Mapalawayan Yupaꞌ konan Sitin Trabaho a Nakem nin Tutawo
4
Banaꞌ sa ingangaꞌdo nan Dios komi, nibi nan trabaho mi ti say man-gawꞌen mi kanyaꞌ nin kai nin tumapoꞌ a nakem mi. 2 Kai mi gapo nin agamirenen a makapadingꞌey nin adin gawaꞌ-gawaꞌ. Kai kami nin mampangwaꞌ nin sinisirib tan kai mi nin mantursye-tursyen a minsahi nan Dios, no kai edet, diritsawan min manꞌiyakay a katutuꞌwan ta pigaw nin saray makarngeꞌ ket maalilbiꞌ ran peteg a, sa adapan nan Dios, ket mapya kami. 3 Ket no say manꞌipatandaan mi maipaꞌkaꞌ kona ni Cristo ket nasalimbengan, nasalimbengan tamoꞌ konran saray mampako ana sa pakasidaꞌ. 4 Wanin ta say pangingisip ran sarain nin kai nin mamper ket sinakban na ni Satanas a syay mampagꞌuray iti sa mundo konan sitin panaon. Ginwaꞌ na in ta pigaw nin say pangingisip ran tutawo ket kai nin mapalawayan nin Mabistan Patandaꞌ maipaꞌkaꞌ sa kataꞌgayan na ni Cristo a syay pakaꞌkitan konan Dios. 5 Amboꞌ nin say maipaꞌkaꞌ sa lalaman mi a manꞌipatandaꞌ mi no kai edet, a si Jesu-Cristo ket sya a sangkataꞌgayan nin Uunuren. Manꞌipaꞌkaꞌ mi a lalaman mi nin aripen a mampagsirbi komoyo banaꞌ sa adoꞌ mi kona ni Jesus. 6 Sain a man-gawꞌen mi ta si Dios a sya inirgo na a wanti, “Itaw sa madedlem ket magkamain ana nin palaway!”a ket syan lamang a namalaway nin nakem mi. Ginwaꞌ na in ta pigaw nin ibi na komi a pakataros sa sangkaalakyan nin gawaꞌ na a nipadar nan maslag iti kona ni Cristo.Komin Ayupaꞌ a Nakem ya Nitalek a Sangkaimpurtantiwan nin Patandaꞌ
7 Baleꞌ sitin impurtanti nin patandaꞌ ket nitalek naya nin Dios komi nin basta tawo tamoꞌ, nin bilang sa kayamanan a nikwa sa basta kuden. Yupaꞌ sa wanin ket maꞌkit ran tutawo a sain say sangkaalakyan nin kapangyadian nin manꞌipatandaan mi ket nangibwat konan Dios tan amboꞌ nin mangibwat komin diri. 8 Maꞌkit in sa pangingirangep min sarbaynan klasin idap baleꞌ kai kami nin mangkadaeg; main nin tyimpon kai mi ana nin tandaꞌ a gawꞌe-gawꞌen mi, baleꞌ kai kami nin makasawan nin ilalo. 9 Abirno nin piduksa-duksaꞌ rakamin kalaban ket kai nakami gapo nin mampauryan nin Dios. Mangkaganur-ganor kami baleꞌ kai kami nin mapati. 10 Pirmi tana nin mampinabang kami sa bungan nipangirangep nan idap ni Jesus a niugot sa patiti na ta pigaw nin maipaꞌkit a pakayadiꞌ nin byay na sa lalaman min diri. 11 Oꞌ wanin, mintras nin mangkabyay kami et ket manꞌadapen mi tanan pirmi a mati banaꞌ sa pagsisirbi mi kona ni Jesus. Wanin ta pigaw nin maipaꞌkit konan sitin mapati nin lalaman mi a byay na ni Jesus nin nanalo sa patiti. 12 Anaod, mipataꞌgayan kamin pirmi maipaꞌkaꞌ sa piligron mapati baleꞌ sain ket mampamagkamain komoyo nin byay a iti konan Dios.
13 Main nin mabasa sa Masanton Kasuratan a wana, “Mampagmatalek ako konan Dios kanyaꞌ nin ibari-baritaꞌ koy maipaꞌkaꞌ kona.”b Wanin anamaet a klasi nin pagmamatalek mi konan Dios kanyaꞌ nin manꞌipata-patandaꞌ mi a maipaꞌkaꞌ kona. 14 Wanin ta tandaꞌ mi nin si Dios, a syay namasubliꞌ nin mabyay kona ni Jesus nin Uunuren tamo ket, pasublien nakami liꞌ anamaet nin mabyay banaꞌ sa nikaipasaya mi kona ni Jesus. Ket amboꞌ tamoꞌ nin siꞌkami, siꞌkamo et anamaet, iꞌras natamo liꞌ ngaꞌmin nin maikalamoꞌ kona.
15 Ket para sa ikaabig moyo a rason nin pangingirangep mi nin sarban sain nin idap ta pigaw nin no umabaw saraynan umabaw a tutawon makasariꞌ sa kamaungan nan Dios nin isalba nasara, ket umabaw saray kisalamat kona tan mas maitandudoꞌ yay ngaran na.
Tandaꞌ ra ni Pablo a Mabistan Panganggawan ra liꞌ
16 Banaꞌ sa wanin kanyaꞌ nin kai nin mantumapoꞌ a nakem mi. Oꞌ mangkumapoy ana a lalaman mi baleꞌ mangkapabaꞌyo nin inawru-awro a byay mi nin iti konan Dios 17 ta main nin magꞌin bunga nin saytin idap nin manꞌirangep mi sa sitin anted nin panaon tamoꞌ. Mainumꞌay tamoꞌ in no ikumpara sa kai masukat nin kabistawan nin pakakiramaꞌ mi sa anggan-angga nin kataꞌgayan nan Dios. 18 Amboꞌ nin say idap a main iti sa mundo a kamiꞌnan nin nakem mi no kai edet, sa say mabistan nisadyaꞌ nan Dios para kontamo nin kai tamo et nin maꞌkit. Say bubagay nin maꞌkit ket lumabas tamoꞌ, baleꞌ sain nin kai tamo et nin maꞌkit ket anggaynan-angga.