Galacia 4

Wanti ey rabay kon irgwen:

Si anak nin manawir nin kamamain nan ama na, mintras a minor di idad ya et ket baraꞌmon aripen a paꞌsar na abirno nin syay main nin ikon nin say sarba.

2 Wanin ta matkap yan tumulok konran mangngasikaso kona tan sa kamamain na anggan marateꞌ a panaon a nitandaꞌ nan ama na nin pangrisibi nan tawir na. 3 Wanin anamaet kontamon mammemper, sin baraꞌmo atamo et nin aꞌnak a sain ket sin saytaw sin baꞌyo tamo nin naamingaw a peteg nin katutuꞌwan, nagꞌin atamo anamaet nin baraꞌmon aripen nin amboꞌ nin kuston uakay iti sa sangkamundwan^a ta tinumbu-tumbok tamo. 4 Baleꞌ sin narateꞌ a kuston panaon, si Dios, nibakiꞌ nayadti sa lutaꞌ a dirin Anak na. Sitin Anak na ket nagꞌin ya nin tawo nin main nin tawon ina na tan nagkabyay yan iti sa sirong nin Gugan-gan nin mantumbuken ran Judio, 5 ta pigaw nin siꞌkamin iti sa sirong nin sain nin Gugan-gan, ket galten nakami sa pakauray nin sain tan ta pigaw nin siꞌkami ket gawꞌen nakami nin Dios nin aꞌnak na. 6 Ket banaꞌ ta siꞌkamo ket aꞌnak^b nakamon Dios, si Dios nibakiꞌ nayan miikap kontamo a Ispirito na nin iti konan Anak na. Si Ispirito na, syay maninreg kontamo nin tumawag konan Dios nin “Tatay!”^c 7 Ket sawanin, amboꞌ kamoyna nin aripen no kai edet, aꞌnak nakamoyna nin Dios. Anamaet, banaꞌ ta aꞌnak nakamo, ibi na ngaꞌmin komoyo nin Dios a main na para konran aꞌnak na.

Ituka na ni Pablo konran Taga Galacia a Taranaꞌ ran Namper

8 Sin panaon a kai moya et nin peteg nin katandaꞌ a Dios, aripen kamo intaw nin bungat anan mandiosen baleꞌ amboꞌ nin pageꞌ nin Dios. 9 Baleꞌ sawanin ta katandaꞌ moyaynay Dios, nin syay Dios moyo o say rabay kon irgwen, sawanin ta inalilbiꞌ nakamoyna nin Dios nin anak nakamo, sukat ket a rabay moyoy sumubliꞌ sa uakay a kasan kwinta tan kasan magwaan!^d Ambaleꞌ nin rabayen moyon aripenen kamo nin sayti anamanaet? 10 Main nin manngilinen moyo layin awro, bulan, tyimpo, tan taon sa pangngipaꞌkaꞌ moyo a magꞌin kamon mapteg sa pangingikit nan Dios banaꞌ sa sain! 11 Mapaga akon tuloy maipaꞌkaꞌ komoyo ta pinirdi ko tamoꞌ layi a pagal tan udas ko komoyo. 12 Pangingaꞌdo moyo, manꞌaduen kon bubsat, arigen rako maipaꞌkaꞌ sa rilasyon ko sa Gugan-gan. Nagbaliw ako nin bilang sa paꞌsar ran amboꞌ nin Judio nin kasa akoyna sa sirong nin Gugan-gan.

Kasan ginwaꞌ moyon nakadukaꞌ kongko sin saytaw. 13 Bilang tandaꞌ moyo, masakit a nakapꞌunan nin uꞌnan nikapikaꞌ kodsen komoyo. Siin a namin pagkanawanawa kongko nin naiparateꞌ koyay Mabistan Patandaꞌ komoyo. 14 Ket abirno abaw a nagꞌin nin idap moyo kongko banaꞌ sa wanin nin paꞌsar nin karigsawan ko, kai rako nin tinuyaꞌ-tuyaꞌ tan ginurutan. Pinagtuloy rakoyna edet a baraꞌmon sa pammagtuloy moyo sa sayay anghil nan Dios, o baraꞌmon sa pammagtuloy moyo konan Cristo a si Jesus a mismo. 15 Pinasyan ririket moyon nangakoꞌ kongko sin saytaw, ket maibaritaꞌ ko a no magwaꞌ tamoꞌ kumon ket sukiten moyoy mata moyo nin ibi kongko. Adti anaytaw nin nako say gindat nin ririket moyo? 16 Ket sawanin, ipaꞌkaꞌ moyokoyna para nin kaaway moyo banaꞌ ta manꞌibaritaꞌ koy katutuꞌwan?

