3 Ket si Pedro wana, “Siꞌka, Ananias, inaburuyan man nagꞌuray sa kanakman mo si Satanas ta mampibulaꞌ-bulaꞌ ka konan Ispirito nan Dios sa wamo nin sayti ngaꞌmin a naglakuan moyo. 4 Sin baꞌyo moya nin nilakoꞌ a lutaꞌ moyo, iti ana komoyo no ilakoꞌ moya o kai ta ikon moya anaod, tan mataman sin nalakoꞌ moyayna, iti et a lamang komoyo no ani a gawꞌen moyo sa naglakuan ta ikon moyo. Ket ambaleꞌ a naisip mon gawꞌen ti? Sa saytin ginwaꞌ mo, amboꞌ tamoꞌ nin sa tutawo ka nin nibulaꞌ-bulaꞌ no kai mas lalo ana konan Dios.” 5 Sin narngeꞌ nayti ni Ananias, natumba ya ket nati ya.

Ket pinasyan nikabigraꞌ ran sarba ran nakatandaꞌ sa nangyadiꞌ. 6 Saray tububaꞌyo nin itaw, pinunggos rayay bangkay na tan nikaꞌ raya nin nitabon.

7 Sin tuloy udas ana angangko a linmabas, rinmateꞌ ya si Safira, a kai na et nin tandaꞌ a nangyadiꞌ. 8 Wana ni Pedro kona, “Siꞌka, Safira, sayti tamoꞌ para ngaꞌmin a naglakuan moyo konan lutaꞌ moyo?”

Ket niꞌbat na ni Safira, “Oꞌ, sain tamoꞌ” wana.

9 Wana et ni Pedro, “Ambaleꞌ a nikumplot kamon mitraasawa a ikwa moya sa sayay panunubok a Ispirito nan Uunuren tamo? Rengꞌen mo, manrumateꞌ saraynay nako nin nanabon konan asawa mo ket sumunor ka anamaet nin ikaꞌ ra nin itabon.”

10 Konan siin a lamang, natumba ya si Safira ket nati ya. Sin rinmateꞌ saraynaytaw saray tububaꞌyo, naꞌkit ran nati ya si Safira ket inalsa raya tan nikaꞌ raya nin nitabon sa abay nan nanabunan konan asawa na. 11 Ket sin sain, saray sarba ran mammemper itaw tan saray raruma et nin nakarngeꞌ sa nangyadiꞌ, pinasya nin liꞌmo ra.

12 Ket abaw a ginwa-ginwaꞌ ran saray apostoles nin makapakaꞌngap nin pammatutuo nin maipaꞌkaꞌ konra a naimatunan ran tutawo. Sarba ran saray mammemper, itaw saran pirmi nin mididinep sa “Balkon na ni Solomon” itaw sa Timplo. 13 Saray amboꞌ nin mammemper, maliꞌmo sara nin kilangen-langen konra. Wanin man, saray tutawo ket ataꞌgay a pangingikit ra konra. 14 Ket inmabaw saraynan inmabaw a nailamoꞌ konra nin mammemper kona ni Uunuren a Jesus, lulalaki tan bubbayi. 15 Banaꞌ sa mampangya-pangyadiꞌ, nikaꞌ-nikaꞌ rasaran tutawo sa rigrig nin dudalan a main nin masakit a nakaidaꞌ sara sa katri tan sa apay ra, ta pigaw nin mataman tana nin maalinawan nasara ni Pedro no lumabas ya. 16 Abaw sara et a tutawon nangibwat sa bubabali nin iti sa libed nin Jerusalem a nakodtaw nin inawit-awit rasaray main nin masakit tan saray nasrepan nin dukaꞌ a ispirito. Ket, sarba ra ngaꞌmin ket napaandaꞌ.

17 Sin sain, pinasyan imbel nan Sangkataꞌgayan nin Padiꞌ tan saray kalalamoꞌ na nin myimbro sara nin grupo ran Saduseo konran apostoles, kanyaꞌ nin nangimey sara. 18 Nipadakep rasaray apostoles miꞌsa rasara nin nipapriso. 19 Baleꞌ sin yabi, inabryan nayan sayay anghil nan Dios a priswan tan pinaliwaꞌ nasara. Wana konra, 20 “Mako kamodtaw sa sakop nan Timplo tan ibari-baritaꞌ moyo konran tutawo a maipaꞌkaꞌ konan siti si byay a iti kona ni Jesus.” 21 Tinmulok sara konan anghil a apostoles. Sin mangkumalaway ana, nako sara sa sayay lugar itaw sa Timplo tan nangyakay sara.

