaho para sa pakapapteg na, no kai edet, si sayay magmatalek kona nin Dios a sya a makapamakasa nin kasalanan ran saray sikakasalanan. 6 Sain a rabay nan irgwen ni Adiꞌ David sin nipatandaan nay maipaꞌkaꞌ sa pagꞌin nan makarmaꞌ nin sayay tawo nin nikwinta nan mapteg nin Dios nin amboꞌ banaꞌ sa pangwaꞌ nan matunong. Wanti ey wana ni Adiꞌ David nin nisurat na:
7 “Makarmaꞌ yay tawo nin say nipanubag na ket, napirdunayna
tan liningwanan nayna nin Dios.
8 Pageꞌ a makarmaꞌ yay tawo nin say kasalanan na ket kai nayna nin isingir nin Dios kona.”c.
9 Anaod, sain a pagꞌin nin makarmaꞌ a wana ni Adiꞌ David ket para tamoꞌ kasi konran saray naturiꞌ a saray Judio, o kai? Kai ta para anamaet a lamang konran amboꞌ nin Judio mataman no kai sara nin naturiꞌ. Panemtemen moyo a wana nin mabasa sa Masanton Kasuratan. Say rason anaod no ambaleꞌ a nikwinta nayaynan mapteg nin Dios si Abraham ket banaꞌ ta nagmatalek ya si Abraham kona. 10 Panemtemen moyo no kaꞌno nin nangyadiꞌ ti. Amboꞌ ya et nin turiꞌ sin nikwinta nayan wanin nin Dios!d 11 Nipaturiꞌ ya tana si Abraham sin masusuyot nin pakaꞌkitan tan pammatutuo a nikwinta nayaynan mapteg nin Dios baꞌyo ya et nin naturiꞌ banaꞌ ta nagmatalek ya kona. Ket si Abraham, nagꞌin yan baraꞌmon ama ran saray sarba ran mangarig kona, ket banaꞌ sa pagmamatalek ra, ikwinta nasaran mapteg nin Dios abirno nin amboꞌ saran turiꞌ o Judio. 12 Nagꞌin ya anamaet nin baraꞌmon ama ran saray Judio nin amboꞌ sara tamoꞌ nin naturiꞌ no kai edet, nagmatalek sara konan Dios bilang sa nipagmatalek na ni puon tamon Abraham baꞌyo ya et nin naturiꞌ.
13 Syay ama tamon sarban magmatalek. Wanin ta sin nipangakoꞌ nan Dios kona ni Abraham tan saray puri na a marateꞌ liꞌ a awro a ikunen raya a mundo, nipangakoꞌ na in amboꞌ nin banaꞌ ta tinumbok na ni Abraham a Gugan-gan no kai edet, banaꞌ ta nagmatalek ya konan Dios ket nikwinta nayan mapteg nin Dios. 14 No saray mangrisibi nin nipangakoꞌ nan Dios ket sara tamoꞌ a mangwaꞌ nin nibaritaꞌ nin gawꞌen nin Gugan-gan, kasan kakanaan nin pagmamatalek nan tawo konan Dios, tan siin nin nipangakoꞌ na kona ni Abraham ket kai gapo nin matukid. 15 Anamaet, say Gugan-gan ket pasakiten et a panunusa nan Dios kontamon tutawo. No kasa kumon nin lulayi, kasa nin sukat subagen nin layi.
16 Banaꞌ sa sain, pagmamatalek a pangipatukduan yupaꞌ sa kamaungan nan Dios! Ket sinigurado nan Dios a ibi na in say nipangakoꞌ na konran sarba ran puri na ni Abraham. Ama tamoya si Abraham nin siꞌtamon sarba, Judio man nin mampanukid sa manꞌibaritaꞌ nin Gugan-gan o amboꞌ nin Judio, dapot no mampagmatalek atamon nangarig kona ni Abraham. 17 Sain a rabay nin irgwen sin wanan Dios kona ni Abraham a mabasa sa Masanton Kasuratan, “Siꞌka a ama ran nagsikabarang a tutawo! Ginwaꞌ katan wanin.”e Ket, ama tamoya si Abraham sa pangingikit nan Dios a nagmatalkan na. Oꞌ, si Dios nin makapamasubliꞌ nin mabyay konran nunati, tan sa irgo na tamoꞌ, ket mapamain na a gindat a kasa.
18 Wanti e a pagmamatalek na ni Abraham: Abirno bilang nin impusiblin mangyadiꞌ a nipangakoꞌ nan Dios kona, timper naya et a lamang a Dios tan tinagaꞌnan nay pakatukid nin sain nin nipangakoꞌ kona. Banaꞌ ta wanin, ginwaꞌ nayan Dios nin ama ran nagsikabarang a tutawo a bilang sin nipaꞌkit na kona a bubituen sa langit ket wana, “Kapada sara liꞌ kaꞌbaw nin sain a puri mo.”f 19 Sin nibaritaꞌ na in nin Dios kona, tandaꞌ na ni Abraham a saran mitraasawa ket, kai sarayna nin manganak ta magsanyasot a taon yayna tan, si asawa nan si Sara ket, baog ya. Baleꞌ mataman nin wanin, maꞌget lawas a pagmamatalek na ni Abraham. 20 Kai ya gapo nin nagdwadwa a bangliꞌ no kai na nin gawꞌen nin Dios a nipangakoꞌ na. Mas inumget ana edet a pagmamatalek na konan Dios tan nitandudoꞌ nayay ngaran na, 21 ta matalek yan tuloy a magwaꞌ nan Dios a nipangakoꞌ na kona. 22 Banaꞌ sa wanin a nipagmatalek na ni Abraham, nikwinta nayan mapteg nin Dios.
23 Ket sain nin naisurat nin maipaꞌkaꞌ kona ni Abraham, a nikwinta nayan mapteg nin Dios banaꞌ ta nagmatalek ya kona, amboꞌ tamoꞌ nin nigagaran ipaꞌkit a kaabigan para kona ni Abraham. 24 Naigagara et anamaet nin ipaꞌkit a kaabigan para kontamo; siꞌtamo nin ikwinta na anamaet nin mapteg nin Dios banaꞌ ta mampagmatalek atamo kona, sya nin Dios nin namasubliꞌ nin mabyay kona ni Uunuren tamo a si Jesus. 25 Siti a Jesus nin nipagamet nan Dios nin mati banaꞌ ta nagkasalanan atamo, tan pinasubliꞌ nayan mabyay ta pigaw nin maipaꞌkit a napapteg natamo nangibwat sa patiti na.