2 Ket narateꞌ rayan natulin anaytaw si baton nipanadaꞌ konan nanabunan. 3 Baleꞌ sin linmuob sara, kasa yaynadtaw a bangkay na ni Uunuren a Jesus. 4 Mangkaguloy isip ra no ani baleꞌ a nangyadiꞌ. Ket sin sain, bigraꞌ a main anan rwa ray lulalakin iti sa dani ra nin kumidla-kidlap a aysing ra. 5 Sa liꞌmo ra ket tinumwek sara, ket wanran saraytin rway lulalaki konra, “Ambaleꞌ nin mantikapen moyay saya nin mabyay iti sa kamiꞌnan ran nunati? 6 Kasa yaynadti si Jesus ta pinasubliꞌ yan mabyay! Panemtemen moyaytaw si nibaritaꞌ na sin itaw ya et sa Galilea. 7 Kai para a wana komoyo ket, ‘Siꞌkon si Pinaitawo, ipagamet rako konran dukaꞌ a tutawo; ipasak rako sa kudos, baleꞌ sa ikatlon awro pasublien akon mabyay?’ ”

8 Ket, napanemtem raynaod a wanin a nibaritaꞌ na ni Jesus.

9 Kanyaꞌ nin linmakwan saran tampor itaw sa nanabunan ket sinmubliꞌ sarayna sa syudad tan nibaritaꞌ ray nangyadiꞌ konran saray labinsayay apostoles tan konran raruman kalalamoꞌ ra. 10 Saray bubbayi a sara si Maria nin taga Magdala, si Juana, si Maria nin ina na ni Santiago, tan saray raruman bubbayin kalalamoꞌ ra a nangibaritaꞌ konran apostoles. 11 Baleꞌ kai rasara nin timper, banaꞌ ta sa wanra ket pinabrika rayti tamoꞌ. 12 Wanin man, si Pedro ket inumdeng ya tan nalayo yan nako sa nanabunan. Sin rinmateꞌ yadtaw, dinmukot yan sinmirꞌip ket say kal-la naꞌkit na say mabistan abel nin nipamarkot konan bangkay. Ket nugot yayna sa bali ra nin manꞌisip-isipen na a no paꞌnoy nangyadiꞌ.^a

13 Sitaw lamang a awro, rwa ray tumutumbok na ni Jesus a manlumalakon adap sa babalin Emaus nin labinsayay kilumitro a kadayꞌan mangibwat sa Jerusalem. 14 Mampagꞌirgwan ray nangyadiꞌ. 15 Ket mintras a mampiirgu-irgo sara, si Jesus kinmadani tan nikialuyon ya konra; 16 baleꞌ kai raya nin naalilbiꞌ ta kai na nin niyaburoy. 17 Sin sain, tinepetan nasara ni Jesus, “Ani anamaet a mampagꞌirgwan moyo mintras a manlumalako kamo?”

Tinumgen sara nin mabereng sara. 18 Ket si saya konra a say ngaran na Cleopas, wana kona ni Jesus, “Siꞌka tana angangkoy sanꞌili sa Jerusalem a kai nin magtandaꞌ sa bubagay a kayadiꞌ nin nangyadiꞌ itaw!”

19 Nitepet na ni Jesus, “Ani in a bubagay?”

Wanran niꞌbat, “Say maipaꞌkaꞌ kona ni Jesus a taga Nazaret. Saya yan prupita tan main nin pakayadiꞌ nin saritaꞌ tan gawaꞌ na sa pangingikit nan Dios tan konran tutawo. 20 Saray Pupangulon Pupadiꞌ tan saray raruman iti sa uray, nipasintinsyawan raya baleꞌ nin patyen ket nipaipasak raya sa kudos; 21 sya pa et a manꞌilalwan min mangilibri konran tutawo nan Israel. Oꞌ, ket saya et, ikatlon awroyna sawanin nangibwat sin nangyadiꞌ in. 22 Ket sukat a main nin umno ray bubbayin kalalamoꞌ mi a nakaꞌngapan mi. Masakbay saran nako sa nanabunan 23 baleꞌ kai raya nin naꞌkit a bangkay na. Nibaritaꞌ ran main nin nipaꞌkit konra nin uanghil nin wanra kano ket mabyay ya. 24 Ket saray raruma komi, nako saradtaw sa nanabunan ket napatutuꞌwan ran say nibaritaꞌ ran bubbayi ket tutuo. Baleꞌ wanin a lamang, kai raya naꞌkit a bangkay na ni Jesus.”

25 Ket wana ni Jesus konra sin sain, “Kalawakaw kamo, ta sabtan idap moyon tepren a nibaritaꞌ ran prupita! 26 Kai moyo para nin tandaꞌ a si syay Cristo ket matkap nin mangitpel ya yapoꞌ nin dyaꞌdyaꞌ baꞌyo ya nin pagalangan?” 27 Miꞌsa, nipapalaway na ni Jesus konra a maipaꞌkaꞌ konan diri a say naisurat sa Masanton Kasuratan mangibwat sa libron nisurat na ni Moises anggan sa sarban nisurat ran sarba ran prupita nan Dios.

