2 Byan rakamin lugar sa kukapusuan moyo. Kasa gapo nin siꞌnuman komoyo a nagkasalananan mi, kasa gapo nin siꞌnuman komoyo a pinagkasalanan mi, tan kasa gapo anamaet nin siꞌnuman komoyo a sinaor mi. 3 Amboꞌ ta manꞌibaritaꞌ koyti ket mampaliwaen kon manꞌiparsa moyoyti komi. Kai katamo nin mamparsawan nin mangipaꞌkaꞌ nin wanin ta bilang naibaritaꞌ koyna intaw komoyo mabli kamo komi, tan kalamoꞌ rakami, mati man o mabyay. 4 Alaki a talek ko komoyo tan nipara-parayo katamo sa siꞌnuman. Ket, banaꞌ ta wanin maririket ako sa busel nin kaidapan mi. Naliwaliwa akon tuloy nin say mabistan natandaan ko maipaꞌkaꞌ komoyo.

5 Anaod, mataman nin sin saytaw sin iti kami sa Macedonia kai kami nin nainawnan. Main nin kaidapan sa rubariꞌ tan rubariꞌ mi. Mangkuntrawen rakami nin kalaban tan aburido kami maipaꞌkaꞌ konran mammemper. 6 Baleꞌ si Dios a syay mangliwaliwa konran iti sa kaberengan, liniwaliwa nakamin pinaririket banaꞌ sa nikarateꞌ na ni Tito nin 7 ibat isen komoyo. Amboꞌ tamoꞌ a say kararateꞌ na ni Tito a namaririket komi no kai pati say niparateꞌ na komi nin no paꞌno moya nin pinaririket. Niparateꞌ na komi a alaki nin apes moyon makaꞌkit kongko, tan say pagbababawiꞌ moyo nin pinabereng rako tan say pisasadyaꞌ moyon mangisakit kongko. Pinaririket akon tuloy nin sain.

8 Ket kai ako nin magbabawiꞌ a nanurat ako komoyo sin saytaw mataman no pinabereng nakamon sitaw nin surat ko. Anaod sin nuꞌna ket nagbabawiꞌ ako baleꞌ kai anan lamang ta natandaan kon ginmereng kamo tamoꞌ nin nadaliꞌ. 9 Ket sawanin, maririket ako amboꞌ nin banaꞌ ta pinabereng katamo no kai edet, a banaꞌ sa bereng moyo ket nagbabawiꞌ kamo tan ginurutan moyoynay pagkakasalanan moyo. Sain say kaberengan moyo ket manepeg sa pangingikit nan Dios. Kanyaꞌ nin mabistay nagwaan nan sitaw a surat mi komoyo. 10 Wanin ta say kaberengan nin manepeg sa pangingikit nan Dios, sayti a pangibwatan a magbabawiꞌ a tutawo; ket gumring saran paisalba kona. Ket say wanin a mangyadiꞌ, kai sukat nin ikabereng. Baleꞌ, say kaberengan nin maingar nin tutawo a kai nin pangibwaten a magbabawiꞌ sara, ket miugot sa dukaꞌ nin panganggawan. 11 Kiten moyo a bunga sa byay moyo nin saytaw nin kaberengan moyo a manepeg sa pangingikit nan Dios; sinmeseg tan nagꞌin kamon masulit nin mangipaꞌkit a kai moyo nin kinunsinti taw nin kasalanan. Masager kamon tuloy maipaꞌkaꞌ konan siin si main nin nangyadiꞌ sa grupo moyo, linmiꞌmo kamo sa kaugutan nan siin, alaki a pangrarabay moyon makalamoꞌ rako, tan nagꞌin nin masulit kamon nabuan yan tumekep nin dusa a nagkasalanan. Sa sarban gugawaꞌ ket manꞌipaꞌkit moyo nin kasan pakairanudan moyo konan sitaw nin bagay.

12 Ket, amboꞌ tamoꞌ anaod nin banaꞌ konan tawon nagkasalanan o konan nagkasalananan na a nanuratan ko komoyo, no kai edet, ta pigaw nin sa adapan nan Dios ket maipaꞌkit moyo no adti nin angga a pammabli moyo komi. 13 Anaod, pinaririket kamin tuloy nin sain a ginwaꞌ moyo.

Anamaet a lamang, kai kami tamoꞌ nin naliwaliwa no kai edet, nalamuꞌnan et a ririket mi nin ririket na ni Tito a banaꞌ sa mabistan nisnaꞌ moyo kona ket nayꞌanan a kaingaran na. 14 Rinayu-rayo katamo kona tan kai ako nin nadingꞌeyan sa animan ta no paꞌno nin katutuo ngaꞌmin a nibaritaꞌ mi komoyo, napatutuꞌwan anamaet a sarba nin nibaritaꞌ ko kona ni Tito maipaꞌkaꞌ komoyo. 15 Manꞌumalaki a pammabli na ni Tito komoyo mintras nin mampanemtemen nay ruros nin nakem moyon tinmulok nin sarba sa nigan-gan nin gawꞌen moyo tan say maꞌmot a nipamarateꞌ moyo kona nin awit moyoy alakin salak. 16 Ket banaꞌ sa sain, pinasyan ririket ko; tandaꞌ kon mailalwan katamo lawas.