Nagꞌuray yay Ispirito nan Dios konran Mammemper kona ni Jesus
2
Sin pista ran Judio a mantawagen nin Pentecostesa, nididinep sara sa sayay bali a sarba ran mammemper kona ni Jesus nin itaw sa Jerusalem. 2 Kapingmatan, main nin narngeꞌ ran baraꞌmon rumaweswes nin pinasyan kasaw nin siri nin ibat sa langit, a siti ket narngeꞌ ya sa intiro nan bali a nididinepan ra 3 tan nakaꞌkit sara nin bilang dutan apoy nin bakas dilaꞌ a dinumpa-dumpaꞌ sa barang saya konra. 4 Ket nagꞌuray yay Ispirito nan Dios sa barang saya konra tan nakapagꞌirgo sara sa amboꞌ ran saritaꞌ nin diri banaꞌ sa pakababaꞌ a nibi nan Ispirito nan Dios.5 Sin sain, main saradtaw sa Jerusalem a Judio nin madibusyon konan Dios, baleꞌ abaw sara konra a nangibwat sa nagsikabarang a nunasyon. 6 Sin narngeꞌ raytaw a rumaweswes, nagsiarak saran nididinep itaw. Ket nakaꞌngap sara ngaꞌmin ta mangkarngeꞌ rasaray mammemper nin mampagꞌirgo sa saritaꞌ nan diri nin barang saya konra. 7 Sa nipakaꞌngap ran tuloy ket wanra, “Amboꞌ para a taga Galilea sarayti nin tutawo? 8 Ket paꞌno baleꞌ a mangkarnge-karngeꞌ tamoynan manꞌirgwen ra a irgo tamon diri? 9 Siꞌtamo nin iti ket main nin taga sa Partia, sa Media, sa Elam, sa Mesopotamia, sa Judea, sa Capadocia, sa Ponto, sa Asia, 10 sa Frigia, sa Pamfilia, sa Egipto. Main et nin taga sa lulugar sa nasyon nin Libya nin adani sa Cirene. Main anamaet et nin taga Roma nin Judio tan saray nasagyat sa pammemper nin Judio 11 tan main et nin tutawo sa Creta tan sa Arabia. Ket mangkarngeꞌ tamon mampagꞌirgo sara sa uirgo tamon diri maipaꞌkaꞌ sa makapakaꞌngap nin ginwa-ginwaꞌ nan Dios.” 12 Kai maꞌpos nin isipen nin barang saya a mampangyadiꞌ ket kai nin mabulsu-bulsot a pittepetan ran wanra, “Ani kadiꞌ a pipaꞌkaan nin sayti?”
13 Main sara baleꞌ a manuyaꞌ-tuyaꞌ nin wanra, “Nabok sarain tamoꞌ!”
Si Minsahi na ni Pedro a Si Cristo syay Tinudoꞌ nan Dios
14 Ket, nako ya sa adapan si Pedro nin kalamoꞌ nasaray labinsaya et nin apostoles, miꞌsa ya nagꞌirgo nin maksaw a wana,
“Kababalyan tan sarba moyo nin mampiikap iti sa Jerusalem, rumngeꞌ kamo pan maong tan andiꞌ kamo nin malingo maipaꞌkaꞌ sa mampangyadiꞌ. 15 Kai sara nin nabok ti nin tutawo nin bilang sa manꞌipaꞌkaꞌ moyo. Alas nwibi tamoꞌ et nin buklas! 16 No kai edet, saytin mampangyadiꞌ ket say nipadles na ni Prupita Joel sin nuꞌnan panaon a wana:
17 ‘Wana nin Dios, “Sa panaon nin adapen ana nin kalaꞌpusan,
ibi koya nin sibubulos a Ispirito ko sa sarba.
Ket saray uaꞌnak moyo, lulalaki man o bubbayi, mangipatandaꞌ sara liꞌ nin maipaꞌkaꞌ kongko.
Saray mangalalagoꞌ nin lulalaki, paꞌkitan kosara liꞌ nin bubagay a kai ra maꞌkit nin raruman tutawo, tan
saray mumasiken, manaynep sara liꞌ nin say ipataynep ko konra.
