Itaw konan uꞌnan libro ko, nisurat-surat ko a maipaꞌkaꞌ sa sarban nitaranaꞌ na ni Jesus nin gawꞌen tan iyakay,^a 2 angga sa awro nin niyuliꞌ yayna sa langit. Ket baꞌyo ya nin niyuliꞌ sa langit, binibi-bibilin nasara sa tulong nan Ispirito nan Dios a piniliꞌ nan apostoles na maipaꞌkaꞌ sa ituloy ran gawꞌen tan iyakay. 3 Sa luob nin aꞌpat a puloꞌ a awro, mayadiꞌ a nipati tan nisubliꞌ nan mabyay, niꞌnon parso a nipaꞌki-paꞌkit ya konra tan niyakay-akay nasara maipaꞌkaꞌ sa pagꞌaadiꞌ nan Dios^b nin pammatutuo a sinmubliꞌ yan mabyay. 4 Niꞌsa nin kadungo raya, wanan nibibilin ni Jesus konra, “Andiꞌ kamo nin lumakwan iti sa Jerusalem, no kai edet, tagaꞌnan moyadti yapoꞌ a nipangakoꞌ na ni Ama. Nairgo koyna intaw komoyo a maipaꞌkaꞌ konan siti, ket anaod, 5 ranom a nipamawtismo^c na ni Juan, baleꞌ sa amboꞌ ana nin maꞌteng, bawtismwan kamo nin Ispirito nan Dios^d.”

6 Ket niꞌsa anamanaet nin nidudungo sara, nitepet ran apostoles kona ni Jesus, “Uunuren, isubliꞌ moyna para sawanin kontamon tawodti sa Israel a pagꞌuuray konan nasyon tamo?”

7 Ket niꞌbat na konra, “Say panaon tan mumangyadiꞌ, naitandaꞌ nayna ni Ama mangibwat sa pakayadiꞌ na, ket kai moyoyna nin manepeg nin matandaan. 8 Wanin man, mabyan kamo liꞌ anamaet nin pakayadiꞌ no mako ya nin miikap komoyo a Ispirito nan Dios, ket siꞌkamoy ibakiꞌ kon mangipatutuo nin say maipaꞌkaꞌ kongko itaw sa Jerusalem, sa intiron Judea, sa Samaria, tan sa sarban lugar iti sa mundo.”^e

9 Amboꞌ nin naꞌteng kayadiꞌ nayti nin inirgo ni Jesus, niyuliꞌ yayna sa langit a sikikikit sara; kaaram nasalimbengan yayna nin gunem. 10 Ket mantumangar sara et nin mangkumikit kona ni Jesus nin niyuliꞌ sa langit sin kapingmatan main anadtaw nin rwa ray lulalakin nisket nin maputiꞌ a nakaꞌdeng sa dani ra. 11 “Siꞌkamon lulalaki nin taga Galilea,” wanran sarayti, “Mayin a isen kamo nin mantumangar kamo sa langit? Si Jesus ket nikadayoꞌ ya komoyo nin niyuliꞌ ya sa langit, tan sumubliꞌ yadti liꞌ nin bilang lamang sa no paꞌno yan nuliꞌ sa langit.”

12 Kayadiꞌ nin sain, nibwat saraynadtaw sa mantawagen nin Talugtog Olibo a apostoles tan sinmubliꞌ sara sa Jerusalem, a dandani sayay kilumitro a kadayꞌan^f. 13 Ket sin nirateꞌ saraynadtaw, nuliꞌ saradtaw sa kwarto sa taꞌgay nan balin mampagtuluyan ra. Sarayti ket sara:

15 Napalabas a umnoy awro, niꞌsan nadinep saray tumutumbok kona ni Jesus a magsanyasot tan rwampuloꞌ sara, inumdeng ya si Pedro tan wana:

16 “Bubsat, matkap a matukid taw say naisurat sa Masanton Kasuratan nin nipadles na ni Adiꞌ David sa nipaninreg nan Ispirito nan Dios kona, maipaꞌkaꞌ kona ni Judas a syay nangaluyon konran saraytaw saray nanakep kona ni Jesus. 17 Gindat, kalamoꞌ miya ta napiliꞌ ya anamaet nin main nin kabiangan sa wantin pagtatrabaho para konan Dios,” wana ni Pedro.

18 Siti si Judas, nisaliw nan sayay pukok taw say kwartan nibayad ra kona sa dukaꞌ a gawaꞌ na. Itaw ya nin nipati ket sin naragrag ya, tinumrak yay tyan na tan linumwaꞌ a pait na. 19 Natandaan rayti nin nangyadiꞌ nin sarba ran tawodtaw sa Jerusalem ket pinangaranan rayaytaw a pukok nin Akeldama, a say rabay nan irgwen ket Lutaꞌ nin Dayaꞌ.^h

20 Ket wana et ni Pedro, “Say padles na ni Adiꞌ David ket mabasa sa libro nin Kanta a wanti a wana,

21-22 Kanyaꞌ nin matkap a mamiliꞌ atamo nin saya et nin kalamoꞌ mi nin tistigos a sinmubliꞌ yan mabyay si Jesus. Matkap a sya ket kala-kalamoꞌ miya nin nakudti-nakodtaw sin intiron panaon a iti ya intaw si Uunuren tamon Jesus, nangibwat sin binawtismwan naya ni Juan angga sin niyuliꞌ yayna sa langit.”

23 Ket nangirikuminda sara nin rwa ran lulalaki nin pamilian ra. Say ngaran ra ket Jose tan Matias. Konan siti si Jose, main nin manawag nin “Barsabas”; main et anamaet nin “Justo”. 24 Miꞌsa, dinmasal sara a wanra, “Catawan, tandaꞌ mo a linaman nin kanakman nin barang sayay tawo. Ipatandaan mo pa komi no siꞌno konran saraytin rwa a piniliꞌ mo 25 nin magꞌin nin apostol nin sumubray nin mangwaꞌ nin rispunsibilidad na ni Judas, a sya ket ginurutan nayti tan nako yayna sa peteg a kabagayan na.” 26 Nipadalan ra sa binunutan, ket si Matias a nabunot. Ket nilamoꞌ yayna konran labinsaya.