3 Si Judas, si nagtraidor kona ni Jesus, sin natandaan nan nasintinsyawan yan mati si Jesus, ginmereng ya sa ginwaꞌ na. Ket, nikaꞌ na nin isubliꞌ konran Pupangulon Pupadiꞌ tan Mangatuntawo a tulumpuloꞌ nin pirak. 4 “Nagkasalanan ako!” wana. “Liniputan koyay tawon kasan kasalanan ket sawanin mapati ya banaꞌ sa gawaꞌ ko.”

Wanra kona, “Ani a kabiangan mi ey? Prublima moyna in nin bukod!”

5 Nipasasweng na ni Judas a kwarta sa luob nin Timplo nan Dios. Miꞌsa nibwat ya tan nako ya nin pinaibitay.

6 Pinurot ran Pupangulon Pupadiꞌ a kwarta. Ket wanra, “Bilin byay^a nan sayay tawoytin kwarta. Ta wanin edet, kai nin aburuyan nin Gugan-gan na ni Moises a maikalamoꞌ ti sa kwarta nan Timplo nan Dios.” 7 Ket nagꞌiirgwan ra no ani a gawꞌen sa kwarta tan nipagketan ra nin isaliw rayti konan lutaꞌ nan sayay mangangwaꞌ nin kuden tan paya ta pigaw nin gawꞌen rayan kampusanto ran amboꞌ nin tawo sa Jerusalem a matidtaw. 8 Kanyaꞌ nin anggan sawanin, banaꞌ ta sain nin kwarta ket bilin byay nin tawo, sitaw nin lutaꞌ ket mantawagen ya nin Lutaꞌ nin Dayaꞌ.

9 Konan siin natukid a wanan Dios a nipaibaritaꞌ na kona ni Prupita Jeremias. Wana,

11 Naiyadap ya si Jesus nin usisaen nan gubirnador a si Pilato. Tinepet nan gubirnador kona, “Siꞌka paran pageꞌ a adiꞌ ran Judio?”

Niꞌbat na ni Jesus, “Nairgo moyoyna.” 12 Pinarsa-parsawan rayan abas nin Pupangulon Pupadiꞌ tan Mangatuntawo si Jesus, baleꞌ kai ya gapo nin inumbat.

13 Kanyaꞌ nin wana ni Pilato kona, “Ambaleꞌ? Kai ka tana gapo nin umbat maipaꞌkaꞌ sa sain say manꞌiparsa-parsa ra komo!”

14 Baleꞌ kai ya gapo nin nagꞌirgo si Jesus kanyaꞌ nin nakaꞌngap yan maong a gubirnador.

15 Ugaliꞌ na ni Gubirnador a tepeꞌ nin Pistan Nipanglabas mamirduna yan mangibulos nin sayay priso nin no siꞌno a pilien ran tutawo. 16 Sin sain, main itaw nin mangkaprison sayay bandunado nin tawo a say ngaran na ket Jesus^c Barrabas. 17 Ket sin nadinep sara ngaꞌmin a tutawo, wanan nitepet ni Pilato, “Siꞌnoy rabay moyon bulusan ko? Si Jesus Barrabas o si Jesus a mantawagen ran Cristo?” 18 Wanin a wana ta tandaꞌ nan peteg a maimbel saray pupangulon Judio kona ni Jesus kanyaꞌ nin niyadap raya kona.

19 Sin itaw ya et nin nakatekreꞌ sa lugar nin paninintinsyawan si Pilato, main nin rinmateꞌ nin nipaibaritaꞌ nan asawa na kona a wana, “Andiꞌ ka nin mangwaꞌ nin animan a kuntra konan siin a tawo. Kasa gapo nin kasalanan na. Nanaynep akon dukaꞌ maipaꞌkaꞌ kona nayabi ket napaidap ako sa taynep ko.”

20 Sara baleꞌ a Pupangulon Pupadiꞌ tan saray Mangatuntawo, sinugsog rasaray tutawo nin dawaten ran si Barrabas a bulusan na tan patyen ya si Jesus. 21 Kanyaꞌ nin sin tinepetan nasara anamanan gubirnador a tutawo no siꞌno konran rwa a rabay ran bulusan na, wanran niꞌbat, “Si Barrabas!”

22 Wana ni Pilato, “No wanin ani a gawꞌen ko kona ni Jesus a mantawagen ran Cristo?”

“Ipasak ma sa kudos!” wanran niꞌbat.

23 “Ambaleꞌ?” wana ni Pilato. “Main paran ginwaꞌ nan abas?”

