Say Manepeg nin Pangungukom nan Dios sa Sarban Tawo
2
Siꞌkamo, tandaꞌ moyo a masager yay Dios konran magkasalanan nin wanin. Baleꞌ, siꞌka nin mampangukom konran sarain a tutawo, kasa nin maiꞌbat mo konan Dios ta pigaw nin maipalꞌis ka sa panunusa na, ta kapada ra ket, main anamaet nin gawaꞌ-gawaꞌ mon dukaꞌ. Ket sa pangungukom mo nin kapada mon tutawo, manꞌukumen moy lalaman mon diri. 2 Tandaꞌ tamo ngaꞌmin nin manepeg a panunusa nan Dios konran tutawon mangwaꞌ nin wanin. 3 Sa wamo, ukumen nasarayti nin Dios a tutawon man-gumwaꞌ nin dukaꞌ, ket kai naka ukumen sa pangwaꞌ mon lamang nin dukaꞌ a kapada ra? 4 O, banaꞌ ta maong, mapamasinsya, tan mapangitpel yay Dios, ket manꞌipaꞌkaꞌ mon kai mayna matkap nin kabilangan? Matkap mon matarusan a si rason a maong yay Dios komo ket ta pigaw nin byan nakan panaon a maisip moy magbabawiꞌ tan gurutan moynay pagkakasalanan mo! 5 Baleꞌ matibꞌey a ulo mo. Kai mo rabay nin pagbabawian a kukasalanan mo. Mintras nin manꞌumteng, mampabyaten moy dusa mo liꞌ mangibwat sa alakin sager nan Dios sa Awron Paninintinsya na.No saytaw liꞌ nin awro, ipaꞌkit na nin Dios a mapteg a pangungukom na, 6 ta ibi na liꞌ a manepeg nin risibyen nin barang sayay tawo nin dipindi sa ginwa-ginwaꞌ na.a 7 Main nin tutawon kai sumawaꞌ mangwaꞌ nin matunong ta rabay ran tuloy a ataꞌgay a pangingikit nan Dios konra tan pagalangan nasara tan pabyayen nasaran kasan anggawan. Ket konra, anggan-angga nin byay a iti kona a ibi na. 8 Baleꞌ main anamaet nin tutawo nin say karabayan ra tamoꞌ nin bukod a iti sa nakem ra. Amboꞌ nin say nibaritaꞌ nan Dios nin tutuo a mansunuren ra, no kai edet, say abas. Konra, masager yan maong a Dios tan dusawen nasara liꞌ nin mabyat.
9 Pangirangepen nasara liꞌ nin idap tan dyaꞌdyaꞌ nin Dios a sarba ra ngaꞌmin nin tutawo nin mangwaꞌ nin abas; anaod, saray Judio tan saray amboꞌ nin Judio anamaet. 10 Baleꞌ saray gumwaꞌ nin maabig, ipataꞌgay tan pagalangan nasara tan byan nasaran katinekan; anaod saray Judio tan saray amboꞌ nin Judio anamaet. 11 Wanin a gawꞌen nan Dios ta kasan paburito na.
12 Anaod, amboꞌ saran iti sa sirong nin Gugan-gan nin nibi nan Dios kona ni Moises a amboꞌ nin Judio. Wanin man, dusawen nasara liꞌ a lamang nin Dios nin maikadayoꞌ nin anggan-angga kona no magkasalanan sara. Kai na baleꞌ nin ipatukdoꞌ sa Gugan-gan a panunusa na konra.
Saray Judio, iti sara sa sirong nin Gugan-gan. Ket dusawen nasara anamaet liꞌ nin Dios no mampagkasalanan sara et baleꞌ ipatukdoꞌ nayti sa Gugan-gan. 13 Wanin ta kai sara nin maikwinta nin mapteg sa pangingikit nan Dios a tutawo banaꞌ tamoꞌ ta tandaꞌ ray manꞌibaritaꞌ nin Gugan-gan, no kai edet, ta man-gawꞌen ray manꞌibaritaꞌ nin Gugan-gan.
14 Saray amboꞌ nin Judio, kai ra nin tandaꞌ a Gugan-gan nin nibi nan Dios kona ni Moises. Baleꞌ, mataman no wanin, sa kanakman ran bukod ket man-gawꞌen ray manꞌipagwaꞌ nin Gugan-gan, ket manꞌipaꞌkit nin sain a tandaꞌ ran lamang a matunong tan amboꞌ nin matunong nin gawꞌen. 15 Oꞌ manꞌipaꞌkit ra a say nigan-gan nan Dios ket iti sa nakem ra. Say kunsinsya ra, ipatarusan liꞌ konra no maong o dukaꞌ a ginwaꞌ ra 16 sa awro nin ipasintinsyawan na nin Dios konan Cristo a si Jesus a sarba ngaꞌmin nin gawaꞌ tan inisip ran tutawo, pati say kai natandaan. Wanti a lamang a manꞌibaritaꞌ ko sa pangingipatandaꞌ ko konan Mabistan Patandaꞌ.
