Pagawan na ni Pablo a Kai sara nin Maisyay konan Cristo a Mammemper
11
Anusan rako et pa no baraꞌmon kinakalawakaw a ibaritaꞌ ko komoyo, kapada a manꞌanusan rakoyna, 2 banaꞌ ta mapaga akon tuloy komoyo kapada nin paga nan Dios komoyo. Baraꞌmo kamon birhin nin balasang a nitarato kon ipakasal konan sayan-saya tamoꞌ nin lalaki, si Cristo, tan apes kon iyagwang katamo kona nin kasa gapon mansa. 3 Mapaga ako komoyo ta bangliꞌ no masamal ran raruma a kaisipan moyo ket masidaꞌ a masibulot tan kasan mansan katutulok moyo kona ni Cristo, nin kapada nin nikalingo na ni Evaa yupaꞌ sa mabista nin susaritaꞌ nan mampibulaꞌ-bulaꞌ nin ulay a sya si Satanas. 4 Aburido ako komoyo ta siririket moyo saran rengꞌen a makodsen nin mangipatandaꞌ nin maipaꞌkaꞌ kona ni Jesus nin sakalako sa nipatandaꞌ mi komoyo. Ket mangakoꞌ kamo et nin ispirito nin naiduma konan Ispirito nan Dios a gindat nin inakoꞌ moyoyna. Anaod akuen moya nin siririket a kano wadiꞌ nin mabistan patandaꞌ baleꞌ naiduma ya kona nin Mabistan Patandaꞌ a inakoꞌ moyo. Sukat a kunsintyen moyo sara!5 Anaod, sa wangko, kai rako gapo nin ibatiꞌ nin sarain nin kano wadiꞌ a sangkaungan nin apostoles! 6 Mataman wadiꞌ nin amboꞌ ako nin maong nin magꞌirgo, kai anamaet nin kurang a pakatandaꞌ ko maipaꞌkaꞌ sa man-gawꞌen nan Dios. Nipaꞌkit mi ana in komoyo sin saytaw et sa sarban udas tan sa sarban kapapaꞌsar.
7 Banaꞌ ta nipatandaꞌ koya komoyo a Mabistan Patandaꞌ nin nangibwat konan Dios, a kai ako gapo nin naningkap ni sintabos komoyo, ipaꞌkaꞌ moyoyna para nin amboꞌ nin maalaga a ginwaꞌ ko? Pinaayupaꞌ koy lalaman kon diri ta pigaw nin maitandudoꞌ kamo sa adapan nan Dios. Abas para a ginwaꞌ ko komoyo? 8 Baraꞌmon tinakawan kosaray raruman dudupong nin mammemper ta inaburuyan kon sinupurtawan rako sa tanay makapagsirbi ako nin libri komoyo. 9 Anamaet, sin nagkurang ako sa matka-matkap ko leleg kodsen komoyo, kai katamo gapo nin minulistya ta saray bubsat nin taga Macedonia ket nirateꞌ ra a ngaꞌmin nin matkap ko.b Kapadan kai ko nin nipaningkap komoyo nin ikabyay ko sin saytaw, kai ako gapo nin maningkap komoyo nin animan anggan makaꞌnuman. 10 Kapada katutuo sa nipaꞌkit na kontamo ni Cristo a ibaritaꞌ ko a kasa gapo nin makasidaꞌ sa pangingipasirayo kon kai ako gapo nin nangawang nin sustinto nin mangibwat sa siꞌnuman isen sa intiron Acaya. 11 Ket sawanin, manꞌipaꞌkaꞌ moyoyna para nin ginwaꞌ ko in banaꞌ ta kai katamo nin kawaꞌnan? Tandaꞌ nan Dios, kawaꞌnan katamo!
12 Tarigꞌenan ko a kai ako gapo nin maningkap nin animan komoyo ta pigaw nin kasan puon ran mangibaritaꞌ nin sarain saray mipaong kano wadiꞌ a tutuon apostoles nasara ni Cristo a pariho a dalan nin pagsisirbi ra sa pagsisirbi mi. 13 Amboꞌ nasara in nin tutuon apostoles ni Cristo, no kai manꞌulaw-ulawen rakamo tamoꞌ banaꞌ sa man-gawꞌen ra tan sa piwadiꞌ-wadiꞌ ran mapteg nin apostoles na ni Cristo. 14 Kai in sukat nin pakaꞌngapan ta mataman nin si Satanas ket makapirupa ya nin baraꞌmon sayan maslag a anghil nan Dios. 15 Kanyaꞌ nin andiꞌ atamo nin makaꞌngap no pati saray tutawon mantumulok kona ni Satanas ket makapagwadiꞌ-wadiꞌ sara nin mangingitandudoꞌ nin no ani a mapteg. Baleꞌ sa awro liꞌ nin mangukom yay Dios, madusa sara liꞌ nin kadmang nin dukaꞌ a gugawaꞌ ra.
