Say Nipamatutuo a Kasa yaynadtaw si Jesus sa Nanabunan
20
Baꞌyo et nin kinmalaway sin buklas nin Linggo, nako saraynadtaw si Maria nin taga Magdala sa nanabunan kona ni Jesus. Sin rinmateꞌ yadtaw, naꞌkit na a naglat yaynaytaw si baton nisadaꞌ konan nanabunan. 2 Konan siin, nangred yan nakodtaw sa kamiꞌnan na ni Simon Pedro tan si tumutumbok na ni Jesus nin kawaꞌnan na nin maong. Wana ni Maria konra, “Ginlat rayay bangkay na ni Uunuren itaw sa nanabunan ket kai mi nin tandaꞌ no adti raya nin nikaꞌ!”3 Anaod, nako sara si Pedro tan sitaw nin tumutumbok sa nanabunan. 4 Nalayo sara nin pariho baleꞌ, nauꞌnawan nayan sitaw nin tumutumbok nin nirateꞌ sa nanabunan si Pedro. 5 Dinmukot yan sinmirꞌip sa luob, ket naꞌkit naytaw say abel a nipamarkot kona ni Jesus baleꞌ, kai ya nin linmuob. 6 Rinmateꞌ ya si Pedro ket diri-diritso nan linmuob sa nanabunan. Ket naꞌkit nadtaw taw say abel a nipamarkot kona ni Jesus 7 tan sitaw si abel nin nipamerber nin ulo na. Siti si nipamerber nin ulo na ket naipurok yan naberber et. 8 Ket, sitaw si nuꞌnan nakarateꞌ, linmuob ya anamaet. Sin naꞌkit naytaw, namper yayna nin sinmubliꞌ yan mabyay si Jesus. 9 Wanin ta sin sain, sitaw si naisurat sa Masanton Kasuratan a wana nin matkap ya nin sumubliꞌ nin mabyay, ket kai raya et nin natarusan.
Pinatutuꞌwan na ni Maria a Mabyay ya si Jesus
10 Sinmunor, nagsisubliꞌ saraynay tumutumbok sa kamiꞌnan ra. 11 Si Maria Magdalena baleꞌ, itaw ya et sa liwaꞌ nin nanabunan nin manꞌumakis. Sin kapresan a manꞌumakis ya, nakadukot yan mansumirꞌip sa luob 12 ket main nin rwa radtaw nin anghil nin nakaputiꞌ. Nakatekreꞌ saradtaw sa nangipaidaan konan bangkay na ni Jesus, saya sa ulwan tan saya anamaet sa tuydan. 13 Nitepet ran sarayti kona, “Madam, ambaleꞌ a manꞌumakis ka?”
Ket niꞌbat na konra, “Oꞌ a ta ginlat rayay bangkay na nin Uunuren ko sa nanabunan kona ket kai ko nin tandaꞌ no adti raya nin nikaꞌ.”
14 Nibring ya kayadiꞌ na nin nibaritaꞌ in ket main nin naꞌkit nan nakaꞌdeng. Syayti si Jesus, baleꞌ kai naya nin naalilbiꞌ. 15 Wana ni Jesus, “Madam, ambaleꞌ a manꞌumakis ka? Siꞌno a mantikapen mo?”
Ket si Maria, nipaꞌkaꞌ na a si mammaga konan siin a lugar yayti kanyaꞌ nin wana kona, “Angkay, no siꞌkamo a nanglat konadti, ibaritaꞌ moyo pa no adti moya nin nikaꞌ ta keen koyadtaw nin kalapen.”
16 Ket, “Maria!” wana ni Jesus.
Kinmikit ya kona si Maria Magdalena a wana, “Rabboni!” a saritaꞌ yayti nin Hebreo nin say katarusan na ket “Maistro”.
