3
Sawanin, main ana angangkon mampangipaꞌkaꞌ a mampipaong kami anamanaet. Main nin raruman mangangakay a matkap ray mangiprisintan rikumindasyon baꞌyo moyo sara nin akuen, o kai rasara anamaet nin akuen nin raruman tawo no kasan rikumindasyon moyo. Matkap mi para nin wanin!? 2 Anaod, say kabibyay moyo a baraꞌmon surat nin mangirikuminda komi a naisurat sa kapusuan mi. Ket madaliꞌ rayan mabasa nin siꞌnuman a tawo nin makaꞌkit sa mabistan bunga nin nipagtrabaho mi komoyo. 3 Mapala-palaway nin maꞌkit a siꞌkamo ket baraꞌmo nakamon surat ni Cristo nin nipasurat na komi. Sitin surat, kai ya nin nisurat nin tinta, nin tawo tamoꞌ, no kai nin si Ispirito nan diri nin si sibibyay a Dios; amboꞌ sa baton tiniblak a bilang sa Gugan-gan no kai sa kukapusuan moyo.Say Pakayadiꞌ nan si Baꞌyon Nipangakoꞌ
4 Maibaritaꞌ mi a wanin ta alaki a talek mi konan Dios nin mangibwat kona ni Cristo. 5 Kai mi nin maibaritaꞌ a banaꞌ sa pakababaꞌ mi ket nagwaꞌ mi in say nagwaan mi; no kai edet, say pakababaꞌ min makagwaꞌ nin animan ket mangibwat konan Dios. 6 Anaod, syay nami komi nin pakababaꞌ ta pigaw nin ipatandaan miyay baꞌyon pangakoꞌ nin nibi na para sa tutawo. Sitin nipangakoꞌ nan Dios, naipatukdoꞌ ya sa pakayadiꞌ nan Ispirito na nin mampiikap kontamo amboꞌ nin sa naisurat ta saytin Gugan-gan nin naisurat ket mangikaꞌ sa pakasintinsya nin madusa anggan-angga. Baleꞌ si Ispirito nan Dios, byan natamo nin anggan-angga nin byay a iti konan Dios.
7 Sin nipataoy nayti nin Dios a Gugan-gan na yupaꞌ kona ni Moises sin naꞌteng ana, nin naisurat sa baton tiniblak, naꞌkit a pakayadiꞌ nan Dios tan say pinasyan salag na. Kanyaꞌ nin sinumlag nin wanin ana a rupa na ni Moises ket kai raya gapo nin mapastang nin saray kapada nan Israelita. Ket abirno nin wantaw anay salag, kai nin lamang nin nagnayon. Anaod, wanin kaalaki a pakayadiꞌ nin naikalamoꞌ sa sain nin manintinsya kontamo nin mapati, 8 mas alaki et baleꞌ nin adayoꞌ a pakayadiꞌ nan Dios sa gawꞌe-gawꞌen na sa pakikalamoꞌ nan Ispirito kontamo. 9 No say nipadar nin pakayadiꞌ nin Gugan-gan a sayti puon nin pakadusa ket alaki, mas alaki et nin adayoꞌ a pakayadiꞌ nin say makapangwaꞌ a say tutawo ket magꞌin nin mapteg sa pangingikit nan Dios. 10 Kanyaꞌ nin sitaw si gindat a makapangyayadiꞌ ket baraꞌmon nakasawan yaynan pakayadiꞌ ta nasilyan yaynan mas makapangyayadiꞌ et. 11 Ket no main nin pakayadiꞌ nan si gindat nin padalan a kai nin magnayon, alakin adayoꞌ et a pakayadiꞌ nan si baꞌyon nipangakoꞌ a siin ket magnayon ya.
Padaran a Pangingipatandaꞌ ra ni Pablo konan Mabistan Patandaꞌ
12 Banaꞌ ta matalek kami a wanin konan siti nin baꞌyon nipangakoꞌ, kasan iyadi-adi mi sa pangingipatandaꞌ mi nin siti. 13 Amboꞌ kamin lamang nin bilang kona ni Moises a sinakban nay rupa na ta pigaw nin kai ra nin magwaꞌ nin pastangen nin nakamuliteꞌ nin saray kapada nan Israelita a kai nin magnayon nin salag. 14 Baleꞌ, kai ra nin natarusan sin saytaw a maipaꞌkaꞌ sa say salag nan si gindat nin padalan a kai nin magnayon ta say nakem ra ket baraꞌmon lamang nin nasalimbengan. Anaod, mataman nin anggan sawanin, no basawen raytaw nin saray puri ra say nisurat na ni Moises ket baraꞌmon anamaet nin nasalimbengan a nakem ra maipaꞌkaꞌ sa sain. Kai ra et nin matarusan ta no tamoꞌ a naipasaya sara kona ni Cristo ya nin maglat a salimbeng. 15 Anaod, mataman nin anggan sawanin, no basawen ra in say Gugan-gan nan Dios, kai ra nin mataros ta baraꞌmon main et nin mampanalimbeng nin nakem ra. 16 Baleꞌ no magmatalek yay sayay tawo konan Uunuren, maglat ya in si mampanalimbeng nin nakem na.a 17 Sawanin, si Uunuren nin manꞌibaritaꞌ iti ket si Ispirito na. No mampiikap yay Ispirito na konan sayay tawo, si tawo, ket maglat yayna sa saytaw say mampanalimbeng nin nakem na. 18 Ket, kontamo ngaꞌmin nin main yay Ispirito na, paꞌsar a kasan nakasalimbeng kontamo sa pakaꞌkit ran raruma kanyaꞌ nin maꞌkit a pakayadiꞌ nan Uunuren kontamo. Sawanin, paꞌsar ispiho natamon Ispirito a sya si Uunuren, ket mampalinwen natamo nin anggan sa baraꞌmo atamoyna liꞌ nin sya.