Saray Pupangulo, Nitandudoꞌ ray Pangingipatandaꞌ na ni Pablo
2
Napalabas a labinꞌaꞌpat a taon, nako ako anamanaet itaw sa Jerusalem. Kalamoꞌ koya si Bernabe tan nitagad koya nin nayi si Tito. 2 Nako akodtaw ta nipadar na kongko nin Dios a mako ako. Sa bukud-bukod a pakiadap ko konran saray pupangulon man-galangen nin sarba, niprisinta koyay Mabistan Patandaꞌ a manꞌipatandaꞌ ko konran amboꞌ nin Judio. Ginwaꞌ koyti banaꞌ ta rabay kon mataros tan maꞌkit ra nin kusto a man-gawꞌen ko ket kai nin magꞌin nin kasan kabalikasan a ginwaꞌ koyna tan say gawꞌen ko et. 3 Ket naꞌkit ran pageꞌ nin kusto a man-gawꞌen ko ta si Tito ket kalamoꞌ koya, tan mataman nin amboꞌ yan turiꞌ ta amboꞌ yan Judio, ni kai ra et nin nipasuet a turien ya 4 abirno main nin umno ran bubsat kano wadiꞌ sa pammemper a nangipasuet a turien ya nin maitukoy sa wana sa Gugan-gan. Kai sara naaraman nin sinumrep nin mako mangispya no paꞌno kami nin libri banaꞌ ta iti kami konan Cristo a si Jesus, a no kai mi ana nin mantumbuken a Gugan-gan.a Rabay rakamin gawꞌen nin baraꞌmon aripen nin gawꞌen mi ngaꞌmin a ipagwaꞌ nin sain a Gugan-gan. 5 Baleꞌ kai kami gapo nin inmaburoy sa karabayan ra ta pigaw nin si katarusan nan Mabistan Patandaꞌ ket kai ya nin malawukan nin bulaꞌ-bulaꞌ tan sa pammemper moyo ket kai kamo nin mabarang.6 Ket saraytaw saray manꞌalilbien nin pupangulo (Wangko nin saray manꞌalilbien nin pupangulo baleꞌ kasa in kongko banaꞌ ta kona nin Dios ket kasan kwinta nin pusisyon;) sara anaod nin pupangulo, kasan nilamoꞌ ran animan konan Mabistan Patandaꞌ nin manꞌipatandaꞌ ko. 7 Naalilbiꞌ rayna edet a nipya nan Dios kongko a pangingipatandaꞌ konan Mabistan Patandaꞌ konran amboꞌ nin Judio, kapadan nibi nan trabaho kona ni Pedro a ipatandaꞌ naya konran Judio 8 banaꞌ ta si Dios nin maksaw nin mampagtrabaho sa nakaibakian nan mangipatandaꞌ ni Pedro konran Judio ket maksaw ya anamaet lamang nin mampagtrabaho sa nakaibakian kon mangipatandaꞌ konran amboꞌ nin Judio. 9 Ket sara si Santiago, Pedro tan Juan, a saray manꞌalilbien nin pupangulo, naalilbiꞌ ra nin nibi nayayti kongko nin Dios a pagkanawanawa, kanyaꞌ nin nikipasamano sara komi ni Bernabe nin mangipaꞌkit a kumpurmi saran matkap a mitanggon kami sa pangngawaꞌ nin trabahon ipagwaꞌ nan Dios. Nitatarusan kami a siꞌkami a mangipatandaꞌ konran amboꞌ nin Judio tan sara konran Judio. 10 Si kal-la dinawat ra tamoꞌ nin gawꞌen mi ket si pirmi mi sara tana nin panemtemen a pupubri. Baleꞌ siin anay gindat nin man-gawꞌen ko.
