Kuntrawen na ni Pablo a Magwaꞌ nin Gawꞌen nin Badaꞌnan
3
Magwaꞌ a ibaritaꞌ moyo, “No wanin, kasa edet nin pakaidumawan tamo banaꞌ ta Judio atamo, tan banaꞌ ta nipaturiꞌ atamo nin pangipurukan a tutawo natamon Dios!”2 Amboꞌ gapo nin wanin! Say katutuꞌwan ket abaw! Muꞌna-muꞌna, kontamon Judio nin nipya a nibaritaꞌ nan Dios. 3 Baleꞌ saray raruman Judio, malamang sara konan Dios. Ket banaꞌ ta wanin, kai ya kasi nin mapagmatalkan a Dios nin tukiden na a nipangakoꞌ na kontamo?
4 Amboꞌ gapo nin wanin! Mataman nin nibulaꞌ-bulaꞌ anay sarban tutawo, tutuo ya et lawas a Dios sa nibaritaꞌ na! Say katutuꞌwan, mabasa a wanti e sa Masanton Kasuratan a wana,
“Siꞌka, O Dios, say sarban ibaritaꞌ mo, siguradon mapatutuꞌwan a tukiden mo tan no usisaen ray gawaꞌ mo, kasan maꞌkit ran nagkurangan mo.”a
5 Magwaꞌ a main nin pupilusupo nin mamaritaꞌ a wanra, “No ipaꞌkit nin mapala-palaway nin abas nin gawaꞌ-gawaꞌ tamo a man-gawꞌen nay matunong nin Dios, amboꞌ nin manepeg a dusawen natamon Dios banaꞌ sa sager na.”
Sain ket rason nin mangibwat sa kanakman nin tawo tamoꞌ. 6 Baleꞌ amboꞌ gapo nin wanin! Anaod, no palabasen nan Dios a kasalanan nan sayay tawo, kasan pamatukduan na a sintinsyawan nasaray raruman tutawodti sa mundo.
7 Magwaꞌ a main et utron pupilusupon mamaritaꞌ a wanra, “No sa pibulaꞌ-bulaꞌ tamo ket mapatutuꞌwan ran tuloy nin tutawo a tutuo yay Dios sa ibaritaꞌ na tan banaꞌ sa wanin ket mas raywen raya, kai nin maibaritaꞌ a mampagkasalanan kami tan matkap kamin dusawen.”
8 Kawawengan! Main sarain saray mampamaritaꞌ nin paninidaꞌ kongko a manꞌiyakay ko kano a matkap ray gumwaꞌ nin abas ta pigaw nin mapaliwaꞌ nin wanin a kamaungan nan Dios. Sarain, risibyen ra liꞌ a manepeg nin dusa ra!
Kasa Ni Sayay Tawo a Mapteg
9 Manꞌipaꞌkaꞌ moyo angangko a siꞌtamon Judio ket mas maong atamo dyan saray raruma sa pangingikit nan Dios. Amboꞌ gapo nin wanin! Nayadiꞌ koyna nipapalaway a sarba tamo ngaꞌmin nin tutawo, Judio man o amboꞌ nin Judio, pari-pariho atamon nagkasalanan. 10 Patutuꞌwan ti nin wana sa Masanton Kasuratan:
“Ni saya, kasa gapo nin tawo nin mapteg sa pangingikit nan Dios.
11 Kasa gapo, abirno ni saya, nin talagan nanandaꞌ konan Dios
o masibulot nin tumumbok kona.
12 Sarban tawo, nikisyay sa dalan nin nibi nan Dios
ket kai sara maikanaꞌ konan Dios.