28 Sin adani saraynay rway tumutumbok sa baryon keen ra, tumuloy yayna kumon sa keen na si Jesus. 29 Baleꞌ pinaed rayan rway kaaluyon na a wanra, “Itaw kayna yapoꞌ kipagtuloy komi ta manyumabi ana.” Kanyaꞌ nin nayi yayna si Jesus konra.

30 Sin dinmungo saraynan mangan, kinalap na ni Jesus a tinapay miꞌsa nikisalamat ya konan Dios sa sayti. Kayadiꞌ, pinikngaꞌ na baꞌyo na nin nitudol konra. 31 Kapingmatan, naalilbiꞌ rayayna si Jesus baleꞌ bigraꞌ yaynan nakasadtaw.

32 Ket wanra sa saya tan saya, “Ay, kanyaꞌ anamain nin bilang nin napaꞌmot a kapusuan ta sin mangkiirgo ya konta sa dalan tan sin manꞌipapalaway nay Masanton Kasuratan!” 33 Konan siin a lamang nin udas, sinmubliꞌ sara sa Jerusalem.

Ket narateꞌ rasaran nididinep a labinsayay apostoles tan raruman kalalamoꞌ ra 34 a wanra, “Peteg a mabyay yay Uunuren ta pinaꞌkit ya kona ni Simon!” 35 Ket saray rwa, nipapalaway ray nangyadiꞌ sa dalan tan say nikaalilbiꞌ ra kona sin pinikngaꞌ nay tinapay.

36 Leleg nin mampagꞌirgwan ray nangyadiꞌ, bigraꞌ nin pinaipadar ya si Jesus nin inumdeng ya sa butlay ra tan wana, “Main kumon nin katinekan a kukaisipan moyo!”^b

37 Ket nakaꞌngap tan naliꞌmwan sara ta say wanra no lampong yay mangkaꞌkit ra. 38 Kanyaꞌ nin wana ni Jesus konra, “Ambaleꞌ nin naliꞌmwan kamo tan ambaleꞌ nin mampagdwadwa kamo kongko? 39 Kikiten moyoy gamet tan ayi ko. Peteg a siꞌkoytin talaga. Karapasen moyoko; si sayay lampong ket kasan lalaman tan butꞌol nan amboꞌ nin bilang sa mangkaꞌkit moyo sawanin kongko.”

40 Ket anaod nipaꞌkit na konra a gamet tan ayi na.^c 41 Pinasyan ririket tan nipakaꞌngap ra baleꞌ kai sara et nin mamper ket tinepetan nasara ni Jesus, “Main paran maꞌkan iti?” 42 Sin sain, binyan rayan sayay binayan kunaꞌ 43 ket kinalap nayayti tan kinnaꞌ naya sa adapan ra.

44 Kaaram, wana ni Jesus konra, “Baꞌyo ako nin pinati, nibaritaꞌ koyna komoyo a maipaꞌkaꞌ sa nipaisurat nan Dios nin maipaꞌkaꞌ kongko kona ni Moises tan konran prupita tan sa libron Kanta. Nibaritaꞌ ko komoyo a matkap nin matukid a sarba ngaꞌmin nin sain.” 45 Ket pinalawayan na ni Jesus a kukaisipan ra ta pigaw nin matarusan ray rabay nin ibaritaꞌ nin say itaw sa Masanton Kasuratan. 46 Wana konra, “Wanti e a naisurat: Mangirangep yan dyaꞌdyaꞌ tan mati ya a Cristo tan sa ikatlon awro ket pasublien ya nin mabyay. 47 Ket ipatandaan konran tutawo sa sarban nasyon mangibwat sa Jerusalem, a magbabawiꞌ sara ta pigaw nin mapirduna a kasalanan ra banaꞌ sa ginwaꞌ na nin Cristo. 48 Tistigos kamo sa saytin bubagay a nangyadiꞌ kongko. 49 Anaod, ibakiꞌ koya liꞌ komoyo a Ispirito nan Dios nin nipangakoꞌ nan Ama ko; ket misyon kamo sa syudad anggan rumateꞌ ya ta pigaw nin byan nakamon pakayadiꞌ nin ibat sa langit.”

50 Kayadiꞌ nasara nin niꞌras ni Jesus a tumutumbok na anggan sa babalin Betania, nitaꞌgay nay gamet na ta bindisyunan nasara. 51 Sin kapresan nasaran mambindisyunan, nibatiꞌ nasarayna tan niyuliꞌ yayna sa langit.^d 52 Ket rinayo raya^e miꞌsa sinmubliꞌ saraynay tumutumbok na sa Jerusalem a pinasyan ririket ra. 53 Nangibwat sin saytaw, nako saraynan pirmidtaw sa sakop nan Timplo nin mangrayo konan Dios.