5
Ginwaꞌ natamon main nin pagkanawanawa ni Cristo tan rabay nan magpirmi atamon main nin pagkanawanawa. Edet, ipamuspusan tamo nin siꞌtamon main ana nin pagkanawanawa a magnayon atamon main nin pagkanawanawa tan andiꞌ atamo nin umaburoy nin magꞌin anamanaet nin aripen.Andiꞌ tamo nin Sublien a Gindat nin Kapapaꞌsar tamo
2 Tandaan moyoytin irgo ko:
Siꞌko a si Pablo anan mismo a mamaritaꞌ komoyo a no paturiꞌ kamo ta pigaw nin mapapteg kamo sa pangingikit nan Dios, edet say patiti ni Cristo ket kasa nin kaalagawan komoyo. 3 Ibaritaꞌ ko anamanaet a si siꞌnuman a umaburoy nin maturiꞌ, kapilitan nin tukiden na a intiron Gugan-gan.
4 Sarain saray mampanumog a mapapteg sara sa pangingikit nan Dios yupaꞌ sa panunukid ran Gugan-gan, inanggawan raynay nikaipasaya ra kona ni Cristo. Linakwanan raynay kamaungan nan Dios konra. 5 Baleꞌ siꞌkami, mangibwat sa pagmamatalek mi kona tan sa panunulong nan Ispirito na, mantagaꞌnan mi nin siiilalo a masibulot nin pammapteg na komi nin Dios. 6 Ket no naipasaya atamoyna konan Cristo a si Jesus, kai nayna nin tikapen nin Dios a turiꞌ atamo o kai. Say matkap tamoꞌ ket magmatalek atamo konan Cristo nin maipaꞌkit tamo sa pangangadoꞌ konran kapada tamon tawo.
7 Sin saytaw, matetek moyon mantumbuken a tutuon akay. Siꞌnoy nakapaed komoyo nin manumbok sa katutuꞌwan maipaꞌkaꞌ konan Dios? 8 Sain say nikapaed moyo nin tumumbok sa tutuon akay, amboꞌ na nin gawaꞌ in nin Dios a syay nanagyat komoyo. 9 Sain say bulaꞌ-bulaꞌ nin akay ra komoyo ket bilang sa wanran magꞌirgo a “Say daiteꞌ tamoꞌ nin pammakboa pakbwen nay intiron minasa.” 10 Wanin man, banaꞌ ta naikalamoꞌ atamo ngaꞌmin konan Uunuren, matalek akon lamang a kai nin manili a pangingikit moyo sa niyakay ko komoyo. Ket sara in saray mampanglingo komoyo, siꞌno sara man, dusawen nasara liꞌ nin Dios. 11 Bubsat, main saray mampamaritaꞌ a manꞌipatandaꞌ ko et kano a main nin pakatkapan nin pakaturiꞌ sa pakaisalba. No wanin, ambaleꞌ edet a mangkapadya-padyaꞌdyaꞌ ako et? No manꞌipatandaꞌ ko in, kai sarayna kumon nin mangsaꞌ banaꞌ ta kai ko nin maipatandaan a say pakaisalba ket yupaꞌ tamoꞌ sa pipaꞌkaan nin patiti na ni Cristo sa kudos. 12 Kai sara tamoꞌ kumon nin paturiꞌ in saray mampanglingo komoyo no kai pakapon sarayna!
Magkabyay nin Main nin Pagkanawanawa
13 Bubsat, si Dios, ginwaꞌ nakamon main nin pagkanawanawa ket amboꞌ kamoyna nin iti sa sirong nin pagꞌuuray nin Gugan-gan. Wanin man, kai nin rabay nin irgwen a main nin pagkanawanawa tamon wanin ta pigaw nin gawꞌen tamoy bungat anan kadukaan a kaririktan nan lalaman tamo. Kuntra sa wanin, magsirbi kamo nin main nin pangangadoꞌ sa saya tan saya. 14 Say sarban Gugan-gan ket matukid ana ngaꞌmin sa panunukid konan sayan-saya tamoꞌ nin gan-gan a wana: “Aduen moy kapada mon tawo nin kapada nin pangangadoꞌ mo sa lalaman mon diri.”b 15 Baleꞌ, no imbis nin mikawaꞌnanan kamo ket mipasakitan tan mampiꞌpusan kamo, manꞌipau-pauꞌna koyna komoyo, say pipapasaya moyo ket masidaꞌ nin liso.
16 Siti a ibaritaꞌ ko komoyo:
Magkabyay kamon maitukoy sa wanan Ispirito nan Dios, sa wanin, kai moyo nin gawꞌen a karabayan tamoꞌ nin kadiryan moyo.
17 Anaod, say kaririktan nin lalaman tamon diri ket swawiꞌ sa apes nan Ispirito nan Dios, tan say apes nan Ispirito na ket swawiꞌ sa kaririktan nin lalaman tamon diri. Saytin rwa ket mikuntra a say rabay nin irgwen, banaꞌ ta si Ispirito nan Dios ket syay mampangipalalako nin byay tamo, edet kai tamo nin magwaꞌ a rabay nin lalaman tamon diri tamoꞌ. 18 Ket no iti kamo sa pangangantabay nan Ispirito nan Dios, kasa kamoyna sa sirong nin pakauray nin Gugan-gan.
19 Bilang wadiꞌ, mapala-palaway nin maꞌkit no sunuren moyoy abas a kaririktan moyon bukod ta no wanin ket sayti a gawaꞌ-gawaꞌ moyo: pirararay ran amboꞌ nin mitraasawa, nikasamaꞌ a kabibyay, kasan dangkaꞌ nin panunumbok sa karabayan nan lalaman, 20 pangrarayon dios-dios, pangangamod, piguguraan tan pilalaban, imon tan sager, nagsi-nagsi, pigugrupu-grupo, 21 tan imbel, pipabok, kasan dangkaꞌ nin piririga, tan raruma et nin wanin a gawaꞌ. Pauꞌna-uꞌnawan katamo anamanaet sawanin kapadan nipamau-pauꞌna koyna komoyo sin saytaw: Saray main nin wantin kabibyay, kai naya nin ipaikon konra nin Dios a Pagꞌadian na.
22 Baleꞌ no iti kamo sa pangangantabay nan Ispirito nan Dios, si Ispirito na pangibwaten na komoyo a wanti e nin kabibyay: magꞌin kamon maadoꞌ sa kapada moyon tawo, pirmi kamon maririket, makakituno kamo sa kapada moyon tawo, magꞌin kamon mapangitpel, magꞌin nin mabistay piuugaliꞌ moyo, magꞌin nin mapamami kamo, magꞌin kamon mapagmatalkan ran kapada moyon tawo, 23 magꞌin kamon mauyamoꞌ konran raruma, tan magꞌin nin mapagdangkaꞌ kamo sa lalaman moyon diri. No wanin a kabibyay, kasan animan nin gan-gan nin masubag.
24 Sawanin, saray iti konan Cristo a si Jesus, ginurutan raynay sarban dukaꞌ a uapes nin say sarban dukaꞌ a awit nin pagꞌin ran tawo nin bilang pinati rayna, ket kai ana in nin magꞌuray konra. 25 Ket banaꞌ ta si Ispirito nan Dios, binyan natamon baꞌyon klasi nin byay, matkap a tumulok atamo kona sa pangipatyuan na kontamo. 26 Andiꞌ atamo nin rumangas, tan andiꞌ atamo nin mipataꞌgay, o miimbelan sa saya tan saya.