2
Kanyaꞌ nin nagdisisyon akon kai ana yapoꞌ anaod nin makodsen komoyo ta kai ko nin rabay nin umidap a nakem tamon pari-pariho a kapadan nangyadiꞌ sin binisita katamon masusuyot. 2 Siꞌkamoy puon nin ririket ko, ket no napaidap ko liꞌ wadiꞌ a nakem moyo, siꞌno et a mamaririket kongko? Kasayna! 3 Banaꞌ ta wanin kanyaꞌ nin sinuratan katamo tana sin saytaw, ta no mako akodsen komoyo ket siꞌkamo nin manepeg nin mamaririket kongko ket bangliꞌ no mapaidap moyo a nakem ko. Sain a ginwaꞌ ko ta sigurado ako a no maririket ako ket maririket kamo anamaet. 4 Aburido akon maong tan napnoꞌ akon kaberengan banaꞌ komoyo, tan abaw a tinmuroꞌ nin lwaꞌ ko sin sinuratan katamo. Sinuratan katamo amboꞌ ta pigaw nin paberengen kamo, no kai edet, ta pigaw nin ipatandaꞌ ko komoyo a naiduman pangangawaꞌnan ko komoyo.Paksawen ran Mammemper a Nakem nan Sayan Nagbabawiꞌ ana
5 Edet, say maipaꞌkaꞌ konan sayadsen komoyo nin puon nin sakit-ulo; amboꞌ ako tamoꞌ a napirwisyo na no kai sarba moyo et, o ibaritaꞌ tanan saray raruma komoyo. Kai ko rabayti nin paalakyen et. 6 Sadag anay nipangirangep na nin nipanisiplina ra kona nin saray kaꞌbawan komoyo, 7 tan matkap moyaynan pirdunawen nin ingangaꞌdwen sawanin. Bibilinen moyan paksawen a nakem na ta bangliꞌ no mapatapoꞌ na banaꞌ sa nalabas a bereng na. 8 Edet ibaritaꞌ ko komoyo nin ipaꞌkit moyon alaki et a pangangadoꞌ moyo kona. 9 Si sayay rason et no ambaleꞌ a sinuratan katamo sin saytaw ket ta pigaw nin matandaan ko a liso nin mantumulok kamo sa niyakay komoyo. 10 Siin a tawon pirdunawen moyo, pinirduna koyaynan main nin ingangaꞌdo. No main wadiꞌ nin manepeg nin pirdunawen ko, gawꞌen ko sa adapan na ni Cristo para sa kaabigan moyo. 11 Yupaꞌ sa wanin ket kai natamo nin mataktika ni Satanas; ta tandaꞌ tamoynay sinisirib a plano na.
Say Pakaaburido na ni Pablo ket Nasilyan nin Pananalo
12-13 Sawanin, sin nako ako sa babalin Troas, aburido akon tuloy ta kai koya nin narateꞌ itaw si busat tamon Tito a syay mangawit nin baleꞌ moyo konan surat ko. Ket mataman nin binyan nakon Dios nin alakin pagkanawanawa nin ipatandaꞌ koyadtaw a Mabistan Patandaꞌ nin maipaꞌkaꞌ kona ni Cristo, pinatanid ako konran bubsat itaw tan tinmaros akodti sa Macedonia ta pigaw nin kiꞌkitan ako kona.
14 Baleꞌ wantaw man a kimey ko sin itaw ako,a kisalamat ako konan Dios ta sya, manꞌipangulo nakami lawas a mangingilalaman kona ni Cristo sa parada banaꞌ sa pananalob na yupaꞌ kona ni Cristo. Anamaet a lamang, manꞌusaren nakamin manꞌipatandaan konran tutawo sa adtiman nin keen mi a maipaꞌkaꞌ kona ni Cristo, nin bilang banglon umusbong. 15 Say gawꞌen mi ket baraꞌmon mabanglon insinso nin manꞌidaꞌton na ni Cristo konan Dios a masanglap ran saray mangkaisalba tan mataman et nin saray mangkasidaꞌ. 16 Saray mangkasidaꞌ, say pakaangot ra sa pangingipatandaꞌ mi ket mabangꞌet nin makapati ta miugot sara sa dukaꞌ a panganggawan; saray mangkaisalba anamaet, say pakaangot ra sa pangingipatandaꞌ mi ket mabanglon makapabyay banaꞌ ta maikaꞌ sara sa mabistan byay a iti konan Dios. Ay, mabyat ti nin gawaꞌ! Kasan maikanaꞌ nin mangwaꞌ sa sayti nin rispunsibilidad! 17 Anaod, abaw saray mangangakay nin gawꞌen ran kumirsyo a pangangakay ra baleꞌ amboꞌ kami nin bilang konra. Si Cristo, syay mampangwaꞌ komi nin kumanaꞌ nin mangingilalaman kona ket mampangipatandaꞌ kami mangibwat sa masibulot a nakem mi. Nibakiꞌ nakami nin Dios ket maringgas a apes mi sa adapan na.