Siti nin surat ket ibat ya kona ni Pablo. Sinurat nayayti nin para konran mammemper a amboꞌ nin Judio a mampiikap sa lugar nin Galacia. Sa wanra nin madudunong nin tutawo nin nangadal konan Biblia, si rabay nan ibaritaꞌ ni Pablo sa wanadti nin lugar a Galacia ket say bubabalin Iconio, Listra, Derbe, tan Antioquia a iti sa prubinsyan Pisidia. Saytin lulugar ket nayi sa saytaw say kinaꞌ ra ni Pablo tan Bernabe sa nuꞌnan nipako ra sa nagsikabarang nin lugar nin nangipata-patandaꞌ konan Mabistan Patandaꞌ maipaꞌkaꞌ kona ni Cristo (Ginwa-ginwaꞌ kapitulo 13 tan 14).

Abaw saray tutawo sa sain nin lulugar a nagmatalek kona ni Cristo yupaꞌ sa niyakay ra. Baleꞌ main nin tutawon subag kona ni Pablo a rinmateꞌ sa dudupong ran mammemper itaw. Wanra a si sayay tawo ket matkap nan tumbuken a Gugan-gan na ni Moises ta pigaw nin matunong ya sa pangingikit nan Dios. Sa sitin surat na ni Pablo konran taga Galacia, gagara na nin ayaten sara a mammemper nin naibarang ran saray mangangakay nin abas nin sumubliꞌ sara sa gindat a tutuon pammemper ra kona ni Cristo.

Nitaranaꞌ naya ni Pablo a surat na sa pangingiꞌdeng nan kanepegan nan tawagen nin apostol na ni Jesu-Cristo. Madaer nan nidipinsa a say nipangayab kona nin magꞌin nin sayay Apostol ket nangibwat konan Dios, amboꞌ nin ibat sa uray nin tawo. Nibakiꞌ nayan Dios konran tutawon amboꞌ nin Judio, nin ipatandaan na a yupaꞌ tamoꞌ sa pammemper ket si sayay tawo, magꞌin nin mapteg ya sa pangingikit nan Dios (2:16). Sumunor, nikusto na a abas a pangangakay. Sa kapitulo 5 tan 6, nipaꞌkit na ni Pablo a say pigagawaꞌ nan sayay mammemper ket nangibwat nin peteg sa adoꞌ nin bunga nin pagmamatalek kona ni Cristo.