Baleꞌ mas maksaw rayna edet nin niburyaw, “Ipasak ma sa kudos!”

24 Naisip na ni Pilato a kasaynan magwaꞌ na ta tumaranaꞌ saraynan gumulo a tutawo. Namakalap yan ranom tan nanguyas yan gamet na sa adapan ran tutawo a say rabay nin irgwen ket kasan kabiangan na sa patiti na ni Jesus. Wana, “Kasan kabiangan ko sa patiti nan sitin tawo. Makauray kamo!”

25 “Oꞌ, siꞌkami tan saray puri mi a umbat sa patiti nan siin a tawo,” wanra ngaꞌmin nin niꞌbat nin tutawo.

26 Ket binulusan naya si Barrabas a bilang sa dawat ra. Nipasanet naya si Jesus miꞌsa nayayna nin nipagamet konran sundaloꞌ nin ikaꞌ raya ipasak sa kudos.

27 Niꞌras raya si Jesus nin sundaloꞌ nan gubirnador sa luob nin palasyo na a mantawagen nin Pretorio tan inaribungbungan raya nin sarba ran itaw nin sundaloꞌ. 28 Linusꞌukan raya miꞌsa sinulutan raya nin kulor lilan kapa a kano wadiꞌ ket adiꞌ ya. 29 Namalukay saran madiwin wakay a kuruna kano wadiꞌ tan nikuruna rayayti kona ni Jesus. Pinangaꞌget rayan bislak sa pawanan nin gamet na a kano wadiꞌ ket si mantawagen yayti nin setro tan nanalimukod sara sa adapan na a kano wadiꞌ ket pangigalang ra kona. Wanra, “Viva, Adiꞌ ran Judio!” 30 Kaaram linudaan raya miꞌsa raya nin linapnit a bislak kona tan nipatuk-patok rayayti sa ulo na. 31 Sin sinmawaꞌ saraynan nagpista kona, linusꞌok rayaytaw kona si lilan kapa tan nisubliꞌ ran nisulot kona a dirin seket na. Kaaram, niliwaꞌ rayaynan ikaꞌ ipasak sa kudos.

32 Sin manrumikor sara sa syudad, nasnaan rayay sayay lalakin taga Cirene a say ngaran na Simon. Nipasuet rayan nipabalatay kona a kudos a mambalatayen na ni Jesus. 33 Nirateꞌ sara sa lugar a mantawagen nin Golgota a say rabay nan irgwen ket Lugar nin Butꞌol Ulo. 34 Painumen raya kumon si Jesus nin arak a linawukan nin bagay a pinasyan pait a pammakaꞌlek.^d Sin natawayan nayti ket kai na nin ininom. 35 Sin naipasak rayayna sa kudos, nibubunutan sara ta pigaw nin mapitawꞌa-tawꞌan ray seket na.^e 36 Sin nayadiꞌ, tinmekreꞌ sara tan binantayan raya si Jesus. 37 Sa taꞌgay nin ulo na ni Jesus, nipasak rayay nakaisuratan nin nipakasalanan ra kona. Wana:

38 Main nin rwa ray kriminal a nikirngan ran nipasak kona ni Jesus, si saya sa bandan wanan na tan si saya anamaet sa wiri na.

39 Saray tutawon lumabas, ipeyeng-peyeng ran panuyaꞌ-tuyaꞌ kona ni Jesus. 40 Wanra, “Kai para a siꞌka, wamo intaw ket mababaꞌ man yubaen tan ipaꞌdeng nin uman sa luob nin tuloy awro a Timplo nan Dios? No pageꞌ a Anak nakan Dios, isalba mo pa edet a lalaman mo tan gumlat kadsen sa kudos!”

41 Wanra in anamaet lamang nin Pupangulon Pupadiꞌ, saray Madudunong sa Gugan-gan, tan saray Mangatuntawo. Tinuyaꞌ-tuyaꞌ raya anamaet a lamang si Jesus, wanra, 42 “Saray raruman tawo naisalba nasara kano, baleꞌ say lalaman nan diri, kai! Heh! Adiꞌ tamo kanon siꞌtamon Israelita! No makaglat yadsen tana sa kudos, mamper atamoyna kona. 43 Magmatalek ya kano konan Dios tan wanan Anak naya kanon Dios! Kikiten tamo pa edet sawanin no iligyas nayan Dios ta kawaꞌnan naya kano.”

