2 Siꞌko tan sarba ran bubsat a kalamoꞌ kodti, iparateꞌ mi a pammakumusta mi sa dudupong nin mammemper isen sa prubinsya nin Galacia.^a

3 Sapa kumon ta si Dios a syay Ama tamo tan si Uunuren tamon Jesu-Cristo bindisyunan rakamo tan byan rakamon mabistan kapapaꞌsar.

4 Si Cristo, nidaꞌton nay lalaman na nin mati para sa pakapirduna nin kukasalanan tamo ta pigaw nin galten natamo sa pakayadiꞌ nin kadukaan a mampagꞌuray konan sitin kapresan a panaon. Ginawaꞌ na in ni Cristo banaꞌ ta siin a rabay nan Dios a syay Ama tamo.

6 Nabigraꞌ akon nakatandaꞌ nin maipaꞌkaꞌ komoyo a manlakwanan moyayna anamain a Dios nin sya, sin amboꞌ et nin naꞌteng ket sinagyat nakamo banaꞌ sa kamaungan na ni Cristo. Ket sawanin, baraꞌmon mamper kamoyna sa sakalakon akay a wanran “mabistan patandaꞌ”. 7 Baleꞌ amboꞌ yan pageꞌ nin mabistan patandaꞌ in si wanran “mabistan patandaꞌ”. Tinawag koya tamoꞌ nin wanin ta main sarain saray mampangyakay nin bulaꞌ-bulaꞌ ket, sawanin man-gulwen ray kaisipan moyo ta rabay rayan tursyen a Mabistan Patandaꞌ nin maipaꞌkaꞌ kona ni Cristo. 8 Baleꞌ ibaritaꞌ ko komoyo a no main nin mangyakay komoyo nin wana say akay na ket “mabistan patandaꞌ” baleꞌ naiduma sa nipatandaan min katutuꞌwan komoyo, madusa yan talaga sa impyirno. Wanin a mangyadiꞌ mataman no siꞌkami o anghil nin ibat sa langit a mangyakay nin sain. 9 Nibaritaꞌ mi ana intaw komoyo baleꞌ ibaritaꞌ ko anamanaet sawanin a si siꞌnuman nin mangyakay nin wana say manꞌiyakay na ket si Mabistan Patandaꞌ baleꞌ naiduma sa nipatandaan mi komoyo nin inagwang moyo, matkap nin dusawen ya liꞌ sa impyirno.

10 Sain nin nibaritaꞌ ko ket amboꞌ nin pammagusto sa tawo. Amboꞌ nin wanin ta si rabay ko nin mapagustwan ko ket si Dios. Kai ko nin manꞌapesen a magꞌin nin rabay-rabay rakon tutawo ta no sain et a tikapen ko, kai ako nin mantumulok kona ni Cristo; anaod, siꞌko nin ibabakiꞌ na.

11 Rabay kon mapala-palaway nin tandaꞌ moyo, bubsat, a si Mabistan Patandaꞌ nin nipatandaꞌ ko komoyo ket amboꞌ yan gawaꞌ nin tawo. 12 Kai ya nin nibaritaꞌ kongko nin siꞌnuman a tawo tan kai ya anamaet nin niyakay nin siꞌnuman a tawo kongko, no kai edet, nipatandaan naya kongko ni Jesu-Cristo nin mismo.

13 Anaod, tandaꞌ moyo no paꞌnoy kabibyay ko sin saytaw sin iti ako et sa pammemper ran Judio. Kasan angan-angan kosaran dinuksa-duksaꞌ saray pinipapasaya nan Dios kona ni Cristo tan ginwa-ginwaꞌ koy anggawan nin mababaꞌ kon erpen a lapag nin dupong ra. 14 Iti ako sa uꞌna ran kaanak-anakan kon Judio no maipaꞌkaꞌ sa pagkarilihyuso. Mas matulok kon tinumbok ngaꞌmin a uakay tan kaugalian ran pupuon min Judio. 15 Baleꞌ mataman nin wanin, ket si Dios, mangibwat sa kamaungan na, piniliꞌ nakoyna sin baꞌyo ako et nin niyanak tan kinayaban nakoynan magꞌin nin aripen na ni Cristo. Ket, sin rinabay na, 16 nipatandaan na kongko no siꞌno yan peteg a anak nan si Jesus ta pigaw nin maipatandaꞌ koyay Mabistan Patandaꞌ maipaꞌkaꞌ kona konran amboꞌ nin Judio, nin kasan siꞌnuman nin nangyakay kongko no ani a ipatandaꞌ ko. 17 Ni kai ako nin nako sa Jerusalem ta pigaw nin ikipaꞌno konran nuꞌnan nagꞌin nin apostoles dyan siꞌko, no kai edet, nako akon tampor sa Arabia, miꞌsa sinmubliꞌ ako sa syudad nin Damasco. 18 Linmabas anay tuloy taon sin nako ako sa Jerusalem^b nin kinaꞌ koya nin pinasyar si Pedro, tan nikiikap akodtaw kona nin labinlimay awro tamoꞌ. 19 Naꞌkit koyadtaw si Santiago nin busat na ni Uunuren tamon Jesus tan pwira konran rwa ni Pedro kasaynan raruma et nin naꞌkit ko konran apostoles.

20 Manꞌipangakoꞌ ko sa adapan na nin Dios a sarban sayti say manꞌibaritaꞌ ko komoyo ket katutuꞌwan.

21 Miꞌsa, nako ako sa lulugar a sakop nin prubinsyan Siria tan Cilicia. 22 Sin saytaw a panaon, kai rako et nin tandaꞌ nin saray mammemper kona ni Cristo itaw sa prubinsyan Judea. 23 Narnge-narngeꞌ ra tamoꞌ nin wanra nin raruma a siꞌko nin nanuksa-duksaꞌ intaw konran mammemper kona ni Cristo ta pigaw nin makasa sara ket, sawanin manꞌipatandaꞌ koyaynay pammemper kona. 24 Ket manraywen rayay Dios banaꞌ sa manꞌipagwaꞌ na kongko.