9
Kai koyna nin matkap a manurat et komoyo maipaꞌkaꞌ sa maibi moyon tulong konran tutawo nan Dios itaw sa Judea 2 ta tandaꞌ kon disidido kamon tumulong. Maipaꞌkaꞌ sa sain ket pirayu-rayo katamo anaod konran bubsat iti sa Macedonia, a nangibwat et sin taon, siꞌkamo nin tagadsen sa Acaya ket sisasadyaꞌ kamoyna nin mami. Ket sain nin sulit moyo tininreg a kapusuan nin kaꞌbawan konra nin tumulong anamaet. 3 Ibakiꞌ kosara anadsen ti anaod nin bubsat nin tumulong isen ta pigaw nin kai nin lumiwaꞌ a anggan irgo tamoꞌ in a nibaritaꞌ mi no kai edet, maisadyaꞌ moyoynay tulong moyo nin bilang sa naibaritaꞌ ko. 4 Madingꞌeyan kami, tan wanin anamaet a lamang angangko komoyo banaꞌ ta nipiho mi ana a sisasadyaꞌ kamoyna, no main liꞌ wadiꞌ nin mayi kongkodsen nin bubsat a tagadti sa Macedonia ket maꞌkit ra nin kai et nin naisadyaꞌ a tulong moyo. 5 Kanyaꞌ nin napanemtem ko a matkap kon dawaten konra nin sarayti nin bubsat a muꞌnayna nin makodsen komoyo ta pigaw nin tulungan rakamo nin mangisadyaꞌ anan gindat nin tulong a nipangakoꞌ moyo. Yupaꞌ sa wanin, nakasadyaꞌ ana no rumateꞌ akodsen, tan maꞌkit nin maruros a nakem moyo nin nami tan kai kamo nin napasuet.Mangibwat konan Dios a Ipanulong tamo
6 Siti e a panemtemen moyo:
Si mangmula nin daiteꞌ, daiteꞌ anamaet a yataben na, tan si mangmula nin malaem, malaem anamaet a yataben na.
7 Mami kumon a barang saya sigon sa no umnoy naitalaga nan ibi, nin maruros a nakem na tan kai ya nin napasu-pasuet, banaꞌ ta pablyen nayan Dios a tawo nin siririket nin mami.a 8 Magwaꞌ nan Dios nin byan nakamo nin masurok dyan say matkap moyo. Ket masadag nin pirmi a sarban main moyo ta pigaw nin makapami kamon malaem para sa sarban mabistan gagara. 9 Bilang mabasa tamo sa Masanton Kasuratan, wanti a wana maipaꞌkaꞌ konran wanin a tutawo:
“Mapanudol ya konran mumaidap,
Say gawaꞌ-gawaꞌ na nin pangingingaꞌdo na,
ket tumuluy-tuloy nin kasan anggawan.”b
10 Ket si Dios pagkamainen nasara nin biniꞌ a magtatalon ta pigaw nin main nin kanen.c Sya byan nakamo anamaet nin malaem nin ipanulong moyo sa raruma nin tawo nin bilang biniꞌ moyo. Syan lamang a mamakaꞌbaw ta pigaw nin abaw a yataben sa mabista nin gugawaꞌ moyo konran raruma nin tawo.
11 Masurok a sarba nin ibi na komoyo ta pigaw nin malaem a maitulong moyo. Ket kisalamat sara konan Dios banaꞌ sa tulong moyo nin awiten mi konra. 12 Sayti nin tulong moyo ket kai tamoꞌ nin mamnoꞌ sa pakatkapan ran tutawo nan Dios no kai edet, pangibwatan et nin alakin tuloy nin pakikisalamat konan Dios. 13 Patutuꞌwan et nin sayti a mantumbuken moya a Mabistan Patandaꞌ maipaꞌkaꞌ kona ni Cristo kanyaꞌ nin pagalangan rayay Dios. Raywen raya et banaꞌ sa nangibwat sa nakem moyo nin kipasaya konra tan konran sarba ran bubsat. 14 Saya et, magꞌin nin mabli kamo konra tan idasalan rakamo banaꞌ sa naiduman kamaungan nan Dios a maꞌkit komoyo.
15 Kisalamatan tamoyay Dios banaꞌ sa rigalod na nin kasa gapo nin susaritaꞌ a makasadag nin mangibalikas!