2 Sitin Mabistan Patandaꞌ, nipangakoꞌ naya nin Dios sin naꞌteng anan panaon sa nipatandaan na yupaꞌ konran prupita na tan nisurat ra sa Masanton Kasuratan. 3 Say pangakoꞌ na ket maipaꞌkaꞌ konan Anak na a nagꞌin nin tawo. Sya si Uunuren tamon Jesu-Cristo. Maipaꞌkaꞌ sa nikatawo na, puri naya ni Adiꞌ David. 4 Maipaꞌkaꞌ sa nikaDios na, makapangyayadiꞌ nin naipaꞌkit a syay Anak nan Dios mangibwat sa nipamasubliꞌ nan mabyay kona. 5 Ket, banaꞌ kona ni Uunuren tamo, nibi na komi nin Dios a pagkanawanawa nin magꞌin nin apostol na, nin nibakiꞌ nan mangipatandaꞌ sa sarba nin tutawo maipaꞌkaꞌ kona ni Jesu-Cristo, ta pigaw nin magmatalek sara ket tumulok sara kona. Ket no wanin, marayo ya si Jesu-Cristo. 6 Nibakiꞌ nakami anamaet komoyo nin isen sa Roma a nasagyat nin maipasaya kona ni Jesu-Cristo.

7 Surat koyayti komoyon sarbadsen a kawaꞌnan na nin Dios tan sinagyat na nin magꞌin nin tutawo na.

Sapa kumon ta si Dios a syay Ama tamo tan si Uunuren tamon Jesu-Cristo bindisyunan rakamo tan byan rakamon mabistan kapapaꞌsar.

8 Muꞌna-muꞌna sa sarba, kisalamatan koyay Dios banaꞌ komoyo mangibwat sa ginwaꞌ na ni Jesu-Cristo. Oꞌ a ta say pagmamatalek moyo kona ni Jesu-Cristo, ket pitanda-tandaꞌ anggan sa adayoꞌ anan lulugar. 9 Si Dios nin mampagsirbyan ko sa anggawan nin mababaꞌ ko sa pangingipatandaꞌ ko konan Mabistan Patandaꞌ maipaꞌkaꞌ konan Anak na, ket tandaꞌ na a isalambit katamo tanan pirmi tepeꞌ nin dumasal ako. 10 Mandawaten koynan naꞌteng konan Dios a no magwaꞌ ket iyaburoy na nin makapikaꞌ akoynadsen komoyo. 11 Wanin ta masulit akoynan makapikaꞌ isen komoyo nin maipagaꞌmuran ko komoyo no ani a main mangibwat konan Ispirito nan Dios ta pigaw nin mapaꞌget a pagmamatalek moyo kona. 12 Say rabay kon irgwen ket si pari-pariho atamon mapagsen. Siꞌkamo, mapagsen kamo nin no paꞌnoy pagmamatalek ko konan Dios, tan siꞌko, mapagsen ako nin no paꞌnoy pagmamatalek moyo kona. 13 Rabay koynaod nin matandaan moyo, bubsat, a naꞌteng koynan rabay a makodsen komoyo baleꞌ abaw a makapaed kongko. Rabay koy main anamaet nin magwaan kodsen komoyo kapadan nangyadiꞌ itaw konran raruman amboꞌ nin Judio sa lulugar a kinaꞌ ko. 14 Anaod, kargo kon ipapalaway yay Mabistan Patandaꞌ sa sarban tawo, konran taga syudad tan konran taga tatalon, konran ataꞌgay a adal tan konran kai nin nagꞌadal. 15 Ket, masulit akon tuloy nin maipatandaꞌ koya anamaet a Mabistan Patandaꞌ komoyodsen sa Roma.

16 Anaod, masibulot a pangingilalo ko konan sitin Mabistan Patandaꞌ ta, si Dios, usaren nayaytin main nin pakayadiꞌ nin mangisalba konan siꞌnuman a magmatalek kona ni Cristo. Nuꞌna yan naipatandaan konran Judio, ket sawanin manꞌipatandaan yayna sa sarban tutawo nin amboꞌ nin Judio. 17 Anaod, iti konan sitin Mabistan Patandaꞌ, ipadar nan Dios kontamo no paꞌno atamon magꞌin nin mapteg sa pangingikit na. Siin ket si lawas a magmatalek atamo kona. Mabasa tamoyti et nin wanan Dios sa Masanton Kasuratan, “Si tawo nin ikwinta kon mapteg nin naipatukdoꞌ sa pagmamatalek na kongko, main nin byay nan iti kongko.”^a

18 Anaod, wanin ta manꞌipadar na nin Dios nin mangibwat sa langit a alaki nin sager na sa sarban tawo a mangkumuntra kona tan mampangwaꞌ nin dukaꞌ. Banaꞌ sa dukaꞌ a gawaꞌ-gawaꞌ ra, mangkuntrawen ray katutuꞌwan 19 maipaꞌkaꞌ konan Dios. Oꞌ, saytin katutuꞌwan ket tandaꞌ nin sarban tawo.

