Dinakep sara si Pedro tan si Juan
4
Mangkiirgo sara et si Pedro tan si Juan konran tutawo sin main nin inmarak konra nin pupadiꞌ, si upisyal ra nin gwardya sa Timplo tan main anamaet nin Saduseoa. 2 Pinasya nin sager ra konra ni Pedro tan Juan banaꞌ ta manꞌibaritaꞌ ra a pinasubliꞌ nayan mabyay nin Dios si Jesus ket banaꞌ kona pasublien nasara liꞌ nin mabyay a nunati. 3 Nipadakep rasara si Pedro tan Juan, ket banaꞌ ta mangkumatpaapon ana, nipukok rasarayna angga sin buklas. 4 Wanin man, abaw sara konran saray nakarngeꞌ konra ni Pedro a namper sa wanra. Ket nagꞌin maglimanribo saray lulalaki tamoꞌ nin mammemper.5 Sin sinmunor nin awro, nididinep saradtaw sa Jerusalem a magꞌuuray ran Judio, saray Mangatuntawo ra tan saray Madudunong sa Gugan-gan. 6 Itaw ya anamaet si Anas a syay Sangkataꞌgayan nin Padiꞌ, si Caifas, si Juan, si Alejandro, tan raruma et nin myimbron pamilya nan si Sangkataꞌgayan nin Padiꞌ. 7 Pinaadap rasara konra si Pedro tan Juan tan nitepet ra konra, “Yupaꞌ sa ani nin pakayadiꞌ moya nin napaandaꞌ ti si lupoy? Siꞌno anamaet a nami nin siin nin pakayadiꞌ komoyo?”
8 Ket, si Pedro, a mampagꞌurayan naya nin Ispirito nan Dios wana,
“Siꞌkamo nin pupangulo tan mangatuntawo, 9 manꞌusisaen rakami maipaꞌkaꞌ sa maabig a ginwaꞌ mi konan siti si gindat nin lupoy. Mangkalutkuten moyo no paꞌno ya nin napaandaꞌ. 10 Edet, siꞌkamo tan sarba ran saray kapada tamon tagadti sa Israel, manepeg a matandaan moyoyti: Siti nin tawo a gindat ket lupoy ya, sawanin iti ya sa adapan moyo nin limpyon manꞌumdeng ana banaꞌ sa pakayadiꞌ na ni Jesu-Cristo nin taga Nazaret. Sya si Jesus nin nipasak moyon pinati sa kudos; wanin man, pinasubliꞌ nayan mabyay nin Dios. 11 Kapadan mabasa tamo sa Masanton Kasuratan,
‘Si bato nin nibilang moyon kai nin mausar nin siꞌkamon karpintiron namanday,
Sitaw a nagꞌin nin sangkaimpurtantiwan sa pammaꞌdeng.’b
Siin nin bato ket si Jesus. 12 Si Jesus tamoꞌ a makapamakandaꞌ nin byay tamo, banaꞌ ta iti sa intiron sangkamundwan, kasaynan siꞌnuman nin raruma et a nibi nan Dios nin makapangisalba kontamo.”
13 Nakaꞌngap saran tuloy a pupangulo ran Judio sin naꞌkit ran pinasyan tepel ran magꞌirgo ni Pedro tan Juan, anta tandaꞌ ran kasan inadal ra tan kaꞌbawan sara tamoꞌ nin tawo. Ket napanemtem ra a kalalamoꞌ nasara intaw ni Jesus. 14 Konan siin, kasan naibaritaꞌ ran pupangulo nin kuntra konra ta mangkiten-kiten rayaytaw si tawon napaandaꞌ nin nakaꞌdeng sa dani ra ni Pedro tan Juan. 15 Kanyaꞌ nin pinaliwaꞌ rasara yapoꞌ nin pupangulo sa kwarto nin Kunsiho tan nagꞌiirgo sara. 16 Wanra, “Ani a gawꞌen tamo konra? Tandaꞌ nin sarba nin iti sa Jerusalem a gawaꞌ rayaytaw si amboꞌ nin basta-basta nin milagro. Ket kai tamo nin maibudiꞌ a katutuꞌwan. 17 Say mabista, ta pigaw nin kai ana nin maitayak et konran tutawo a manꞌiyakay ra, imaꞌnwen tamo sara nin mangibari-baritaꞌ nin maipaꞌkaꞌ konan siin si wanran syay Cristo a nipangakoꞌ.”
