Pasublien yan Mabyay a Cristo
28
Napalabas anay Awron Painawa. Sin parbangon nin ararem nin Linggo, si Maria a taga Magdala tan si kapada nan Maria, kinaꞌ raya nin kinikit a nanabunan kona ni Jesus. 2 Kapingmatan, bigraꞌ yan rinmayon nin maksaw. Ket, si sayay anghil nan Dios kinmayupaꞌ yan nangibwat sa langit; nitulin nayay baton sadaꞌ nan pantyon miꞌsa naya nin tinekrean. 3 Makapulag sa salag nin baraꞌmon kimat a bakas na tan say seket na ket pinasyan putiꞌ. 4 Sin naꞌkit rayan gwardyan sundaloꞌ, nangingintar sara sa liꞌmo ra tan namaksir saran natumba sa lutaꞌ.5 Ket sin wanin, wanan anghil konran bubbayi, “Andiꞌ kamo nin maliꞌmo. Tandaꞌ kon mantikapen moya si Jesus nin sitaw si nipasak sa kudos. 6 Kasa yaynadti ta sinmubliꞌ yan mabyay a bilang sa wana komoyo sin saytaw. Paradti ta pigaw nin maꞌkit moyay nangipaidaan kona. 7 Sawanin, mako kamoynan apurawen moyo ta ibaritaꞌ moyoyti konran tumutumbok na, ‘Sinmubliꞌ yaynan mabyay ket muꞌna yaynadtaw sa Galilea. Itaw ket maꞌkit moya.’ Andiꞌ moyo nin lingwanan ti nin nibaritaꞌ ko komoyo.”
8 Ket nangapura saraynan nibwat itaw sa nanabunan. Maliꞌmo sara baleꞌ pinasyan ririket ra. Palayo ran nako nangibaritaꞌ konran tumutumbok na ni Jesus.
9 Kapingmatan sinnaꞌ nasara ni Jesus. “Kumusta! Ani a idya moyo?” wana konra. Inmarak sara kona ni Jesus, nilukob ra sa adapan na tan ginaꞌgetan ray ayi na tan rinayo raya. 10 “Andiꞌ kamo nin maliꞌmo,” wana konra. “Mako kamo konran tumutumbok ko nin para kongko ket bubsat kosarayna tan ibaritaꞌ moyon mako sara sa Galilea ta itaw kami nin misisnaꞌ.”
11 Sin nako saraynay bubbayi, main konran gwardya sa nanabunan a nako sa syudad tan nibaritaꞌ ra konran Pupangulon Pupadiꞌ a ngaꞌmin nin nangyadiꞌ. 12 Saray Pupangulon Pupadiꞌ nagꞌiirgwan ra konran Mangatuntawo a gawꞌen ra, miꞌsa rasara nin binyan nin alakin pasuksok a sundaloꞌ. 13 Wanra konra, “Ibaritaꞌ moyoy wanti e konran tutawo: ‘Sin nakakaꞌlek kami, nako raya nin tinakaw nin tumutumbok na ni Jesus a bangkay na.’ 14 Ket no bilang wadiꞌ a matandaan nayti nin gubirnador, andiꞌ kamo nin masalak ta siꞌkami anay makauray nin umbat a mapagustwan ya ta pigaw nin kai kamo nin mangno.”
15 Kanyaꞌ nin saray sundaloꞌ ket kinalap ray kwarta tan ginwaꞌ ray niyakay konra. Ket anggan sawanin, siin et a isturya nin nangyadiꞌ a manꞌibari-baritaꞌ ran Judio.
Ibatiꞌ na konran Tumutumbok na a Nakaibakian na nin Cristo
16 Saray labinsayan tumutumbok na ni Jesus, nako sara sa talugtog itaw sa Galilea a bilang sa nibaritaꞌ nayna nin gindat ni Jesus konra. 17 Sin naꞌkit rayadtaw si Jesus, rinayo raya, baleꞌ main konra a nagdwadwa a si Jesus ya nin pageꞌ. 18 Kinmadani ya konran saray labinsaya si Jesus tan wana, “Sarban pakayadiꞌ sa langit tan sa lutaꞌ ket naibi ana kongko. 19 Kanyaꞌ nin pagꞌinen moyo saran tumutumbok ko a tutawon mangibwat sa sarban grupon tutawo sa sarban lugar. Ket, sa kappako moyo konra, bawtismwan moyo sara sa ngaran nan Ama, nan Anak, tan nan Masanton Ispirito tan 20 iyakay moyo saran sumunor sa sarban nigan-gan ko komoyo. Ket tandaan moyo a siꞌko, kalamoꞌ moyokon pirmi anggan makaꞌnuman.”