Ginwa-ginwaꞌ 3

Pinaꞌget nan Ispirito a Pagtitistigos ra ni Pedro

Sayay awro, nako saradtaw sa sakop nan Timplo si Pedro tan si Juan, ta udas nin kadadasal itaw; magꞌalas tres nin yabina. 2 Sa purta sa Timplo a mantawagen nin “Purtan Mabista”, main itaw nin sayay tawon lupoy nangibwat et sin niyanak ya. Sitin lupoy, ikaꞌ rayan inawru-awrodtaw ta pigaw nin kipayabor ya konran tutawon sumrep sa sakop nan Timplo. 3 Sin naꞌkit nasara si Pedro tan si Juan nin adap itaw sa sakop nan Timplo, nikipayabor ya konra. 4 Pinastang rayan maong, miꞌsa wana ni Pedro kona, “Pastangen rakami!” 5 Ket pinastang nasara tan taga-tagaꞌnan nay ibi ra kona. 6 Wana et ni Pedro, “Kasan balitok, ni pirak ko; no ani a main ko, siin a ibi ko komo. Sa pakayadiꞌ na ni Jesu-Cristo nin taga Nazaret, lumalako ka.” 7 Ginaꞌgetan naya ni Pedro sa wanan nin takyay tan pinaꞌdeng naya, ket tampor ginumsen a ayi tan bisit na. 8 Ket nakaꞌdeng ya tan linmala-lalako ya. Nayi ya konra nin sinumrep sa sakop nan Timplo, a luksu-lukso ya tan manraywe-raywen nayay Dios. 9 Saray tutawodtaw, naꞌkit ra a manlumalako ya tan manraywen nayay Dios. 10 Sin naalilbiꞌ rayan tutawo a syaytaw si kipayabor nin nakatekreꞌ itaw sa mantawagen nin Purtan Mabista sa Timplo, wanin anan tuloy a nipakaꞌngap ra.

Si Minsahi na ni Pedro sa Timplo

11 Nakagaꞌget yaytaw si tawo konra ni Pedro tan Juan, a itaw sara sa lugar sa Timplo a mantawagen nin “Balkon na ni Solomon”, sin niririrngan saran nalayo nin inmarak konra a tutawo banaꞌ ta nakaꞌngap saran tuloy. 12 Sin naꞌkit nasara ni Pedro, wana konra,

“Siꞌkamon kapada kon Israelita, ambaleꞌ nin nakaꞌngap kamon tuloy tan ambaleꞌ nin nakamuliteꞌ kamo komi? Manꞌipaꞌkaꞌ moyo para a nakalalako yayti nin tawo nangibwat sa pakababaꞌ mi o banaꞌ ta rilihyuso kami? 13 Si Dios a syay nagsirbyan ra ni Abraham, Isaac, tan Jacob, tan saray pupuon tamo^a, nipadar nan pinasyan kataꞌgayan na nin si Aripen nan si Jesus. Baleꞌ sya, nipagamet moya konran saray iti sa uray, tan ginurutan moya sa adapan na ni Pilato. Disidido nayan bulusan sin saytaw si Jesus, 14 baleꞌ siꞌkamo, kai moya nin inalilbiꞌ, sya a liso nin naitalaga konan Dios tan sya nin kasa gapon kasalanan. Dinawat moyoyna edet nin sayay priso nin mangmamatin tawo a ibulos na ni Pilato.^b 15 Pinati moya si Jesus a Puon nin Byay, baleꞌ pinasubliꞌ nayan mabyay nin Dios. Ket matistigusan mi nin tutuo in. 16 Ket banaꞌ sa pagmamatalek mi sa no siꞌno ya si Jesus, sitin tawo nin tandaꞌ moyon gindat a lupoy, makalalako yayna. Oꞌ, nangyadiꞌ ti banaꞌ sa pagmamatalek mi kona ni Jesus, ket bilang sa mangkiten-kiten moyo sawanin, limpyo yaynan lisoytin tawo.

17 Bubsat, tandaꞌ ko a siꞌkamo tan ran saray magꞌuuray, ginwaꞌ moyo in si nipapati moya si Jesus ta nagkurang a pakataros moyo. 18 Sin saytaw et sin nuꞌnan panaon, nipatandaan rayaynan sarba ran prupita a minsahi nan Dios a si sya a Cristo nin nipangakoꞌ na nin magꞌadiꞌ ket mapadyaꞌdyaꞌ ya, ket sawanin natukid ana in sa ginwaꞌ moyo kona ni Jesus. 19 Kanyaꞌ nin matkap a magbabawiꞌ kamo sa kasalanan moyo tan sumubliꞌ kamo konan Dios, ta pigaw nin mapirdunayna a kukasalanan moyo, 20 ket gawꞌen nan Dios a mainawnan a kukanakman moyo tan ibakiꞌ nayadti si Jesus, a syay Cristo nin tinudoꞌ naynan gindat nin adiꞌ a magꞌuray komoyo. 21 Matkap a itaw ya et yapoꞌ sa langit, anggan say sarba ket pinabaꞌyo nayna nin Dios bilang sa nipaibaritaꞌ nayna sin saytaw et konran prupita nin naitalaga kona. 22 Bilang wadiꞌ si Moises, wana,

‘Mangipadar ya liꞌ komoyo si Uunuren tamon Dios nin sayay Prupita nin bilang sa nipangibakiꞌ na kongko. Saya ya liꞌ nin kapada tamon Israelita. Matkap nin rengꞌen moyon maong a sarba nin ibaritaꞌ na komoyo. 23 Baleꞌ si siꞌnuman liꞌ a kai nin mangimbabaet sa irgo na, kai yayna liꞌ nin maibilang konran tutawo nan Dios tan madusa yan mati.’

Wanin a wana ni Moises sin saytaw et.” ^c

24 Wana et ni Pedro, “Anaod, saray raruma et nin prupita, mangibwat kona ni Samuel pati sara et ngaꞌmin a sinmunor kona, nipadles ran lamang ti say mampangyadiꞌ sawanin. 25 Siꞌkamo, main nin biang moyo sa sayti sawanin ta puri rakamo nin sarain tan kiramaꞌ kamo sa nipangakoꞌ nan Dios sin saytaw et konran puon tamo. Nibaritaꞌ na kona ni Abraham, ‘Mangibwat konan puri mo, bindisyunan ko a sarban tutawodti sa mundo.’^d 26 Kanyaꞌ nin,” wana ni Pedro, “sin nipadar naya tan nibakiꞌ nayadti nin Dios a Aripen nan si Jesus, kontamon Judio ya nin nuꞌnan nako ta pigaw nin bindisyunan natamo yupaꞌ sa pangwaꞌ na a gurutan ana nin barang saya kontamo a dukaꞌ a kabibyay.”