18 Oꞌ, mataman konran uaripen ko, lulalaki man o bubbayi,
ibi koya anamaet nin sibubulos a Ispirito ko sa saytaw liꞌ nin panaon,
ket mangipatandaꞌ sara nin maipaꞌkaꞌ kongko.
19 Mangipaꞌkit ako nin makapakaꞌngap nin mangya-mangyadiꞌ sa langit,
tan mumilagro nin pakaꞌkitan iti sa lutaꞌ.
Maꞌkit liꞌ sa lutaꞌ a dayaꞌ, apoy tan makubpal nin asok
20 tan sa langit, dumedlem ya liꞌ a awro
tan umudit ya liꞌ nin bilang dayaꞌ a bulan.
Ket konan siin, rinmateꞌ anaytaw si impurtantin panaon a siꞌkon si Dios
ket magꞌuray akon main nin pinasyan kaalakyan nin pakayadiꞌ.
21 Ket maisalba koyay siꞌnuman a kidawat nin ingangaꞌdo kongkon si Uunuren.” ’b 22 Kanyaꞌ nin rengꞌen rako pa, siꞌkamon kapada ko nin Israelita,” wana ni Pedro. “Si Jesus a taga Nazaret, yupaꞌ kona, nangwaꞌ ya a Dios nin mumilagro tan makapakaꞌngap a nangya-nangyadiꞌ. Tandaꞌ moyoynay maipaꞌkaꞌ sa sayti say manꞌibaritaꞌ ko ta iti nin mismo nin nangyadiꞌ sa lugar moyo. Nipatandaꞌ na nin Dios komoyo a si Jesus tawo naya nin nibakiꞌ na. 23 Ket siti si Jesus, nipagamet ya komoyo banaꞌ ta nidisisyon tan niplano nayna in nin gindat nin Dios. Ket nipapati moya konran amboꞌ nin Judio a nipasak raya sa kudos. 24 Baleꞌ pinasubliꞌ nayan mabyay nin Dios ket ginlat naya sa irab nin pagꞌin nin nati ta kai nin magwaꞌ a magꞌuray a patiti kona. 25 Oꞌ ta nisurat nayti e ni David sin nuꞌnan panaon a maipaꞌkaꞌ konan siti si Jesus,
‘Tandaꞌ ko nin kalamoꞌ koyan pirmi a Dios.
Iti yan pirmi sa abay ko kanyaꞌ nin kasa gapo nin makategeꞌ kongko.
26 Oꞌ a wanin kanyaꞌ nin maririket a kanakman ko,
tan mariga ako sa pagꞌiirgo ko;
ket, mataman no tawo ako tamoꞌ,
nin itaw ya tanay kararwa ko sa Hadesc,
tan kai mo nin iyaburoy a maumok yay lalaman nan ibabakiꞌ mon tutuo komo.
28 Nipatandaan ma kongko a dalan nin mangipunta kongko sa byay.d
Gawꞌen mon malipos ako nin ririket ta kalamoꞌ katan pirmi.’ ”e 29 Nituloy na ni Pedro maipaꞌkaꞌ konan siin ket wana, “Bubsat, tandaꞌ tamo anaod a si puon tamon si David, nati ya ket nitabon raya, tan say katutuꞌwan ket keꞌran na et nin pantyon na anggan sawanin. 30 Si David, tandaꞌ naytaw say nipangakoꞌ nan Dios kona ta nisamba nan Dios kona a ipataꞌgay naya liꞌ a saya konran puri na nin magꞌadiꞌ ya nin bilang sa nipagꞌadiꞌ na ni David.f Banaꞌ konan siin tan banaꞌ anamaet a saya yan prupita, kanyaꞌ nin 31 tandaꞌ naynan gindat a gawꞌen na nin Dios. Ket nibaritaꞌ nayna anaod nin gindat a maipaꞌkaꞌ sa isusubliꞌ nan mabyay nin Cristo nin nipangakoꞌ nan Dios, a wana
kai naya nin pinauryan nin Dios nin itaw ya tanay kararwa na sa Hades, tan a si lalaman na, kai na nin niyaburoy a maumok ya.”