17 Wana ni Jesus, “Andiꞌ nako nin gaꞌgetan ta kai ako et nin nakasubliꞌ itaw konan Ama ko. Ana edet, apurawen mon ikaꞌ nin ipatandaꞌ konran tumutumbok ko a kwinta ana bubsat ko, a sumubliꞌ akoynadtaw konan Ama ko nin Ama moyoynan lamang, sya a Dios ko nin Dios moyoynan lamang.”
18 Ket konan siin, nako ya anaod si Maria nin taga Magdala konra nin tumutumbok tan nibaritaꞌ na konra, “Naꞌkit koya a Uunuren!” Ket niparateꞌ na anaod a nibaritaꞌ na ni Jesus.
Say Pammatutuo konran Tumutumbok a Mabyay ya si Jesus
19 Sin yabi konan siin nin awron Linggo, tinarangkawan ray purta sa bali nin nididinepan ran tumutumbok na ni Jesus banaꞌ ta maliꞌmo sara konra nin pupangulon Judio. Ket rinmateꞌ ya si Jesus nin inumdeng yadtaw sa butlay ra. “Main kumon nin katinekan a kukaisipan moyo,” wana konra. 20 Kayadiꞌ na nin nibaritaꞌ ti, nipaꞌkit na konra a gamet na tan si riking na. Pinasyan ririket ran tumutumbok sin naꞌkit raya a Uunuren.
21 Wana anamanaet ni Jesus, “Main kumon nin katinekan a kukaisipan moyo. Kapada a nibakiꞌ nako nin Ama, wanin anamaet, ibakiꞌ katamo.” 22 Kayadiꞌ na nin nibaritaꞌ ti, pinaysepan nasaran inanawa na ni Jesus miꞌsa wana, “Akuen moya a Ispirito nan Dios. 23 Saray pirdunawen moyoy kukasalanan ra, napirduna sarayna anaod; saray kai moyo nin pirdunawen ket kai sara nin napirduna.”
24 Si Tomas a main nin purarag nin Singin a saya konran labinrwa, kasa ya baleꞌ sin rinmateꞌ ya si Jesus 25 kanyaꞌ nin wanran raruma kona, “Naꞌkit miya a Uunuren!”
Ket niꞌbat na ni Tomas, “No kai ko nin maꞌkit tan maarikap a ubot nin ibwatan nin pasak sa gamet na tan maikurbot a gamet ko sa riking na, kai ako nin mamper.”
26 Napalabas a masurok a sayay linggo, nididinep sara anamana a tumutumbok sa luob nin bali, ket kalamoꞌ raya si Tomas. Natarangkawan a purta baleꞌ sinumrep ya si Jesus ket inumdeng ya sa butlay ra. “Main kumon nin katinekan a kukaisipan moyo,” wana konra. 27 Miꞌsa wana kona ni Tomas, “Kiten moy gamet ko tan ikwa moy garamay mo sa ubot nin ibwatan nin pasak tan ikurbot moy gamet mo sa riking ko. Andiꞌ kayna nin magdwadwa no kai edet, mamper kayna.”
28 Ket inumbat ya si Tomas tan wana kona ni Jesus, “Siꞌka a Uunuren ko tan si Dios kon raywen ko!”
29 Wana ni Jesus kona, “Mamper kayna para banaꞌ ta naꞌkit nakoyna? Makarmaꞌ tan maririket saray mamper mataman nin kai rako nin naꞌkit.”
Si Gagara nan sitin Libro
30 Abaw et a parso nin naꞌkit ran tumutumbok a nangwa-nangwaꞌ ya si Jesus nin pammatutuo nin maipaꞌkaꞌ kona a kai naisurat iti konan sitin libro. 31 Ket say naisurat iti, naisurat anaod ta pigaw nin mamper kamo a si Jesus, syay Criston nipangakoꞌ nan Dios, a sya a Anak nan Dios tan ta pigaw nin magkamain kamo nin byay yupaꞌ sa pakikalamoꞌ moyo kona banaꞌ ta mantepren moyo in nin pageꞌ.