Matkap nin Paringgasen ran Taga Corinto a Byay ra
6
Sawanin anaod, bubsat, banaꞌ ta ginwaꞌ nakamin katrabahwan na nin Dios, dawaten mi anaod komoyon andiꞌ moyo nin gawꞌen nin kasan kakanaan a inagwang moyon kamaungan nan Dios nin ginwaꞌ nakamon uamigo na. 2 Anaod, wanti ey wana nin Dios nin ipadar nay kamaungan na,“Rinngeꞌ katamo sin panaon a ipayabor koy pakatkapan moyo,
tinulungan katamo konan sitaw si tyimpon nipangisalba ko komoyo.”a
Ket tandaen moyoyti:
sawanin anay panaon nin nipamayabor na; anaod, sawanin a tyimpo nin nipangisalba nan Dios komoyo!
3 Kai kami nin man-gumwaꞌ nin animan a makasidaꞌ sa pangingikit ran tutawo ta pigaw nin kasan pakabalawan nin trabahon manꞌipagwaꞌ nan Dios komi. 4 No kai edet, manꞌipaꞌkit mi sa kabibyay mi a manepeg nin pigagawaꞌ ran mampagsirbi konan Dios. Maꞌkit sa pangingitpel mi, sa linasat-lasat mi nin kaidapan, kaberengan, tan pitipitan nin kapapaꞌsar. 5 Nagaru-garuti kami, naprisu-priso kami, tan sinumpi-sumpit kamin ginulu-gulo ran tutawo. Nalabas-labas a nipagtrabaho mi tan main nin yabin kai kami nin naꞌlek tan main nin tyimpon kai kami nin nangan. 6 Nipaꞌkit mi a mampagsirbi kami konan Dios ta maringgas a kabibyay mi tan matarusan mi a gagara nan Dios tan mapamasinsya, tan maong kami sa siꞌnuman. Maꞌkit et anamaet a pagꞌuuray nan Ispirito nan Dios nin iti komi, tan tutuo a pangangadoꞌ mi sa sarban tutawo, 7 tan sa pangingipatandaꞌ mi nin say tutuo, tan mantulungan kami nin pakayadiꞌ nan Dios. Say mapteg nin pigagawaꞌ a armas min pangataki tan dipinsa mi. 8 Main saray tutawon ataꞌgay a pangingikit ra komi, tan main anamaet nin mangmuda-muda komi. Main saray mangrayo komi tan main anamaet nin mamadukaꞌ komi. Main saray mamparsawan rakamin mabulaꞌ, baleꞌ tutuo tamoꞌ a manꞌibaritaꞌ mi. 9 Main saray mampangipaꞌkaꞌ a kai kami nin mambaga-bagawen baleꞌ pitanda-tandaꞌ kami sa nagsikabarang nin lugar; pirmin dandani kami nin mati, baleꞌ anggan sawanin ket mabyay kami et a lamang. Mandusa-dusawen kami, baleꞌ kai kami nin mapati. 10 Abirno nin abaw a puon nin kaberengan mi, siririket kami lawas. Pubri kami baleꞌ mampayamanen misaray raruman tutawo sa kayamanan a magnayon. Kasan kukayadian mi baleꞌ main komi a sarban bindisyon nin ibi nan Dios.
11 Mampablyen kon bubsat isen sa Corinto, mabli kamo komi! Diritsawan a pagꞌirgo mi komoyo; kasa gapo nin niyadi mi. 12 Kai nin nabawꞌasan a pangangawaꞌnan mi komoyo; say pangangawaꞌnan moyo komi a nabawꞌasan! 13 Ibaritaꞌ koyti komoyo nin baraꞌmon ama moyo: pablyen rakami nin kapada nin alakin pammabli mi komoyo.
14 Andiꞌ kamo nin kipasaya konran amboꞌ nin mammemper ta kai anaod nin makapialuyon a mapteg tan matikoꞌ. Paꞌno nin makapikalamoꞌ a palaway tan dedlem? 15 Paꞌno yan kituno si Cristo kona ni Satanasb? Si sayay mammemper anamaet tan si sayan amboꞌ nin mammemper, paꞌno a say pangingisip ra ket mituno? Kai gapo nin magwaꞌ! 16 Anamaet, kasan lugar ran dios-dios sa piikapan nan Dios, tan si mampiikapan nan si sibibyay a Dios ket iti sa pidudupong tamon mammemper.c Wanin ta wanan mismo nin Dios,
“Miikap ako konra tan kikalamoꞌ ako konra.
Siꞌko liꞌ a Dios ra, tan alilbien kosara liꞌ nin tutawon ikon ko.”d
17 Kanyaꞌ nin wana et nin Dios,
“Lakwanan moyo saray kai nin tumumbok kongko tan
matkap a maiduma kamo konra.
Andiꞌ kamo nin kibiang sa kadukaan.
Ket siꞌkon diri nin si Dios, akuen katamoe
18 tan magꞌin rakon Ama
tan magꞌin katamon aꞌnak,
wanan Makapangyayadiꞌ a Dios.”f