Say Pangingikusto na ni Pablo nin say Maipaꞌkaꞌ sa Nipagwaꞌ kona
10
Sawanin siꞌkon dirin si Pablo, main pa nin ipaingangaꞌdo ko komoyo. Matpel ako tamoꞌ kano sa surat no adayoꞌ ako, baleꞌ masalak ako no kaadap katamo. Ket dawaten ko anaod komoyo sa kaayupaan nin nakem tan pammasinsya na ni Cristo nin mampagtrabaho iti kongko, 2 andiꞌ kamo nin mangwaꞌ nin pangibwatan ko nin makapagꞌirgo liꞌ nin mabyat komoyo no mako akodsen ta talaga nin makarngeꞌ sara kongko in saray mampangibaritaꞌ a mampagkabyay kami nin kapada tamoꞌ a lamang nin siꞌno tamoꞌ nin tawo. 3 Tutuo nin siꞌkami ket tawo kami tamoꞌ baleꞌ amboꞌ nin pakababaꞌ nin tawo a manꞌusaren min kilaban sa sarban kuntra konan Dios. 4 Ket, say armas mi, amboꞌ a armas nin main sa tawo no kai edet, armas nin main a pakayadiꞌ nan Dios, ket sidaen a animan nin magsen nin ibangen nan kalaban nan Dios. 5 Talwen mi in say pilusupya tan uakay ran saray tutawo nin mipataꞌgay nin makabangen sa pakaalilbiꞌ konan Dios; manꞌipatunong mi a sarban manꞌisipen ra ta pigaw nin say pangingisip ra ket maitukoy sa karabayan na ni Cristo. 6 Ket, liꞌ no tandaꞌ mi ana a mantumulok kamoynan liso sa gan-gan na ni Cristo, dusawen misarayna a siꞌnuman nin kai et nin mantumulok.7 Sayti e ket mapala-palaway nin maꞌkit kanyaꞌ nin matkap ket mangkaasikaso moyo. Si siꞌnuman nin sigurado ya a sya ket tutuon tawo naya ni Cristo, matkap nin amingawen na a kapada na, ket tutuo nin tawo nakami anamaet ni Cristo. 8 Mataman wadiꞌ nin mapalabasan koy pangingipangaya ko nin pakayadiꞌ mi komoyo nin nibi nan Uunuren komi, kai ako nin madingꞌey ta nibi nayti nin pakayadiꞌ nin pammagsen nin pagmamatalek moyo konan Dios tan amboꞌ nin paninidaꞌ. 9 Kai ko et rabay nin ipaꞌkaꞌ nin siꞌnuman a manliliꞌmwen katamo sa surat. 10 Tarusan moyo in ta main nin mampangibaritaꞌ a wana, “Mabayani ya sa surat, baleꞌ sa adap-adapan kasa nin mababaꞌ na tan kai yan lamang nin makapagꞌirgo.” 11 Baleꞌ matkap nan tandaen nin siin nin mampangibaritaꞌ nin wanin a no ani kami nin manurat no kasa kamidsen, wanin min lamang sa gawaꞌ no kaadap nakami.
12 Kai mi nin maitpel nin iyarig a lalaman min diri konra nin sarain saray mirayo nin bukod. Sara-saray mampami nin ketegan nin kaabigan nin manꞌipatukdoꞌ ra sa panunukat ra sa lalaman ran diri. Ket no sukaten ray kadiryan ra, ibaritaꞌ ra a kusto saran pirmi. Aninay kawawengan ra!
13 Siꞌkami baleꞌ, mandangkaan mi a pagꞌiirgo mi maipaꞌkaꞌ sa nagwaan mi. Manꞌipasirayo mi tamoꞌ a nipagwaꞌ na nin Dios komi, tan naisakop anaod in say ginwaꞌ mi komoyo sin nako kamidsen. 14 Kai kami nin lumabas sa kanepegan mi komoyo. Wanin ta amboꞌ nin saray raruma no kai edet, siꞌkami anaod a nuꞌnan naꞌteng anan nangiꞌras komoyodsen konan Mabistan Patandaꞌ nin maipaꞌkaꞌ kona ni Cristo. 15 Kai mi nin irangas nin nagwaan mi a nagwaan ran raruma nin tawo. Baleꞌ banaꞌ ta sakop kamon trabahon nipagwaꞌ na nin Dios komi, ilalo mi edet nin gumsen a pagmamatalek moyo, tan no wanin ket, malamuꞌnan et a magwaan mi sa nipagwaꞌ na komi nin Dios isen komoyo. 16 Konan siin, maipatandaꞌ miyay Mabistan Patandaꞌ sa lulugar et itaw sa labas moyo ket kai mi nin matkap nin ipasirayo a nagwaan ran raruman tawo sa lulugar a kai na nin namakian komi nin Dios, 17 no kai edet, bilang sa mabasa tamo a wana,
“No mangipasirayo a siꞌnuman,
say ginwaꞌ na tamoꞌ nin Catawan a ipasirayo na.”a
18 Anaod, amboꞌ nin saray mipataꞌgay a akuen na nin Catawan a si Dios nin tutuon trabahador na, no kai saraytaw saray ipataꞌgay na.