Ni saya, kasa gapo nin makagwaꞌ nin maabig.”b
13 Say ibari-baritaꞌ ra ket baraꞌmo nin mabangꞌet nin mangibwat sa pantyon nin naabryan.
Mibulaꞌ-bulaꞌ sara sa kapada ran tawo.c
Say saritaꞌ ra ket makapati nin baraꞌmon ditaꞌ nin ulay.d
14 Pirmi tanan nikasamaꞌ a pibubebey ra.e
15 Maidadaliꞌ a gamet ra; sa daikleng a dipirinsya, mangmati saran kapada ran tawo.
16 Adtiman a kamiꞌnan ra, mamirwisyo tamoꞌ a gawꞌen ra.
17 Kai ra tandaꞌ a kituno konran kapada ran tawo.f.
18 Kasa gapo sa nakem ra a kaliliꞌmo sa Dios.g
19 Edet, pitanda-tandaꞌ a saray konra nin nipataoy a gugan-gan ket main nin kabiangan konra nin sain nin gugan-gan, kanyaꞌ nin kai gapo nin maibaritaꞌ nin siꞌnuman a kai ya nin manepeg nin madusa no kai edet umbat a sarban tawo konan Dios. 20 Wanin ta abirno nin ni saya ket kasa gapon mapapteg sa pangingikit nan Dios yupaꞌ sa panunumbok sa Gugan-gan, ta no mas mataros nan sayay tawo a Gugan-gan, mas mapalaway anan lamang nin maꞌkit a nasubag a Gugan-gan.
Mapteg yay Dios sa Pammapteg na sa Tawo Yupaꞌ sa Pagmamatalek
21 Sawanin baleꞌ, nipadar nayna nin Dios no paꞌno nan ikwintan mapteg a tawo. Kasan kabiangan nin sayti sa panunumbok sa gugan-gan. Wanin man, nibaritaꞌ ana a maipaꞌkaꞌ sa wanti sin saytaw et itaw sa Libron Gugan-gan tan sa nisurat ran prupita. 22 Oꞌ, ikwinta nayan mapteg nin Dios a sayay tawo banaꞌ sa pagmamatalek na kona ni Jesu-Cristo. Wanin anamaet konran sarban tutawo; kasan pamiduma-duma 23 ta sarban tawo, nagkasalanan tan mampagkurang sa sangkaandaan a pigagawaꞌ nan Dios. 24 Kasan pamiduma-duma anamaet ta, mangibwat lamang sa kamaungan na, ikwinta nayan mapteg nin Dios a sayay tawo. Nirigalo nayti kona sin nipasbot naya konan Cristo a si Jesus. 25 Nibi naya nin Dios a Cristo kontamon tutawo ta pigaw nin ariglwen nay kukasalanan tamo banaꞌ sa dayaꞌ na nin tinmuroꞌ sa patiti na. Ket marisibi tamoya in nin rigalo yupaꞌ sa pagmamatalek tamo sa sain a ginwaꞌ na. Ginwaꞌ na in anaod nin Dios ta pigaw nin ipaꞌkit na nin matunong ya. Sin nuꞌna, inanusan nay tutawo nin pinalabas nay kukasalanan ra 26 baleꞌ sawanin, manꞌipaꞌkit nan Dios a sa kai na nin nipamauryan nin kasalanan ran sarain nin tutawo ket matunong ya, tan ipaꞌkit na anamaet a ikwinta nasaran mapteg a magmatalek kona ni Jesus.
27 Edet kasa gapo nin puon a mirayu-rayo ya a siꞌnuman a mapteg ya banaꞌ sa ginwaꞌ nan diri! Wanin ta kai naya mapapteg nin Dios a sayay tawo banaꞌ sa gawaꞌ na no kai banaꞌ sa pagmamatalek na. 28 Anaod, mangyadiꞌ ana a mapapteg atamo banaꞌ tamoꞌ sa pagmamatalek tamo, tan amboꞌ ta mantumbuken tamoy Gugan-gan.
29 Baleꞌ magwaꞌ a manꞌipaꞌkaꞌ moyo a si Dios, saray Judio tamoꞌ a mangkabiangan na, a kai saraynay amboꞌ nin Judio. Amboꞌ anaod nin wanin! Mangkabiangan nasara anamaet a amboꞌ nin Judio 30 ta tandaꞌ moyoynaod a saya tamoꞌ a Dios. Ket saya tamoꞌ a padalan nin maikwinta nayan mapteg a sayay tawo. Siti ket naipatukdoꞌ sa pagmamatalek nan sayay tawo mataman no Judio ya o amboꞌ.
31 Wanin man, andiꞌ moyo nin ipaꞌkaꞌ a banaꞌ sa pagmamatalek tamo ket, kasaynan sirbi a tumbuken a Gugan-gan.
Amboꞌ gapo nin wanin! Say katutuꞌwan, banaꞌ sa pagmamatalek tamo, nasigurado a pakatukid nin Gugan-gan.