17 Sarain saray mampamatikoꞌ konan Mabistan Patandaꞌ, baraꞌmon rabay ran tuloy nin paririketen rakamo ta pigaw nin mayi kamo konra baleꞌ si apes ra ket amboꞌ nin para sa kaabigan moyo. Rabay ra tamoꞌ nin iyalis moyoy pya moyo konra ta pigaw nin saray kadanyan moyo. 18 Mabista a kaririktan rakamon tawo basta maong tanay gagara ra, tan laloyna no kai ra tamoꞌ nin gawꞌen no isen ako komoyo. 19 Sa pangangawaꞌnan ko komoyo, aꞌnak koynan diri a pangngikwinta ko komoyo, ket mampangirangep ako anamanaet nin idap nin kapada nin idap a irangep nan sayay mampangingar nin mangabing angga nin maꞌkit a si Cristo ana a peteg nin mampagꞌuray sa byay moyo. 20 Wanin anay pangangapes kon isen ako kumon komoyo ta pigaw nin maipaꞌkit kon peteg a kaingaran ko para komoyo. Magulo nin tuloy a kaisipan ko a kai ko nin tandaꞌ a gawꞌen ko maipaꞌkaꞌ komoyo.

Say Manꞌiritrato ra ni Agar tan Sara

21 Siꞌkamo nin marabay nin paisirong sa Gugan-gan a mantumbuken ran Judio, mangkataros moyo paran pageꞌ a pipaꞌkaan nin iti sa sirong nin sain? 22 Sa Gugan-gan, mabasa tamo a si Abraham ket main nin rwa ray aꞌnak nan lalaki — si saya anak raya ni Agar a sayay aripen, tan si saya et ket anak raya ni Sara a asawa na nin amboꞌ nin aripen.^e 23 Si anak na konan aripen, niinaw tan niyanak ya nin kapadan nikaiyanak ran aꞌnak nin kaꞌbawan, baleꞌ si anak na konan amboꞌ nin aripen, nagkamain ya nin nikatukid nin pangakoꞌ nan Dios kona ni Abraham.

24-25 Sitin tutuon isturya nin maipaꞌkaꞌ konran rway aꞌnak na ni Abraham, main nin ipatarusan nan sayay maalagan katutuꞌwan. Sarain saray rway bubbayi, iꞌdeng ray rway pakitarato nan Dios sa tutawo. Si saya ket si pakitarato nan Dios nin ginwaꞌ nadtaw sa Talugtog nin Sinai sin nibi nay Gugan-gan nan matkap nin tukiden. Kanyaꞌ nin si Agar iꞌdeng nayay Talugtog nin Sinai a itaw sa Arabia tan iritrato nayan lamang a si sawanin a syudad nin Jerusalem banaꞌ ta saray mampiikap itaw tan sarba ra nin tutawon Judio ket baraꞌmo saran aripen sa panunukid ran sain nin Gugan-gan. 26 Baleꞌ si Sara nin amboꞌ nin aripen nin asawa na ni Abraham iꞌdeng naya a Jerusalem itaw sa kamiꞌnan nan Dios a baraꞌmon ina tamoya 27 ta wanin a mabasa tamo sa Masanton Kasuratan. Wana,

“Rumiga tan gumuryaw ka banaꞌ sa ririket,

siꞌkan babayi nin kai manganak ket kai et nin nakairangep nin irab nin mangabing,

ta mas abaw saray aꞌnak mon siꞌka nin linamang dyan si syay kalamoꞌ nan asawa.”^f

28 Edet, banaꞌ ta wanin, bubsat, nagꞌin nakamon aꞌnak nin Dios banaꞌ ta tinukid nay nipangakoꞌ na,^g kapada nan si anak na ni Abraham a si Isaac nin niyanak ya banaꞌ sa nipangakoꞌ nan Dios kona ni Abraham. 29 Sin saytaw nin panaon, pinangirangep naya ni Ismael nin abaw a idap si Isaac. Siti si Ismael, syay anak na ni Abraham a niyanak ya nin kapadan nikaiyanak ran aꞌnak nin kaꞌbawan, tan siti anamaet si Isaac, anak nayan lamang ni Abraham a sya ket niyanak ya yupaꞌ sa pakayadiꞌ nan Ispirito. Wanin anamaet a mampangyadiꞌ sawanin, a siꞌtamo ket mambyan ratamon idap nin sarain saray mangkaaripen sa panunukid ran Gugan-gan. 30 Baleꞌ ani a mabasa tamo sa Masanton Kasuratan? Wana, “Palakwanen may babayin aripen tan si anak na. Siin nin anak nan si babayin aripen, kai ya liꞌ nin kitawir sa no ani liꞌ a tawiren nan anak nan babayin amboꞌ nin aripen.”^h. 31 Maꞌkit moyo edet, bubsat, a kapada tamo saray aꞌnak nan babayin amboꞌ nin aripen, amboꞌ nin saray aꞌnak nan babayin aripen.