18 Ket kinayaban rasara anamanaet si Pedro tan binibilin rasara a wanra, “Andiꞌ kamoyna gapo nin mangibari-baritaꞌ nin maipaꞌkaꞌ konan siin kano a Cristo.” 19 Ket wanran inumbat ni Juan tan Pedro, “Siꞌkamo ana a manimbang no aya kasi a matunong sa pangingikit nan Dios: Si tumumbok kami komoyo o kona nin Dios? 20 Anaod, kai mi nin magwaꞌ a tumumbok sa wamoyo a andiꞌ mi ana nin ibari-baritaꞌ a naꞌkit tan narngeꞌ mi nin maipaꞌkaꞌ kona ni Jesus.”
21 Sin sain, mas lalo rasara et yapoꞌ nin liniliꞌmo nin saray pupangulo si Pedro, miꞌsa rasarayna nin binulusan ta kasan maꞌkit ran padalan a madusa rasara; lalo ta saray tutawo ket manraywe-raywen rayay Dios banaꞌ konan 22 si nangyadiꞌ a pakaꞌkitan nin pakayadiꞌ na. Saya et, sitaw si tawo nin napaandaꞌ ket masurok anan aꞌpat a puloꞌ a taon nin lupoy ya.
Mampagsenen a Pagmamatalek ran Mammemper
23 Sin sain, sin binulusan sarayna si Pedro tan Juan, sinmubliꞌ saran tampor konran kalalamoꞌ ra tan nibaritaꞌ ra konra a wanran Pupangulon Pupadiꞌ tan saray Mangatuntawon iti sa uray. 24 Sin narngeꞌ ra a wanra, nipapasaya saran dinmasal konan Dios a wanra, “O Catawan a main nin kapangyadian sa sarba, siꞌkay namarsa nin langit tan nin lutaꞌ, pati say taaw tan say sarba nin main sa sayti.c 25 Siꞌkan lamang taw si namagꞌirgo konan si puon min si David. Saya yan aripen mo nin sa nipaninreg nan Ispirito mo kona ket wana,
‘Pinasyan bayani ra nin saray kai nin magtandaꞌ konan Dios,
tan mikukumplot sara sa dukaꞌ a gawaꞌ, baleꞌ kasa nin piratꞌanan nin sayti.
26 Saray uadiꞌ tan saray pupangulo sa nagsikabarang nin lugar iti sa mundo,
sisasadyaꞌ sarayna ta nipapasaya sara
ta pigaw nin kuntrawen raya a Dios tan a Cristo nin nipangakoꞌ na.’ d
27 Anaod, nangyadiꞌ anan talaga in iti sa sitin syudad! Si Adiꞌ Herodes tan si Gubirnador Poncio Pilato tan saray kalalamoꞌ ran amboꞌ nin Judio, tan pati anamaet nin saray kapada min Israelita, nikukumplot sara nin patyen ya a Aripen mon nitalaga nay byay na komo, sya si Jesus, tan sya a tinudoꞌ mo nin Cristo.e 28 Baleꞌ, sain, iti anan gindat sa makapangyayadiꞌ nin plano mon gawꞌen ket nigagara mon talaga nin matukid. 29 Ket sawanin, Catawan, tandaꞌ moy pangliliꞌmo ra komi. Kanyaꞌ nin tulungan rakami kumon nin siꞌkamin uaripen mo, a kai kami nin lumiꞌmo nin ipatandaꞌ mi a saritaꞌ mo. 30 Ipaꞌkit mo pa a pakayadiꞌ mo nin mamaandaꞌ konran main nin masakit, tan aburuyan rakami pan makagwaꞌ nin makapakaꞌngap nin pammatutuo a mangingilalaman kami komo tan raruma et nin makapakaꞌngap nin bubagay, yupaꞌ sa pakayadiꞌ nan Aripen mon nitalaga nay byay na komo, si Jesus.”
31 Kayadiꞌ ra nin dinmasal, naeyeg yay bali nin kamiꞌnan ra. Sarba ra ket liso nan nagꞌurayan nin Ispirito nan Dios, ket pinasyan tepel ran nangibari-baritaꞌ nin minsahi na.
Say Mararos nin Pikakalamoꞌ ran Mammemper
32 Sarba ran saray mammemper, sayan-saya a kaisipan tan apes ra, tan kasan siꞌnuman nin nangikwinta a say main na ket para tamoꞌ nin bukod kona, no kai edet, para sa sarba. 33 Saray apostoles, naiduma a pakayadiꞌ ra sa pangibari-baritaꞌ a pinasubliꞌ nayan mabyay nin Dios si Uunuren tamon Jesus. Ket si Dios, nibuꞌboꞌ nay tulong na konran sarba ran mammemper. 34 Kasa gapo nin nagkurang konra sa pakatkapan ra ta saray main nin lutaꞌ o bali ket nilakoꞌ rayti, tan say naglakuan, 35 nibi ra konran apostoles nin nibi-nibi ra konran saray mampagkakurang sa matkap ra.