Pagdisididwen nasara ni Pablo nin Manguliktan Tulong a Mammemper
8
Ket sawanin, manꞌaduen min bubsat, rabay min ipatandaꞌ komoyo no ani a nagwaan nin nipanulong nan Dios sa dudupong nin mammemper iti sa Macedonia. Naꞌkit sin 2 leleg a mandumalan sara sa masakit nin idap ket maririket sara et a lamang ket banaꞌ ta manꞌirangep raynamaet a kaidapan tuloy nin kinapubri, malaem a nibi ran tulong konran kapada ran maidap nin mammemper sa Judea. 3 Tistigusan kon nami sara sa anggawan nin mababaꞌ ra, masurok et pa et dyan sa mababaꞌ ra. Mangibwat sa nakem ran diri, 4 masuet ran dinawat komi a byan misara nin pagkanawanawa nin kiramaꞌ sa panunulong konran kapada ran tutawo nan Dios. 5 Say ginwaꞌ ra, mas et dyan say inilalwan mi. Say muꞌna-muꞌna nin ginwaꞌ ra ket nitalaga ran nipaisirong konan Uunuren tan komi a byay ra yupaꞌ sa gawaꞌ na nin Dios nin maitukoy sa karabayan na.6 Ket banaꞌ ta wanin, binaritaan miya si Tito a syay namukaw komoyo nin mangulikta kamon ibi moyon tulong, nin ituloy nakamon tulungan nin mailaꞌpos ti nin gawaꞌ nin adoꞌ moyo. 7 Anaod sawanin, tandaꞌ kon iti kamon pirmi sa uꞌna sa sarban bubagay a bilang sa sayti: maꞌget a pagmamatalek moyo konan Dios, alaki a pakababaꞌ moyon mangipatandaꞌ nin maipaꞌkaꞌ kona ni Jesus, tan tandaꞌ moyoy katutuꞌwan maipaꞌkaꞌ konan Dios. Maseseg kamo lawas nin mangwaꞌ nin gawaꞌ banaꞌ sa sain nin pagmamatalek moyo, tan alaki a pangangadoꞌ moyo komia. Ana edet, apes mi nin andiꞌ kamo kumon nin magkurang sa pangingipaꞌkit nin adoꞌ moyo konran mammemper itaw sa Judea.
8 Amboꞌ ta man-gan-ganen katamo kanyaꞌ nin manꞌibaritaꞌ ko in, no kai edet, manꞌipaꞌkit ko komoyo no paꞌno nin kaalaki a apes ran raruma nin tumulong sa kapada ran mammemper, ta pigaw nin no arigen moyoyti ket pruwibawan a katutuꞌwan nin pangangadoꞌ moyo. 9 Anaod, tandaꞌ moyoy maipaꞌkaꞌ sa alakin kamaungan na kontamo nin Uunuren tamon si Jesu-Cristo. Banaꞌ sa sayti nin kamaungan na, mataman nin ikon na nin kayamanan a sarba, pinapubri nay lalaman nan dirib ta pigaw nin, mangibwat sa nipamagꞌin nan pubri sa kadiryan na, ket pinayaman natamo.
10-11 Ket sayti a maibaritaꞌ ko komoyo: Ituloy moyo tan ilaꞌpos moyoyna in say pangungulikta moyo nin tulong a nitaranaꞌ moyo sin taon et. Maabig in para komoyo ta siꞌkamoy sangkauꞌnawan nin nangulikta, tan amboꞌ in tamoꞌ, siꞌkamo et a main nin nakem sa sain nin gawaꞌ. No paꞌnoy sulit moyo nin nangitaranaꞌ wanin anamaet kumon a sulit moyo nin mangilaꞌpos. Mami kamo sigon sa mababaan moyo 12 ta no maruros a nakem na nin sayay mami, makapaririket konan Dios a mababaan nan ibi; kai nin tagaꞌnan a mami yan kai na nin mababaan.
13 Kai ko nin apes nin payꞌanan saray raruma tan pabyatan kamo no kai si pada-pada kumon nin mabista a kapapaꞌsar moyo. 14 Banaꞌ anaod ta masuruk-surok a main moyo sawanin, punꞌan moyoy pakatkapan ran mampagkurang, ta pigaw nin sa awro nin siꞌkamo anamaet liꞌ wadiꞌ a magkurang, punꞌan ra anamaet a pakatkapan moyo. Kona nin siin, pada-pada a kapapaꞌsar moyo. 15 Bilang nin wantaw sa wana sa Masanton Kasuratan a,
“Kai ya nin nagsubra a nakadinep nin abaw,
tan kai ya anamaet nin nagkurang a nakadinep nin daiteꞌ.”c
Say Pangngisadyaꞌ ran Tulong ra
16 Kisalamatan miya nin tuloy a Dios ta binyan naya nin suet nin tumulong komoyo si Tito a kapada nin suet ko. 17 Siririket ya nin inmaburoy sa dawat mi nin mako yadsen komoyo. Say katutuꞌwan ket nangibwat anan diri kona a sumubliꞌ yadsen. 18 Manꞌibakiꞌ miyadsen nin kaaluyon naya a sayay busat iti, a say seseg na nin mampagtrabaho para konan Mabistan Patandaꞌ, ket pitanda-tandaꞌ sa sarba nin dupong ran mammemper. 19 Saya et, piniliꞌ ya nin dudupong nin mammemper iti nin kalamoꞌ mi sa pagbibyahi mi leleg a manꞌasikaswen mi ti nin pangungulikta nin pakairaywan nan Catawan tan pammaꞌkit mi nin ruros nin nakem min tumulong.d 20 Mampaayyen miyadsen tin busat kona ni Tito ta mampakailag kami ta pigaw nin kasa nin animan nin mairgo o isipen nin siꞌnuman maipaꞌkaꞌ sa pangangaꞌget mi nin sayti nin malaem a tulong. 21 Say gumwaꞌ nin matunong a gagara mi amboꞌ tamoꞌ sa pangingikit nan Catawan no kai wanin anamaet sa pangingikit ra nin tutawo. 22 Anamaet, manꞌibakiꞌ miya et isen nin kalamoꞌ na ni Tito a saya et nin busat. Nasubok miyaynan niꞌno, tan naꞌkit mi a sulit na nin tumulong sa nagsikabarang a padalan. Lalo ya et nin masulit sawanin banaꞌ sa alaki nin talek na komoyo.
23 No maipaꞌkaꞌ kona ni Tito, sya a kalamoꞌ ko sa panunulong ko komoyo, tan no maipaꞌkaꞌ konra nin saray rwa nin bubsat a mayidsen kona, sara a nibakiꞌ nin dudupong ran mammemper iti. Banaꞌ konra, mangkabyan yan unor si Cristo.
24 Kanyaꞌ nin sa pangngisadyaꞌ moyoynan tulong moyo konran itaw sa Judea, ipaꞌkit moyo konran sarayti nin bubsat nin mangiparateꞌ liꞌ sa dudupong ran mammemper, a tutuo a pangangadoꞌ moyo tan tutuo a manꞌipasirayo mi.