32 Wana ni Pedro, “Ket matistigusan min sarba a si Jesus nin pinasubliꞌ nan mabyay nin Dios a manꞌibaritaꞌ na sa sain a wana. 33 Nikwa yayna sa sangkataꞌgayan nin lugar sa wanan nan Dios a syay Ama na, tan nibi nayan Ama kona a Ispiriton nipangakoꞌ na kona. Kanyaꞌ nin naimatunan tan narngeꞌ moyo sawanin a makapakaꞌngap nin nunangyadiꞌ a pinangibwat na ni Jesus nin nangyadiꞌ sa pakayadiꞌ nan Ispirito nan Dios. 34 Oꞌ ta main et nin nipadles na ni David, baleꞌ amboꞌ anaod nin say lalaman nan diri a mantukuyen na banaꞌ ta kai ya nin nuliꞌ itaw sa kamiꞌnan nan Dios. Nisurat na a wana,
‘Wana nin Dios konan Uunuren ko,
“Tumekreꞌ kadti sa pawanan ko
35 mintras a mampasukuen kosaran liso komo a kukalaban mo.” ’g
36 Banaꞌ ta wanin,” wana ni Pedro, “matkap a sarba tamon Israelita ket, matandaan tamon maong a sitaw si nipangakoꞌ nan Dios ket ginwaꞌ nayan Uunuren tan Cristo. Sya si Jesus nin nipasak moyo sa kudos!”
37 Natinreg nin maong a kanakman ran tutawo sa saytin narngeꞌ ra ket wanran nitepet kona ni Pedro tan konran raruman apostoles, “Bubsat, ani edet a gawꞌen mi?”
38 Ket niꞌbat na ni Pedro, “Pagbabawian moyoynay kukasalanan moyo tan pabawtismo kamon mangipaꞌkit a manꞌakuen moyayti si Jesu-Cristo. Gawꞌen moyoyti ta pigaw nin pirdunawen nan Dios a kukasalanan moyo, tan ibi nayan rigalo komoyoy Ispirito na. 39 Anaod, siin a nipangakoꞌ na para sa kaabigan moyo tan ran saray puri moyo, tan mataman saray tutawodtaw sa adayoꞌ nin lulugar. Saytin nipangakoꞌ nan Uunuren a si Dios tamo ket para sa barang sayan sagyaten na nin umarak kona.”
40 Abaw et a nisala-salaysay na ni Pedro ta pigaw nin patutuꞌwan nay nibari-baritaꞌ na, tan binari-baritaan nasara a wana, “Palꞌisan moyo saray tutawo konan sitin panaon a madusa sara liꞌ banaꞌ sa maraet a gugawaꞌ ra.” 41 Ket abaw saray namper sa nibaritaꞌ na ni Pedro, ket nipabawtismo sara. Konan sitaw nin awro, nalamuꞌnan saran magtulunribo a mammemper.
Say Kabibyay ran Mammemper
42 Inawru-awro, masuet saran nangrengeꞌ sa uakay ran apostoles. Nilalangen-langen sara nin sarba ran mammemper, nidudungu-dungo saran manganh, tan pirmi sara tanan dumasal.
43 Ket napnoꞌ saran pangingibilang a tutawo konan Dios ta abaw a ginwa-ginwaꞌ ran apostoles nin makapakaꞌngap tan pammatutuo nin maipaꞌkaꞌ konra. 44 Mididinep saran pirmii a mammemper tan ikon nin sarba a main nin saya tan saya 45 ket nilakuꞌ-lakoꞌ ray main tan kukayamanan ra, ket say naglakuan nibi-nibi ra konran kalalamoꞌ ra dipindi sa pakatkapan nin barang saya. 46 Inawru-awro saran nipapasayadtaw sa sakop nan Timplo nin nangrayu-rayo konan Dios. Nidudungu-dungo saran nangan-nangan sa pupammali ra, a pinasyan ririket tan mabulos a nakem ran nangitao sa saya tan saya. 47 Nangrayo saraynan nangrayo konan Dios, tan saray tutawo, kaririktan rasaray mammemper. Ket si Uunuren, nilamoꞌ nasara konra nin inawru-awro a manꞌisalba na.