Say Karambar nin Pagkamain nin Pagkanawanawa
6
Bubsat, no main nin saya komoyo a masita nin mampagkasalanan, matkap nin siuuyamoꞌ rayan tulungan nin mangikuston kabibyay na nin sarain saray mangkilalako konan Ispirito nan Dios. Siꞌkamo anamaet baleꞌ, ilagen nin barang saya komoyo a lalaman na ta bangliꞌ no maayat kamo anamaet nin mangwaꞌ nin kasalanan. 2 Pitanggunan moyoy mambalatayen nin barang saya komoyo, ket no wanin mantukiden moyay nigan-gan na ni Cristo.a 3 Si mangipaꞌkaꞌ a saya-saya ya, manluku-lukwen na tamoꞌ a lalaman na ta say katutuꞌwan ket kasa nin mairangas na. 4 Kikiten nin maong nin barang saya komoyo a pigagawaꞌ na tan timbangen na no matunong o makapoy. No matunong, main nin rason nan rumiriket. Baleꞌ andiꞌ na nin timbangen a nagwaan na sa pangingiyarig na sa nagwaan ran raruman tawo. 5 Anaod, say barang saya kontamo ket main nin ubatan nan awiten na tamoꞌ nin bukod.6 Si sayay manꞌiyakay maipaꞌkaꞌ sa pammemper, matkap a itao naya a mampangyakay kona sa sarban mabistan kamamain na.
7 Andiꞌ moyo nin lingwen a lalaman moyo; kai ya nin maluku-luko a Dios. Bilang sa no ani a imula nan sayay tawo, saytaw a yataben na anamaet. 8 Kapada a no si sayay tawo say gawꞌen na ket say papdaen na a kaririktan nan lalaman nan diri, bilang nin mampangmula yan dukaꞌ tan say yataben na ket patiti. Baleꞌ no mangmula yan mabista a say iyakay nan si Ispirito nan Dios, siin nin tawo ket mangyatab yan anggan-angga nin byay a iti konan Dios nin mangibwat konan Ispirito nan Dios. 9 Edet, andiꞌ atamo nin sumawaꞌ nin gumwaꞌ nin kaabigan ta no ituloy tamoy gumwaꞌ, rumateꞌ liꞌ a awron mangyatab atamon mabistan gun-guna. 10 Kanyaꞌ nin antaran iti a pagkanawanawa kontamo, gumwaꞌ atamon kaabigan sa sarban tawo, baleꞌ lalun-laloyna konran kalalamoꞌ tamon mammemper.
Masusuyot a Pammatalad na ni Pablo konran Taga Galacia
11 Konan siti anan parti nan surat, siꞌko nin si Pablo anan mismo a mampanurat. Maꞌkit moyon inalalaki koy surat ko.
12 Sarain saray mampamasuet komoyo nin paturiꞌ, apes ra a magꞌin nin maong sa pangingikit ran tutawo. Man-gawꞌen ra in sa tana a makapalꞌis sara sa pakapadyaꞌdyaꞌ banaꞌ ta padyaꞌdyaen rasara nin kapada ran Judio no iyakay ray kaalagawan nin patiti na ni Cristo sa kudos. 13 Mataman nin sarain saray nipaturiꞌ nin sigon sa Gugan-gan, kai ran lamang nin mantukiden in nin Gugan-gan. Rabay ra tamoꞌ nin paturiꞌ kamo ta pigaw nin maiparayo ra nin naꞌwit rakamo. 14 Baleꞌ siꞌko, kai ako nin mipara-parayo sa wanin. Say kal-la nin maiparayo kon ibari-baritaꞌ ket say pipaꞌkaan nin patiti na ni Uunuren tamon Jesu-Cristo sa kudos ta sa patiti na ni Cristo sa kudos, nati anan naꞌteng a pangangapes ko sa makaayat a bubagay iti sa mundo, tan nati ana anamaet nin naꞌteng a pangangayat nin sain nin bubagay kongko. 15 Amboꞌ nin maalaga no naturiꞌ yay sayay tawo o kai; say maalaga ket say maparsa nayan uman nin Dios, a say pitatawo nan tawo ket masilyan. 16 Sarba ran saray magkabyay sa sain nin akay, byan nasara kumon nin katinekan tan kaꞌdwan nasara kumon nin Dios. Wanin anamaet kumon konran sarba ran tutawo nan Dios.
17 Wanti tana. Ket mangibwat sawanin, kasayna kumon nin siꞌnuman nin mangulo, banaꞌ ta say bigat sa lalaman ko nin mangibwat sa pammadyaꞌdyaꞌ a nirangep ko banaꞌ sa katutulok ko kona ni Cristo ket ipaꞌkit a aripen nako. 18 Sapa kumon, bubsat, ta rumateꞌ komoyo ngaꞌmin a bindisyon na ni Uunuren tamon Jesu-Cristo.
Peteg a wanin kumon.