Sin sain anamaet, nididinep saray Sangkataꞌgayan nin Padiꞌ tan kalalamoꞌ na, tan miniting rasaray myimbro nan Kunsiho tan ngaꞌmin ran Mangatuntawo ran Judio, miꞌsa sara nin namakiꞌ nin gwardya nin keen rasara nin kalapen a apostoles sa priswan. 22 Baleꞌ sin rinmateꞌ saradtaw sa priswan a gwardya, kasa saraynadtaw a apostoles. Kanyaꞌ nin sinmubliꞌ sarayna tan wanra, 23 “Sin rinmateꞌ kamidtaw sa priswan, sarado yan maong tan itaw saran mampaggwardya sa purta a gwardya. Baleꞌ sin inabryan miya a namukukan konra, kasa gapo ni sayan tawodtaw sa luob!” 24 Sin narngeꞌ rayti nin si upisyal ran gwardya sa Timplo tan saray Pupangulon Pupadiꞌ, nabagyaꞌ sara tan nangisip sara no ani a piratꞌanan liꞌ nin sayti. 25 Kaaram, main nin tawon rinmateꞌ nin wana konra, “Saraytaw saray nipriso moyo, itaw sara sa sakop nan Timplo nin mampangyakay konran tutawo.”

26 Kanyaꞌ nin nako yadtaw a upisyal tan saray gwardya konran apostoles ta pigaw nin dakpen rasara. Baleꞌ kai rasara nin pinwirsa ta maliꞌmo saran bangliꞌ no kudas-kudasen rasara nin tutawo.

27 Niyadap rasaray apostoles konran pupangulo ket si Sangkataꞌgayan nin Padiꞌ wana konra,

28 “Mairot min niyawaꞌ komoyo a pangangakay moyo nin maipaꞌkaꞌ konan siin a Cristo kano. Baleꞌ kiten moyoy ginwaꞌ moyo! Nitayak moyoynay akay moyodti sa Jerusalem, tan mampaliwaen moyo nin ubatan mi a patiti na.”

29 Baleꞌ wana ni Pedro tan saray raruman apostoles,

“Anaod, matkap a si Dios a tumbuken mi amboꞌ a tutawo! 30 Si Dios nin rinayo ra nin pupuon tamo, nipataꞌgay naya si Jesus a dinuksaꞌ moyon pinati nin nipasak sa sayay kayo.^a 31 Nikwa naya nin Dios sa lugar nin sangkataꞌgayan a kagalangan itaw sa wanan na, a syay Pangulo tan Mangingisalba ta pigaw nin mabyan atamon pagkanawanawan magbabawiꞌ a siꞌtamon puri na ni Israel ket mapirduna a kasalanan tamo. 32 Ket tistigos kami sa sain nin nunangyadiꞌ; wanin ya anamaet a Ispirito nan Dios nin mampiikapen nan Dios konran saray mantumulok kona.”

33 Sin narngeꞌ ran pupanguloyti nin wana ni Pedro, wanin ana a sager ra, ket nagꞌiirgwan ra nin ipapati rasaraynay apostoles. 34 Baleꞌ main nin saya konran pupangulo a inumdeng, nin say ngaran na ket Gamaliel. Sayay Pariseo yayti nin madunong ya sa Gugan-gan ran Judio tan ataꞌgay a pangingikit ran sarba ran tutawo kona. Ket niparikor nasara yapoꞌ a apostoles, 35 miꞌsa wana konran kalalamoꞌ nan pupangulo,

“Kapada ko nin Israelita, pakandaen tamo a gawꞌen tamo konran saraytin tutawo. 36 Bilang wadiꞌ, sin amboꞌ et nin naꞌteng, main yaytaw si tawon say ngaran na ket Teudas, nin sa wana saya yan alaki nin tawo. Ket main nin magꞌaꞌpat a yasot sara a naayat na nin nikikalamoꞌ kona. Baleꞌ napati ya. Nisisyak saray tumutumbok kona, ket say nitaranaꞌ na naꞌrep. 37 Kaaram, main yaytaw anamaet si sayay taga Galilea nin say ngaran na ket Judas sin kapresan nin sinsus para sa pammayad nin buis. Main saraytaw anamaet saray naayat nin nikikalamoꞌ kona. Baleꞌ napati ya anamaet nin lamang ket nisisyak saran lamang a tumutumbok na. 38 Kanyaꞌ nin sawanin, si ibaritaꞌ ko maipaꞌkaꞌ konran saraytin tutawo ket si pauryan tamo sara tamoꞌ. No tawo tamoꞌ a ibwatan nin sain nin gawaꞌ tan akay ra, mangangga liꞌ sa kasa. 39 Baleꞌ no karabayan nan Dios, kai tamo sara nin mapaed, tan lumiwaꞌ et a mangkuntrawen tamoyay Dios.”

Ket sinunor ran pupangulo a wana ni Gamaliel. 40 Say ginwaꞌ ra tana, nipakayaban rasaray apostoles, nipasanet-sanet rasara, tan inimaꞌno rasara anamana nin mangyakay nin maipaꞌkaꞌ kona ni Jesus, miꞌsa rasarayna nin binulusan. 41 Nibwat saraynadtaw a apostoles. Maririket sara a nikwinta nan Dios a maikanaꞌ saran mangirangep nin kadingꞌeyan alang-alang kona ni Jesus. 42 Inawru-awron itaw sara et a lamang sa sakop nan Timplo tan sa bubali, nin nituloy ray pangangakay tan pangingipatandaꞌ ra a si Jesus, syay Cristo nin nipangakoꞌ nan Dios.