Muda-mudawen yay Dios Banaꞌ sa Piwadiꞌ-wadiꞌ ran Judio
17 Ket siꞌkamo anamaet nin kapada kon Judio, manꞌipangaya moyon piniliꞌ nakamon Dios nin tutawo na. Matalek kamon akuen nakamon Dios banaꞌ ta siꞌkamoy nangipagametan nin Gugan-gan nin nibi na kona ni Moises, tan manꞌirangas moyon maksaw kamo konan Dios. 18 Tandaꞌ moyo nin peteg no ani a rabay nan Dios tan tandaꞌ moyo no ani a manepeg banaꞌ ta niyakay komoyoy Gugan-gan. 19 Matalek kamo a siꞌkamoy mangyakay konra nin tutawo a bilang konan sayay tawon mampanabin nin mangyakay nin dalan konan sayay bulag, tan wamoyo a siꞌkamoy mamalaway konran baraꞌmon mangkadedleman nin tutawo. 20 Wamoyo et a siꞌkamoy makapamatunong konran saray abas a pinanakem tan mangyakay konran saray kurang et a pakatandaꞌ konan Dios. Sain a wamoyo, a tandaꞌ moyoynay sarba tan tutuo in banaꞌ ta siꞌkamoy namarisibyan nan Dios nin Gugan-gan. 21 Ket banaꞌ anaod ta wanin,
aninay dawal a iyakay moyo saray raruman tutawo, baleꞌ kai moyo nin maiyakay a lalaman moyon diri!
Aninay dawal a manꞌiyakay moyon dukaꞌ a manakaw, baleꞌ manakaw kamo!
22 Aninay dawal a manꞌiyakay moyon dukaꞌ a kiraray sa amboꞌ nin asawa, baleꞌ siꞌkamon diri mangkiraray kamo sa amboꞌ moyon asawa!
Oꞌ mangarimbutong kamon mangisip a raywen saray dios-dios, baleꞌ kai kamo nin marmay nin sumrep nin manakaw sa kamiꞌnan ran dios-dios!
23 Ipagmamalaki moyon siꞌkamoy namarisibyan nan Gugan-gan nan Dios, baleꞌ siꞌkamon diri a mansumubag sa Gugan-gan! Ket anaod, banaꞌ sa gawaꞌ-gawaꞌ moyo, mangkamuda-muda yay Dios!
24 Say katutuꞌwan, mabasayti e sa Masanton Kasuratan,
“Banaꞌ sa gawaꞌ-gawaꞌ moyo nin Judio, mampagꞌirgo saran dukaꞌ kuntra konan Dios a amboꞌ nin Judio.”b
Amboꞌ nin say Nikaturiꞌ a Tutuon Pruwiba nin Pagꞌin nin Tawo nan Dios
25 Oꞌ anaod, main nin maalagan marka a tutawo natamon Dios ta naturiꞌc atamon Judio. Wanin man, no subagen tamon lamang a Gugan-gan nin nibi nan Dios kona ni Moises, kasan sirbi a turiꞌ atamo ta baraꞌmo atamon lamang konran amboꞌ nin tutawo nan Dios. Main tamoꞌ nin kakanaan no tukiden tamoy Gugan-gan. 26 Bilang wanin anamaet, no saray amboꞌ nin turiꞌ ket gawꞌen ray ipagwaꞌ nin Gugan-gan, ikwinta nasaraynaod a lamang nin Dios nin tutawo na. 27 Ket no wanin, kikumpurmi sara konan Dios nin sintinsyawan nakamo. Magwaꞌ in ta kai moyo nin man-gawꞌen a ibaritaꞌ nin Gugan-gan abirno nin siꞌkamoy namarisibyan nin Gugan-gan tan abirno nin nipaturiꞌ kamo.
28 Edet, siꞌno yan peteg a tawo nan Dios? Amboꞌ ya in si mantumbuken na tamoꞌ a kaugalian nin mangkaꞌkit. Amboꞌ anamaet nin sain a peteg nin mamagꞌin nin turiꞌ konan sayay tawo. 29 Si peteg nin Judio ket syaytaw si nasilyan a kanakman na, tan say maibaritaꞌ nin peteg nin nikaturiꞌ ket say nikaglat nin kadukaan a iti kona. Si main nin gawaꞌ sa sain ket si Ispirito nan Dios tan amboꞌ a say ginwaꞌ sa lalaman nin tawo. Konan si wanin a tawo, amboꞌ a tutawo a mangrayo kona no kai si Dios.