Yupaꞌ sa Pagmamatalek ket Risibyen tamoyay Ispirito nan Dios
3
Kalawakaw kamo, siꞌkamo nin taga Galacia! Nadikot rakamo para nin sarain saray mamaritaꞌ a matkap moyon tukiden a Gugan-gan nin mantumbuken ran Judio! Pinasyan palaway nin nibaritaꞌ ko komoyo a maipaꞌkaꞌ sa pipaꞌkaan nin patiti na ni Jesu-Cristo sa kudos. 2 Main tamoꞌ pan sayay bagay a rabay kon matandaan mangibwat komoyo: Narisibi moya para a Ispirito nan Dios banaꞌ sa nipanumbok moyon sain nin Gugan-gan? Syimpri kai, banaꞌ ta si Dios, nibi nayay Ispirito na komoyo banaꞌ tamoꞌ ta narngeꞌ tan timper moyay Mabistan Patandaꞌ. 3 Aninan pageꞌ a kakalawakawan moyo! Nitaranaꞌ moyoy baꞌyon byay moyo sa pakababaꞌ nan Ispirito nan Dios, sukat nin ilaꞌpos moyo yupaꞌ sa pakababaꞌ moyon bukod! 4 Kasa para gapo nin kabalikasan nin say nagꞌin nin pakasariꞌ-sariꞌ moyo banaꞌ sa pammemper moyo? Kasan dwadwa nin main! 5 Si Dios, manꞌipaaluyon nakamo konan Ispirito na tan mampangwaꞌ yan mumilagro komoyo, amboꞌ nin banaꞌ ta mantumbuken moyoy Gugan-gan, no kai banaꞌ ta narngeꞌ tan timper moyay Mabistan Patandaꞌ.6 Kiten tamoya nin alimbawaꞌ si Abraham nin puon min Judio. Mabasa tamo sa Masanton Kasuratan, “Si Abraham, timper nayay Dios, ket banaꞌ sa pagmamatalek na konan Dios, nikwinta nayan mapteg nin Dios.”a 7 Ket siꞌkamo, amingawen moyo a saraytaw saray magmatalek konan Dios a ikwinta na nin puri na ni Abraham. 8 Wanaynan gindat nin Dios sa Masanton Kasuratan a mataman nin saray amboꞌ nin Judio ket ikwinta nasaran mapteg no magmatalek sara kona. Nipatandaan nayaynan gindat sin saytaw et nin Dios a Mabistan Patandaꞌ kona ni Abraham. Wana, “Magꞌin nin puon kan bindisyon ko konran sarban tutawodti sa mundo.”b 9 Banaꞌ ta nagmatalek ya si Abraham konan Dios, binindisyunan nayan Dios. Wanin anamaet, sarba ran magmatalek konan Dios, makakiramaꞌ sara sa saytin bindisyon nan Dios kona ni Abraham.
10 Sara baleꞌ a milalo sa panunumbok ra sa Gugan-gan nin mantumbuken ran Judio, siguradon iti sara sa piligro nin madusa nan Dios ta wanan mabasa tamo sa Masanton Kasuratan,
“Si siꞌnuman a kai nin nanumbok nin pirmi sa sarban matkap nin tukiden nin naisurat sa Libron Gugan-gan, siguradon dusawen naya nin Dios.”c
11 Edet, mapala-palaway a kasa nin siꞌnuman nin mapapteg sa pangingikit nan Dios banaꞌ sa panunumbok nin Gugan-gan ta wanan mabasa tamo sa Masanton Kasuratan:
“Si tawo a naipatukdoꞌ sa pagmamatalek na konan Dios ket mapapteg naya, magkabyay ya nin iti ana konan Dios.”d
12 Baleꞌ say panunukid nin Gugan-gan, kasan kabiangan sa pagmamatalek ta wanin a mabasa tamo sa Masanton Kasuratan. Wana,
“Si mangwaꞌ nin kasa gapo nin kurang nin sarban ipagwaꞌ nin Gugan-gan, mabyay ya nin iti konan Dios nin nipatukdoꞌ sa gawaꞌ na.”e
13 Baleꞌ si Cristo, simbot nakami nin Judio sa pakadusan bunga nin kai mi nin pakatukid sa ipagwaꞌ nin Gugan-gan. Ginwaꞌ na in sin nipadusa ya nin say manepeg kumon nin dusa mi sin nati ya sa kudos. Wanin ta wanan mabasa tamo sa Masanton Kasuratan,
“Dinusa nayan Dios a siꞌnuman nin nati a nakakatin sa kayo.”f
14 Simbot nakami nin Cristo ta pigaw nin say bindisyon a nipangakoꞌ nan Dios kona ni Abraham ket rumateꞌ anamaet konran amboꞌ nin Judio mangibwat konan anak nan si Cristo a Jesus, tan ta pigaw nin siꞌtamon mammemper, banaꞌ sa pagmamatalek tamo ket risibyen tamoyay Ispirito nan Dios nin nipangakoꞌ na.
