5
Kai anaod nin tumapoꞌ a nakem mi ta tandaꞌ mi a no sitin lalaman mi sawanin nin kapada nay baꞌlag nin mampiikapan midti sa lutaꞌ ket sidaen ya, main lamang nin piikapan midtaw sa langit a si lalaman nin ginwaꞌ nan diri nin Dios a magnayon anggan-angga. 2 Anaod, legꞌan nin iti kami et konan sitin kapresan a mampiikapan mi, masulit kami anan tuloy nin maisubray yayna a baꞌyon piikapan nin itaw sa langit. 3 Edet, si kararwa tamo ket kai ya liꞌ paꞌsar nin labos no kai main nin piikapan na. 4 Legꞌan nin iti kami et sa sitin lalaman sa mundo, mabyatan kamin abaw nin idap. Kai mi nin mansulitan nin lakwanan ana a lalaman mi, no kai edet, mansulitan mi a maibi yayna kumon komi a baꞌyon lalaman min mangibwat sa langit, ta pigaw nin si lalaman nin mati ket subrayan yaynan lalaman nin mabyay anggan-angga. 5 Si Dios nin diri a nangisadyaꞌ komi nin mabyay nin anggan-angga ket nibi nayaynan miikap komi a Ispirito na ta pigaw nin mapiho min mangyadiꞌ ti.a6 Wanin, kanyaꞌ nin magsen a nakem mi. Peteg a tandaꞌ tamon mintras a iti atamo et konan sitin mampiikapan tamodti sa lutaꞌ, say lalaman tamo, kasa atamo et itaw sa mampiikapan nan Uunuren. 7 Mintras anaod nin iti atamo et sa lutaꞌ, mabyay atamo nin sitatalek konan Uunuren mataman no kai tamoya nin maꞌkit. 8 Magsen anaod a nakem mi, tan apes mi ana nin lakwanan miyaynayti kumon nin lalaman midti sa lutaꞌ ta pigaw nin makakiikap kami ana konan Uunuren. 9 Ket anaod say masulit min tuloy nin gawꞌen, mabyay kami et man iti sa lutaꞌ o itaw sa langit, ket si makapaririket kami kona nin Uunuren; 10 banaꞌ ta main liꞌ nin awro a siꞌtamo ngaꞌmin ket matkap a umadap atamo sa lugar a paninintinsyawan na ni Criston Uunuren ta pigaw nin timbangen nay ginwaꞌ tamo legꞌan tamon nabyay iti sa lutaꞌ. Barang saya mangrisibin manepeg a tubaleꞌ sa ginwaꞌ na, maabig man o dukaꞌ.
Say Pammagꞌin nan Dios nin Uamigo na a Sarban Tawo
11 Ket banaꞌ ta tandaꞌ mi nin sililiꞌmo a sintinsyawan natamo liꞌ nin Uunuren, mampatutuꞌwan mi konran tutawo a tutuo kami. Baleꞌ tandaꞌ nan Dios a kukanakman mi tan matalek akon tandaꞌ moyo kami anamaet nin maong. 12 Kai kami nin mampipaong anamanaet komoyo, no kai edet, manꞌibaritaꞌ mi ti ta pigaw nin main nin ipasirayo moyo maipaꞌkaꞌ komi tan main nin iꞌbat moyo konran sarain saray tutawon say no siꞌno sara a ipasirayo ra, baleꞌ kai ra nin manꞌadalen a pigagawaꞌ ra. 13 Ket no ipaꞌkaꞌ ran raruma a nasidaꞌ anay ulo mi, kasan kwinta komi; basta mampagsirbyan miyay Dios. Baleꞌ no limpyo anamaet a isip mi, para sa kaabigan moyo kanyaꞌ nin manꞌibaritaꞌ mi ti. 14 Wanin ta, say adoꞌ na ni Cristo komi a mampagꞌuray komi banaꞌ ta manꞌalilbien mi a sayan-saya na nin nangiꞌdeng sa sarban tutawo sin nati ya. Ket banaꞌ ta wanin nibilang nan Dios a maikalamoꞌ sarayna kona nin nati a sarban tutawo. 15 Nati ya anamaet para sa sarba nin tutawo ta pigaw nin siꞌtamon mabyay iti sa mundo ket amboꞌ anay karabayan tamo a tumbuken tamo, no kai edet, say karabayan na, nin sya nati ya tan sinmubliꞌ yan mabyay para kontamo.
16 Kanyaꞌ nin, siꞌkami, amboꞌ anay bakas nan sayay tawoy kikiten mi. Sin saytaw kinikit miya si Cristo a bilang sa pangingikit ran basta tawo tamoꞌ, baleꞌ sawanin amboꞌ anan wanin. 17 Edet, si tawon naipasaya kona ni Cristo ket baꞌyo yan parsa; kasayna a gindat, baꞌyo anay mampagꞌuray kona. Isipen moyo in! 18 Si Dios, ginwaꞌ na nin wanin a sarban sain. Yupaꞌ sa patiti na ni Cristo sa kudos, pinagꞌin natamo et nin Dios nin uamigo na, siꞌtamon gindat a kuntra kona, tan nibi na anamaet nin trabaho tamo a pagꞌinen tamo saran uamigo na a tutawo. 19 Say rabay kon irgwen ket, si Dios mangibwat sa ginwaꞌ na yupaꞌ sa patiti na ni Cristo sa kudos, kai nayna singiren nin Dios a tutawo sa kasalanan ra, no kai mampagꞌinen nan uamigo na a tutawo. Ket nipya na komi a pangingipatandaꞌ nin sayti.
20 Nibakiꞌ nakami anaod ni Cristo ta pigaw nin usaren nakami nin Dios nin managyat konran tutawo. Kanyaꞌ nin siꞌkami a manꞌiꞌdeng miya si Cristo, dawaten mi anaod a aburuyan rayay Dios nin pagꞌinen nasaran uamigo na. 21 Anaod, kai ya gapo nin nagkasalanan si Cristo, baleꞌ para sa kaabigan tamo, ginwaꞌ nan Dios a syay naidaꞌton banaꞌ sa kukasalanan tamo, ta pigaw nin no naipasaya atamo kona ni Cristo ket pagꞌinen natamon mapteg nin Dios sa pangingikit na.