Wanin ta mapala-palaway nan nipaꞌkit in nin Dios konra. 20 Nangibwat ana sin pinarsa nayay mundo, maalilbiꞌ ya banaꞌ sa bubagay a pinarsa na. Nipapalaway nay pigagawaꞌ na a kai nin maꞌkit, lalun-laloynay kasan anggawan tan alakin pakayadiꞌ na tan say sarban pangalilbian a syay Dios. Kanyaꞌ nin kasan makapamaritaꞌ a kai ra nin tandaꞌ a maipaꞌkaꞌ konan Dios. 21 Oꞌ tandaꞌ raynan sarba ngaꞌmin nin tutawo a maipaꞌkaꞌ konan Dios tan tandaꞌ ran manepeg yan raywen, baleꞌ kai raya nin raywen. Kai raya et nin kisalamatan banaꞌ sa mabistan ginwaꞌ na, no kai edet, say pipanemtem ra ket say kasan kakanaan maipaꞌkaꞌ konan Dios. Edet, baraꞌmon nasalimbengan nin dedlem a pinanakem ra. 22 Mataman no manꞌibaritaꞌ ra nin liso a pakataros ra maipaꞌkaꞌ konan Dios, manꞌipaꞌkit ra nin mangkabarang a pinanakem ra, 23 ket ginurutan rayay Dios nin kasan anggawan nin nipadar a kataꞌgayan na konra, ket namaꞌdeng saran diosen ran kabakas tamoꞌ a tutawo nin mangangga sa patiti, tan wanin et a mumanuk-manok tan uayep nin lumalako, o pati kumayam.

24 Banaꞌ sa wanin, pinauryan nasarayna nin Dios nin gawꞌen ra a nikasamaꞌ nin gawaꞌ-gawaꞌ a rabay ra nin gawꞌen, anggan migwaan sarayna nin madawal sa lalaman ra. 25 Oꞌ, amboꞌ a katutuꞌwan nin maipaꞌkaꞌ konan Dios a akuen ra no kai edet, say bulaꞌ-bulaꞌ, ta say pinarsa nan Dios a manraywen tan mampagsirbyan ra, amboꞌ yay Dios nin namarsan sarba. Si Dios, syay manepeg tamoꞌ nin raywen anggan-angga!

26 Banaꞌ ta wanin a man-gawꞌen ra, pinauryan nasarayna nin Dios sa madawal a karabayan ra angga nin saray bubbayi, sa kapada ran bubbayi ra gawꞌen a gawaꞌ nin mitraasawa, amboꞌ konran saray manepeg. 27 Ket wanin anamaet a lamang konran lulalaki. Imbis nin sa bubbayi ra gawꞌen a gawaꞌ nin mitraasawa, saray kapada ran lulalaki a maꞌmot nin apesen ra. Makapadingꞌey a gawaꞌ-gawaꞌ ra, mirararay a lalaki tan lalaki; ket sa sain a dukaꞌ a gawaꞌ-gawaꞌ ra, mansidaen raynay lalaman ra a syay manepeg nin dusa sa niyadayoꞌ ra sa katutuꞌwan maipaꞌkaꞌ konan Dios.

28 Banaꞌ ta nibilang rayna nin kasaynan sirbi nin pagtandaꞌ konan Dios, pinauryan nasarayna nin Dios nin dukaꞌ tanay pipanemtem ra ket, gumwaꞌ sara nin amboꞌ nin matunong a gugawaꞌ. 29 Iti ana konra nin kasan dugaꞌ a sarban bakas nin kasalanan tan kadukaan. Maagom sara tan marinet a pangingisip ra. Pinasyan imbel ra, mipapatyan sara, miaaway sara, misasauran sara, mangisip sara tanan pirmin dukaꞌ sa kapada ran tawo. Sangawan a dilaꞌ ra, 30 mipadukaan sara, kaguraꞌ rayay Dios, kai sara nin mamaga-baga, marangas sara tan mipataꞌgay sara. Maong saran mangisip nin gawꞌen ran kadukaan; malamang sara konran mangatua ra. 31 Kurang a pinanakem ra no maipaꞌkaꞌ konan Dios; kai nin magwaꞌ nin tepren a irgo ra; kasa gapo nin pangangadoꞌ ra o ingangaꞌdo ra sa kapada ran tawo.

32 Mataman no tandaꞌ raynan peteg a wanan Dios a saray tutawon gumwaꞌ nin wanin ket madusa saran patiti, man-gawꞌen ra et a lamang. Saya et, amboꞌ tamoꞌ nin wanin, no kai edet, raywen rasara et a mangwaꞌ nin wanin.