Matkap ran Usisaen nin taga Corinto a Kadiryan ra
13
Pitlo anayti a mako akodsen komoyo. Ket sumadyaꞌ kamo! Panemtemen moyoy mabasa sa Masanton Kasuratan a wana nin siti,“Animan a irgu-irgo, matkap a patutuꞌwan ran no amboꞌ nin tulo ra, rwa ray tistigos.”a
2 Sin pirwa ko nin nakodsen komoyo, pinau-pauꞌnawan kosarayna in saray man-gumwa-gumwaꞌ nin dukaꞌ tan siꞌnuman et nin nagkasalanan, a no kai ra nin gurutan ana in say dukaꞌ a pigagawaꞌ ra, pakandaꞌ sara liꞌ no sumubliꞌ ako. Sawanin, mintras nin kasa akodsen et, ibaritaꞌ ko in anamanaet konra tan sa sarba moyo. No rumateꞌ akodsen liꞌ, dusawen ta dusawen kosara no kai sara et nin nagbabawiꞌ. 3 Ket sain liꞌ nin gawꞌen ko, sain a pammatutuo nin mantikapen moyo a mampagꞌirgo ya si Cristo nin iti kongko. Patutuꞌwan na in ni Cristo ta makapangyayadiꞌ ya sa byay moyo ta amboꞌ nin kasan pakababaꞌ na nin gawꞌen a manepeg maipaꞌkaꞌ komoyo. 4 Pageꞌ, naipasak yan mati sa kudos si Cristo banaꞌ ta baraꞌmon makapoy ya. Wanin man anaod, banaꞌ sa pakayadiꞌ nan Dios ket mangkabyay yayna sawanin! Siꞌkami anamaet nin lamang, ta naipasaya kami kona ni Cristo, ket makapoy kami maipaꞌkaꞌ komoyo. Wanin man, mangkiramaꞌ kami anamaet sa pakayadiꞌ nan Dios nin iti sa byay na ni Cristo, ket usaren mi a maibagay komoyo.
5 Siꞌkamon diri adalen moyo no pageꞌ a mampagmatalek kamo kona ni Cristo. Usisaen moyon maong a lalaman moyon diri. Pihon maalilbiꞌ moyo a si Jesu-Cristo ket isen ya komoyo; pwira no parawpaw a pammemper moyo ket kai kamo nin maikanaꞌ sa pangingikit na ni Cristo. 6 Ilalwan ko anaod nin naalilbiꞌ moyo a si Cristo ket iti yayna komi.
7 Manꞌidasal mi lawas konan Dios a andiꞌ kamoyna nin mangwaꞌ nin dukaꞌ. Manꞌidasal mi in amboꞌ nin ta pigaw nin maalilbiꞌ a iti komi a pakayadiꞌ na ni Cristo no kai edet, ta pigaw nin say matunong a gawꞌen moyo, abirno kai mi nin maipaꞌkit a tutuon minsahiro nakami ni Cristo. 8 Anaod, kasa gapon kapangyadian min kuntrawen a animan nin maitukoy sa katutuꞌwan. Ana edet, si kal-la nin nipagwaꞌ komi ket si magsirbi para sa katutuꞌwan. 9 Ket, maririket kami no pakandaen moyo a pigagawaꞌ moyo ket kai mi ana nin ipaꞌkit a pakayadiꞌ mi komoyo. Siti e a manꞌidasal-dasal mi, a ituluy-tuloy moyo kumon nin pakandaen a pigagawaꞌ moyo. 10 Edet manꞌisurat koyti komoyo mintras a kasa akodsen et ta pigaw nin no isen akoyna liꞌ ket kai koyna kumon nin matkap a manusa et nin mabyat mangibwat sa pakayadiꞌ nin nibi na kongko ni Jesu-Cristo nin mismo, a syay Uunuren tamo. Say gagara nin nipamin saytin pakayadiꞌ mi ket say pammagsen nin pagmamatalek moyo kona ni Cristo, amboꞌ nin say paninidaꞌ.
Bindisyunan nasara ni Pablo
11 Ket sawanin, bubsat, wanti tana a ibaritaꞌ ko komoyo: Rumiriket kamo; pakandaen moyoy pigagawaꞌ moyo; paksawen moyoy nakem moyo; mipapasaya kamo; tan mitutuno kamo ket si Dios a syay adoꞌ tan syay puon nin pitutuno, miikap ya komoyo. 12 Mikumustawan kamo nin mangipaꞌkit nin pangangadoꞌ moyo sa saya tan saya bilang tutawo nan Dios. Mampakumustawen rakamo nin sarba ran tutawo nan Dios iti.
13 Rumateꞌ kumon komoyo ngaꞌmin a bindisyon na ni Uunuren tamon si Jesu-Cristo, say pangangadoꞌ nan Dios, tan a mauksoy a pikakalamoꞌ moyo mangibwat sa piikap na komoyo nin Ispirito na.