Matkap a Sinurnang naya si Pedro ni Pablo
11 Ket niꞌsa, nako ya komi itaw sa Antioquiab si Pedro. Ket adap-adapan nin sinurnang koya banaꞌ ta main nin abas a gawaꞌ na. 12 Sin nadaliꞌ yadtaw et, nikidungu-dungo yan mangan konran mammemper a amboꞌ nin Judio. Baleꞌ main nin rinmateꞌ itaw nin mammemper nin nibakiꞌ na ni Santiago, ket nangibwat sin sain, kinmalꞌi-palꞌis yayna si Pedro nin kai yayna gapo nin nikidungo konran amboꞌ nin Judio banaꞌ ta maliꞌmo ya konran saraytin mammemper nin Judio nin mampangipasuet a saray mammemper nin amboꞌ nin Judio ket matkap saran paturiꞌ a bilang sa ipagwaꞌ nin Gugan-gan.c 13 Ket tagem anamaet nin saray raruman mammemper nin Judio inarig raynay gawaꞌ na ni Pedro abirno tandaꞌ ran amboꞌ nin kusto. Ket tagem anamaet anan si Bernabe, naumalitan yan katakrutan ra!
14 Ket sin naamingaw kon mampangimey saran kai nin maitukoy sa katutuꞌwan a wanan Mabistan Patandaꞌ, wangko kona ni Pedro sa adapan ran sarba, “Siꞌka Pedro, saya kan Judio, baleꞌ mampagkabyay kaynan baraꞌmon amboꞌ nin Judio ta kai moyna nin mantumbuken a kaugalian ran Judio. Mayin nin sawanin ket pasueten mosaray amboꞌ nin Judio nin magkabyay saran bilang nin Judio?”
15 Wangko et, “Naiyanak atan pageꞌ nin Judio kanyaꞌ nin amboꞌ atan kapada ran saray amboꞌ nin Judio nin kai ra nin tandaꞌ a Gugan-gan nan Dios. 16 Wanin man, tandaꞌ ta nin maikwinta yan mapteg a sayay tawo sa pangingikit nan Dios tamoꞌ no magmatalek ya kona ni Jesu-Cristo tan amboꞌ gapo nin banaꞌ sa panunumbok nin Gugan-gan. Ket siꞌta mataman et nin Judio ata, nagmatalek ata anamaet konan Cristo a si Jesus ta pigaw nin maikwinta atan mapteg sa pangingikit nan Dios banaꞌ sa sain a pagmamatalek ta, tan amboꞌ nin sa panunumbok ta sa sain nin Gugan-gan. Tandaꞌ ta nin kasan tawon maikwinta nin mapteg sa pangingikit nan Dios banaꞌ sa panunumbok nin Gugan-gan.d”
17 Sawanin, banaꞌ ta dumugen tamo anaod a mapapteg sa pangingikit nan Dios yupaꞌ sa pakipasaya tamo kona ni Cristo imbis nin yupaꞌ sa panunumbok nin Gugan-gan ket sa wanin, manꞌikwinta ratamon sikakasalanan nin Judio. Edet, say rabay kasi nin irgwen ket ayunan na ni Cristo a kasalanan? Kai! Amboꞌ gapo nin wanin! 18 Baleꞌ no sumubliꞌ akon paisirong sa sain nin Gugan-gan nin ginurutan koyna tan ibaritaꞌ kon siin a manepeg nin dalan, manꞌipadar ko a lalaman kon diri nin main nin kasalanan banaꞌ ta ginurutan koyna in nin Gugan-gan. 19 Ket siꞌko, baraꞌmo akon pinati nin Gugan-gan kanyaꞌ nin amboꞌ akoynan iti sa sirong nin pakayadiꞌ nin Gugan-gan. Ket sawanin, kanawanawa koynay magkabyay nin mangwaꞌ nin karabayan nan Dios.e Naranod akoyna nin naipasak kona ni Cristo sa kudos banaꞌ ta syay nangalap nin lugar ko. 20 Kanyaꞌ nin amboꞌ akoynayti si mabyay sawanin no kai si Cristo nin mampiikap iti kongko. Ket siti si byay koyna sawanin, bunga yan pagmamatalek ko konan Anak nan Dios nin nangadoꞌ kongko tan nibi nay byay na para kongko. 21 Kai ko nin gawꞌen nin kasan kabalikasan a kamaungan nan Dios kontamo no iyakay ko a amboꞌ nin say panunukid nin Gugan-gan a puon a magꞌin atamon mapteg sa pangingikit nan Dios, ta no mapapteg atamo sa pangingikit nan Dios banaꞌ sa panunukid nin Gugan-gan, kasa edet nin sirbi a nati ya si Cristo.f