2 Main nin katandaꞌ^a ko nin sayay tawo na ni Cristo a labinꞌaꞌpat a taon ana a linmabas, nakarateꞌ ya sa sangkataꞌgayan nin langit a mampiikapan nan Dios. Kai ko nin tandaꞌ no silalaman ya nin rinmateꞌ itaw o kai; si Dios tamoꞌ a makatandaꞌ. 3 Si kal-la tandaꞌ ko tamoꞌ ket si niꞌras yadtaw sa pinasyan andaꞌ nin lugar nan Dios tan ibaritaꞌ ko anamanaet a kai ko nin tandaꞌ no silalaman ya o kai; si Dios tamoꞌ a makatandaꞌ nin siin. 4 Ket itaw, main nin narngeꞌ nan kai nin maibusngaw no ani sa susaritaꞌ iti sa mundo tan kai nin maaburuyan nin ibaritaꞌ nin tawo tamoꞌ. 5 Ket no maipaꞌkaꞌ konan siin nin tawo magwaꞌ kon iparayo baleꞌ kai ako nin mirayo maipaꞌkaꞌ kongko, no kai ana edet sa bubagay nin mangipaꞌkit a kasa nin pakababaꞌ ko. 6 No gagarawen ko a mirayo, kai moyo nin maibaritaꞌ a kalawakaw ako ta tutuo a ibari-baritaꞌ ko. Baleꞌ manꞌilagen ko ta say rabay ko ket ipatukdoꞌ ran tutawo a pangingikit ra kongko sa naꞌkit ran pigagawaꞌ ko tan sa narngeꞌ ra nin uakay ko, 7 amboꞌ sa sain say makapakaꞌngap a tuloy nin nipaꞌkit tan nipatandaan kongko.

Ket ta pigaw nin kai ako nin magmamalaki banaꞌ sa sain, nagkamain yayti si mampamaidap^b kongko. Baraꞌmo yan diwi nin manꞌisurut-surot na ni Satanas sa lalaman ko. Nibi yayti kongko ta pigaw nin kai ako nin magmamalaki. 8 Nitlo kon nidasal nin dinawat konan Catawan a galten naya, 9 baleꞌ wanti a niꞌbat na kongko, “Sadag ana a tulungan taka. Wanin ta no kaꞌno nin kasan pakababaꞌ nan sayay tawo, saytaw nin magkuri nin peteg a alakin pakayadiꞌ ko.” Banaꞌ sa wanin a niꞌbat nan Catawan, maririket akoyna edet nin mangirangas nin kakapuyan ko ta pigaw nin malipos akon pakayadiꞌ na ni Cristo. 10 Edet, maririket ako nin kasa nin pakababaꞌ ko, nin mamuda-muda ako, nin mapaidap ako, nin maduksa-duksaꞌ ako, tan mangirangep ako banaꞌ kona ni Cristo ta tandaꞌ kon no kaꞌno nin kasan pakababaꞌ ko, no saytaw nin diri, alaki a pakayadiꞌ nin iti kongko.

11 Nagꞌin ako nin baraꞌmon kalawakaw banaꞌ sa pirarayo ko, baleꞌ pinasuet moyoko. Siꞌkamoy matkap kumon nin nangitandudoꞌ kongko konran tutawo ta, kai rako gapo anamaet nin ibatiꞌ nin sarain nin sangkaungan kanon apostoles. Wanin anaod mataman no main saray wanra ket amboꞌ ako gapon impurtanti. 12 Anaod, sin isen ako sin saytaw komoyo, say ginwa-ginwaꞌ anadsen komoyo nin siaanos, sain a mamatutuo a si sayay tawo ket apostol naya ni Cristo. Main nin makapakaꞌngap nin pupakaꞌkitan tan nangya-nangyadiꞌ tan mumilagro. 13 Sa ginwa-ginwaꞌ ko sa dudupong ran mammemper sa raruma nin lulugar, adti kamo ket nin naumli? Kasa, no kai si kai ako gapo nin naningkap nin ikabyay ko mangibwat komoyo nin taga Corinto! Abas para in a nagwaꞌ ko komoyo? Sapa ta ingangaꞌdwen rako nin pirdunawen konan siin nin grabi nin abas ko!

14 Ket sawanin, mampagpripara akoyna sa ikatlo nin kappako kodsen komoyo, tan bilang sin linmabas ana nin nipako kodsen, kai ako gapo anamanaet nin maningkap nin animan komoyo ta amboꞌ a kwarta moyo a matkap ko no kai siꞌkamo. Bilang tandaꞌ moyo, amboꞌ nin saray aꞌnak a manepeg nin maninep para konran matua no kai saray matua a manepeg nin maninep para konran aꞌnak, ket wanin anamaet kongko a pinakaama moyo sa pammemper. 15 Alakin tuloy a ririket ko nin ikanaꞌ ngaꞌmin para sa ikaabig nin byay moyo nin iti kona ni Cristo, a sarba nin main tan pakababaꞌ ko. Ket sa sain nin manꞌipaꞌki-paꞌkit ko a kawaꞌnan katamo ket, ambaleꞌ edet sawanin a baraꞌmo nin mangkaglat a pangangawaꞌnan moyo kongko?

16 Magwaꞌ a main nin mampamaritaꞌ a wanra, “Oꞌ, sigi, wanin ana; kai na nin tiningkap a nikabyay na sa siꞌnuman komoyo. Baleꞌ masirib ya tan mantaktikawen nakamo tamoꞌ.” 17 No tepren moyo in, ibaritaꞌ moyo no paꞌno katamo nin nataktika. Linuko katamo para nin inusar kosaray kalalamoꞌ ko nin nibakiꞌ kodsen komoyo? 18 Siꞌkoy nanawat kona ni Tito nin mako yadsen tan nipalalamoꞌ koya sa sayay busat. Maibaritaꞌ moyo para nin linuko nakamo ni Tito? Kai moyo nin maibaritaꞌ a wanin. Mapala-palaway nin maꞌkit a napasayay kimey tan mabista nin gagara mi ni Tito.

19 Magwaꞌ a manꞌipaꞌkaꞌ moyo nin sa sarban saytin manꞌibaritaꞌ mi ket mampagdipinsa kami tamoꞌ. Tistigos miyay Dios a amboꞌ gapo nin wanin a rason mi, tan a mampagꞌirgo kami komoyo nin kumpruntado sa karabayan na ni Cristo. Ta pigaw nin gumsen a pammemper moyo, mampablyen kon bubsat, siti a rason no ambaleꞌ nin manꞌibaritaꞌ mi ti komoyo. 20 Anaod, manꞌaringapngapen ko a bangliꞌ no rumateꞌ akodsen ket marateꞌ ko et a kai ko nin rabay nin pigagawaꞌ moyo. Ket no wanin, kai moyo liꞌ anamaet nin rabayen a pananager ko no wadiꞌ a main nin marateꞌ ko nin piaaway, piimbelan, pisasageran, pisisibletan, pisisidaan, pitsitsismisan, pipapataꞌgayan, tan kasan uksoy. 21 Manꞌumaburido ako anaod banaꞌ ta bangliꞌ no rumateꞌ akodsen, si Dios nin nangibakiꞌ kongko ket aburuyan na a madingꞌeyan ako anamanaet banaꞌ komoyo. Ket gumereng ako nin tuloy banaꞌ konran sara in saray nagkasalanan sin saytaw et nin kai ra et nagbabawian, bilang say nikasamaꞌ a gugawaꞌ ra tan say pirararay ran amboꞌ nin mitraasawa tan say inaayep a gawaꞌ-gawaꞌ ra.