Say Nipamiliꞌ nin Pito ran Mamaga sa Pakatkapan ran Mammemper
6
Ket sin saytaw nin panaon sin manꞌumabaw saraynan manꞌumabaw a tumutumbok kona ni Jesus, nagriklamo saray Judio nin say irgo ra ket Griego kuntra konran saray puron Judio. Wanra a saray bubbayin balo sa grupo ra ket kai sara nin mangkabyan nin manꞌibin tulong inawru-awro. 2 Kanyaꞌ nin dininep rasaran labinrwan apostoles a sarba ra ngaꞌmin nin mammemper tan nibaritaꞌ ra konra, “Bubsat, amboꞌ nin mabista a pauryan mi a pangangakay mi nin say manꞌibaritaꞌ nan Dios ta pigaw nin pagawan mi a pangingitayak nin tulong. 3 Kanyaꞌ nin mamiliꞌ kamo nin pito ran lulalaki komoyo, nin mabistay pitatawo ra, madudunong sara tan peteg a mampagꞌurayan nasara nin Ispirito nan Dios, ta pigaw nin sara a gumwaꞌ sa sain nin trabaho. 4 Ket siꞌkami, maiꞌpos mi a udas mi sa kadadasal tan sa pangangakay nin minsahi nin nangibwat konan Dios.”5 Kumpurmi sara ngaꞌmin a mammemper sa saytin wanra nin apostoles. Ket namiliꞌ sarayna tan sarayti a piniliꞌ ra: Si Esteban, a sya, magsen a pagmamatalek na konan Dios tan peteg a mampagꞌurayan naya nin Ispirito nan Dios; si Felipe, si Procoro, si Nicanor, si Timon, si Parmenas, tan si Nicolas a taga Antioquia nin amboꞌ yan Judio baleꞌ gindat yaynan mantumumbok sa pammemper ran Judio. 6 Niyadap rasara konran apostoles, ket nidasalan rasara tan nipababo ray gamet ra konra.
7 Ket say minsahi nin nangibwat konan Dios, naitayak anan naitayak, tan inmabaw saraynan inmabaw a tumutumbok kona ni Jesus itaw sa Jerusalem tan abaw sara anamaet a pupadiꞌ nin tinumper.
Ginuyugoy yan Niyadap konan Kunsiho ran Judio si Esteban
8 Binindisyunan tan binyan nayan pakayadiꞌ nin Dios si Esteban, ket nangwa-nangwaꞌ ya nin pakaꞌkitan nin pakayadiꞌ nan Dios tan raruma et nin makapakaꞌngap a bubagay sa busel ran tutawo. 9 Baleꞌ main nin tutawo nin nanguntra kona ni Esteban. Myimbro sara nin sayan dupong ran Judio a mantawagen nin Saray Amboꞌ Ana nin Aripen a taga sara Cirene, taga syudad nin Alejandria, taga prubinsyan Cilicia tan taga Asia. 10 Baleꞌ kai raya gapo nin nadaeg si Esteban banaꞌ ta say kadunungan na ket ibat konan Ispirito nan Dios. 11 Ket banaꞌ ta wanin, nangupaꞌ sara nin tutawon mamaraktika nin bulaꞌ-bulaꞌ a kuntra kona ni Esteban. Saraytin inupaan, nibari-baritaꞌ ra a narngeꞌ raya si Esteban nin nagꞌirgon dukaꞌ nin kuntra kona ni Moises tan konan Dios.
12 Yupaꞌ sa wanin, pinasager rasara kona ni Esteban a tutawo, saray Mangatuntawo ran Judio tan saray Madudunong sa Gugan-gan ran Judio. Kaaram, inataki raya tan ginuyugoy rayan nikaꞌ niyadap konan Kunsiho. 13 Nangalap sara anamanaet nin tutawon namaraktika nin bulaꞌ-bulaꞌ nin kuntra kona ni Esteban. Wanra, “Siin si Esteban, kai ya nin tumgen nin magꞌirgon dukaꞌ maipaꞌkaꞌ konan si Timplo nan Dios tan sa Gugan-gan na. 14 Narngeꞌ mi nin nibaritaꞌ na a siin kano si Jesus a taga Nazaret ket yubaen nayayti si Timplo tamo tan silyan na a naimatawan tamon kaugalian a nangibwat kona ni Moises.” 15 Pinastang rayan maong si Esteban nin sarba ra nin itaw, ket naꞌkit ra a say rupa na kapadan bakas nin rupa nan sayay anghil.