Say Pirarayo na ni Pablo Maipaꞌkaꞌ sa Kakapuyan na
16 Ibaritaꞌ ko anamaet, kasa kumon komoyo a mangipaꞌkaꞌ a mangkumalawakaw ako banaꞌ sa ibaritaꞌ ko maipaꞌkaꞌ sa lalaman kon diri. Baleꞌ no wanin a pangngipaꞌkaꞌ moyo kongko, anusan rako tana pa ta pigaw nin makapirayo ako anamaet nin bugaꞌ. 17 Sayti say pangibari-baritaꞌ ko nin maipaꞌkaꞌ sa lalaman kon diri ket amboꞌ nan uso nin gawꞌen nin sayay aripen na nin Uunuren, no kai mampirayo ako nin baraꞌmon tawon kalawakaw. 18 Baleꞌ banaꞌ ta abaw saray mirayo a no siꞌno sara tan no ani a nagwaan ra, raywen ko anamaet a lalaman kon diri, 19 tutal, maanusan moya man a tawon kalawakaw banaꞌ ta mauutek kamo anaod! 20 Wanin ta maaburuyan moyon aripenen rakamo nin sarain a tawo, o pakabyayan rakamo, o itangay ray kayadian moyo, o pagꞌadi-adian rakamo, o padi-padingꞌeyan rakamo! Wanin anamain a rabay moyo! Say matpel! 21 Ket siꞌko, maididingꞌey ako! Takrot kami salo nin mangwaꞌ nin sain!
Baleꞌ anaod ta matpel sara nin mirayo, maitpel ko anamaet a mirayo. Kakalawakawan tamoꞌ ti, baleꞌ mirayo akoynan lamang! 22 Ipangaya ray nikaHebreo ra, Hebreo ako anamaet baleꞌ. Ipangaya ran Israelita sara sa sarban bagay. Wanin ako anamaet baleꞌ a lamang! Ipangaya ran tawiren ray nipangakoꞌ kona ni Abraham. Wanin ko anamaet a lamang! 23 Ibaritaꞌ ra a mampagsirbi sara kano kona ni Cristo. Baleꞌ, tutuo in man, siꞌko a mas makapamaritaꞌ a mampagsirbi ako kona ni Cristo. (Baraꞌmo akon luang sa pirarayo ko nin wanti.) Mas a pagtatrabaho ko; mas abaw a parso akoyna nin napriso banaꞌ sa pangingipatandaꞌ ko konan Mabistan Patandaꞌ; mas kai ana nin mabilang a nikasasakit-sasakit ko; tan niꞌnu-niꞌno akoyna nin dandani nin napati. 24 Nilima rakoyna nin nasanet nin mitulumpuloꞌ tan syamc nin saray pupangulo ran Judio. 25 Nitlo rakoyna nin ginaruti nin saray taga Roma. Niꞌsayna nin nipaꞌkaꞌ a nati akoynan nakudas-kudas nin bato. Nitluyna nin linumdeg a bapor nin rinuranan ko tan nasariꞌ koyna a nikakaawro tan nikakayabi nin kutaw-kutaw sa taaw. 26 Sa pirmi nin pako ko sa raruma nin lugar, abaw anay piligro nin linasat ko sa kariripay ko sa uilog, sa nikasnaꞌ ko nin tulisan, sa gawaꞌ ran kapada ko nin Judio tan ran amboꞌ nin Judio nin kuntra kongko. Wanin a lamang itaw sa alalakin bubabali tan sa lulugar a amboꞌ nin matawo, tan sa taaw tan sa gawaꞌ ran miwadiꞌ-wadiꞌ a kapada saran mammemper. 27 Namaturoꞌ akon saynget ko nin nagtrabaho. Abaw a yabin kai ako nin naꞌlek, tan nabitil-bitilan tan nalataꞌ-lataan ako. Main nin udas a kai ako nin nangan tan narayꞌe-rayꞌepan ako ta kurang a seket ko tan kasan mapiikapan ko.
28 Anamaet, pwira anay raruma et a nangyadiꞌ, main nin mabyat nin tuloy a manꞌawiten kon inawru-awro; say mapaga ako maipaꞌkaꞌ sa dudupong ran mammemper sa saka-sakalako nin lugar. 29 Anaod, no main nin matandaan ko nin say pammemper na ket makapoy et, mapaga ako nin kiingar ako kona sa sain nin kakapuyan na tan no main nin naayat nin nabarang sa dalan, wanin anay sager ko konan si nangayat kona.
30-31 Si Dios tan Ama na ni Uunuren a Jesus, a sya a raywen anggan-angga, tandaꞌ na a sa sain nin manꞌibaritaꞌ ko ket kai ako nin mampibulaꞌ-bulaꞌ. Kai ko nin rabay a mirayo, baleꞌ no kapilitan, mirayo ako maipaꞌkaꞌ baleꞌ sa dinalan-dalanan ko nin mangipaꞌkit a kasa nin mababaꞌ ko.
32 Bilang konan siti anaod e nin nangyadiꞌ kongko sin itaw ako sa syudad nin Damasco. Si tinudoꞌ nan gubirnador itaw ni Adiꞌ Aretas nipagwardyawan na ngaꞌmin a purta nin padil nan syudad ta pigaw nin dakpen rako. 33 Baleꞌ main nin tutawo nin tinmulong kongko a nisakoꞌ rako tan niuyꞌoy rako nin mamaliwaꞌ sa dudungawan sa padil kanyaꞌ nin nalibri ako.d.