44 Mataman nin saray kriminal nin karngan nan nipasak ni Jesus, tinuyaꞌ-tuyaꞌ rayan lamang nin wantaw.

45 Sin ugtiawro, dinmedlem yay intiron babon lutaꞌ nin narateꞌ a tuloy udas. 46 Sin bandan alas tres nin yabina wana nin nitaꞌway ni Jesus sa saritaꞌ nin Hebreo, “Eli, Eli, lama sabachthani?” a say katarusan, “Dios ko, Dios ko, ambaleꞌ nin pinauryan nako?”^f

47 Wanran tutawodtaw nin nakarngeꞌ kona, “Mantawagen naya si Elias!” 48 Ket, saya konra, nangred yan tampor nin nako nangipaalepꞌep nin ispungha sa maalsem nin arak nin nikwa naya sa parpar nin bislak ta pigaw nin ipasepsep naya kumon kona ni Jesus.

49 Baleꞌ saray raruma wanra, “Heh! Pauryan ma! Kiten tamo pa no rumateꞌ yan pageꞌ si Elias ta pigaw nin isalba naya.”^g

50 Tinmaꞌway ya anamanan maksaw si Jesus, kaaram nauyos anay inanawa na. 51 Ket sa Timplo nan Dios, nabisang yan napikngaꞌ nangibwat sa taꞌgay anggan saroy a kurtina^h nin salimbeng nan Sangkasantusan nin Lugar. Rinmayon ya ket linumtak a bato. 52 Naabryan a pantyon tan abaw saray nati anan tutawo nan Dios a pinasubliꞌ nin mabyay tan 53 sin pinasubliꞌ yaynan mabyay si Jesus, linmiwaꞌ sara sa pantyon ra nin nako sara sa Masanton Syudad a si Jerusalem tan abaw saray nakaꞌkit konra.

54 Si kapitan tan saray sundaloꞌ nin itaw nin mampamantay kona ni Jesus, sin naaraman rayay rayon tan naꞌkit ray raruma et nin mampangyadiꞌ, pinasyan liꞌmo ra. Wanra, “Pageꞌ a anak nayaytin Dios!”

55 Main anamaet nin abaw nin bubbayin itaw sa dayoꞌ a mampamantay. Tinmumbok sara kona ni Jesus nangibwat sa Galilea nin nagsirbin nangasikaso kona. 56 Itaw sara si Maria nin taga Magdala, si Maria nin ina ra ni Santiago tan Jose, tan si ina ra ni Juan tan Santiago nin aꞌnak na ni Zebedeo.

57 Sin yabinayna, main nin sayay mayaman nin taga Arimatea a nakodtaw a say ngaran na Jose. Tumutumbok naya anamaet lamang ni Jesus. 58 Nako ya kona ni Pilato nin nikidawat yan aburoy a kalapen nayay bangkay na ni Jesus. Ket si Pilato nibi nay aburoy kona. 59 Sin nakalap nayayna ni Jose a bangkay na ni Jesus, binarkot nayan baꞌyo nin maputiꞌ a mabistan klasin abel a mantawagen nin diilo, 60 tan nitabon naya sa pantyon nan diri. Sitin pantyon ket kapangali kona nin yukib ya sa bato a nisadyaꞌ yayna no mati ya si Jose. Kaaram nitulin nayan nisadaꞌ a sayay alakin bato sa purta nan si yukib miꞌsa yayna nin nibwat. 61 Sin sain, itaw sara nin nakatekreꞌ si Maria nin taga Magdala tan si sayay kapada nan Maria nin nakaadap sa pantyon.

62 Napalabas yaytaw nin Awron Pananadyaꞌ sa Pistan Nipanglabas, saray Pupangulon Pupadiꞌ tan saray Pariseo, nako sara kona ni Pilato. 63 Wanra kona, “Gubirnador, mapanemtem mi a wanan sitaw a magbaluꞌ-baloꞌ sin mabyay ya et a sumubliꞌ ya kanon mabyay sa luob nin tuloy awro. 64 Kanyaꞌ nin ipagwardyawan moya pan tuloy awro a nanabunan kona ta bangliꞌ no saray tumutumbok na ket keen raya nin takawen a bangkay na miꞌsa ra nin ibari-baritaꞌ a sinmubliꞌ ya nin mabyay. Ket no mangyadiꞌ a wanin mas masakit in et dyan say nuꞌnan nipangluko ra konran tutawo.”

65 “Main ana!” wana ni Pilato, “Makauray kamoyna. Ipagwardyawan moyaynan mairot!”

66 Ket nako sara sa nanabunan kona ni Jesus. Tinimbryan rayay sadaꞌ nan pantyon tan nipagwardyawan raya ta pigaw nin masigurado ran kasa gapon makategeꞌ kona.