Si Pangakoꞌ, Kai ya nin Makabiangan nin Gugan-gan
15 Bubsat, main nin sayay alimbawaꞌ nin mampangyadiꞌ sa inawru-awron byay a ibi ko. No nakapipagket saray rway katawo sa sayay bagay ket namirma saran kataratwan nin pammaꞌget ra sa nipagketan ra, kasa gapo nin siꞌnuman a makapanubag o makapanglamoꞌ nin animan konan kataratwan. 16 Wanin anamaet sa nipangakoꞌ nan Dios kona ni Abraham tan konan sayay magꞌin nin puri na. Say Masanton Kasuratan ket manꞌibaritaꞌ, “tan konan puri mo,”g a amboꞌ nin rabay nan irgwen ket abaw nin puri na no kai saya tamoꞌ a siti ket si Cristo. 17 Wanti ey rabay kon ibaritaꞌ:
Si Dios, nangwaꞌ yan pakitarato kona ni Abraham sin nagpangakoꞌ ya kona. Sawanin, aꞌpat a yasot tan tulumpuloꞌ a taon ana yapoꞌ a linmabas baꞌyo na nin nipataoy nin Dios a Gugan-gan.
Kanyaꞌ nin sain nin Gugan-gan ket kai ya nin masubag a nitaratwan tan kai nin mapaed a pakatukid nin nipangakoꞌ nan Dios. 18 No marisibi tamo a rabay nan Dios nin ibi kontamo banaꞌ ta mantukiden tamoy Gugan-gan, amboꞌ edet nin banaꞌ ta nipangakoꞌ na. Baleꞌ, kona ni Abraham, banaꞌ ta nipangakoꞌ nan Dios a bindisyon kanyaꞌ nin nibi na kona.
Ani a Gagara nin Gugan-gan
19 Banaꞌ ta wanin, ani edet a gagara nin Gugan-gan? Say Gugan-gan, nilamoꞌ ta mansumubag a tutawo sa saytaw say nibibilin na konra. Nigagaran magkuri tamoꞌ in anggan rumateꞌ yay naitandaꞌ a puri na ni Abraham, si Cristo a syay nipangakoꞌ nan Dios kona. Naipataoy a Gugan-gan yupaꞌ konran uanghilh nin nibi ra konan si ingkargado tamoꞌ nin niꞌdeng nasaray tutawo konan Dios. 20 Baleꞌ sin nagpangakoꞌ yay Dios kona ni Abraham, kasan siꞌnuman nin tawo a iti sa pisaꞌlean ta bukod na tamoꞌ nin Dios a nagpangakoꞌ.i
21 Kuntra edet kasi a Gugan-gan sa nipangakoꞌ nan Dios? Kai gapo! Wanin ta no main wadiꞌ nin gan-gan a nibi nan Dios nin mangibwat konan siti ket saray tumulok, makagaꞌmor saran anggan-angga nin byay a iti konan Dios, magwaꞌ tamo et edet a magꞌin nin mapteg sa pangingikit nan Dios yupaꞌ sa katutulok konan siin nin gan-gan. 22 Baleꞌ, mabasa tamo sa Masanton Kasuratan a sarba nin tawon ket iti sa pakayadiꞌ nin kasalanan,j ket banaꞌ ta wanin, si nipangakoꞌ nan Dios nin mapamain no magmatalek kona ni Jesu-Cristo ket konran siꞌnuman a mamper yayti nin mapamain.
23 Sa napalabas nin panaon, sin baꞌyo ya nin rinmateꞌ si Cristo a syay mampagmatalkan tamo, say Gugan-gan, baraꞌmon nangipriso kontamo. Baraꞌmon gwardya nin namantay kontamo angga sin si Dios ket nipaꞌkit naytin dalan, say pagmamatalek kona ni Cristo. 24 Ket say Gugan-gan, mairot nin mammaga kontamo nin baraꞌmon atamon aꞌnak. Ginwaꞌ nin Gugan-gan in ta pigaw nin sin rinmateꞌ ya si Cristo,k yupaꞌ sa pagmamatalek tamo kona, ket maikwinta atamon mapteg sa pangingikit nan Dios. 25 Baleꞌ sawanin ta naipatandaan ana kontamo a dalan, say pagmamatalek kona ni Cristo, kasa atamoyna sa pangangasikaso nin Gugan-gan. 26 Ket siꞌkamo manꞌikwinta kamon matuaynan aꞌnak nan Dios mangibwat tamoꞌ sa pagmamatalek moyo konan Cristo a si Jesus. 27 Anaod, sin saytaw sin nipabawtismo kamo banaꞌ sa pammemper moyo kona ni Cristo, nipasaya kamo kona ket baraꞌmon nisket moya si Cristo a say rabay nin irgwen, inarig moyoy pigagawaꞌ na. 28 Ket sawanin, no maipaꞌkaꞌ sa nikaipasaya moyo kona ni Jesu-Cristo, kasaynan pidumawan nin kapapaꞌsar moyo konran Judio tan amboꞌ nin Judio, konran aripen tan konran amboꞌ nin aripen, konran babayi tan lalaki; napasaya kamo ngaꞌmin sa nikaipasaya moyo konan Cristo a si Jesus. 29 Ket banaꞌ ta ikon nakamo ni Cristo, edet puri nakamo ni Abraham tan kiramaꞌ kamon tumawir sa nipangakoꞌ nan Dios kona.