3 Wana ni Simon Pedro konra, “Mako ako nin mangunaꞌ.”

Ket, “Mayi kami,” wanra kona. Nako sara anaod sa taaw baleꞌ kasa gapo nin nakalap ra sin sain a yabi.

4 Sin manlumiwaꞌ yayna a awro, itaw yan nakaꞌdeng sa abay si Jesus, baleꞌ kai raya nin maalilbiꞌ nin tumutumbok. 5 Wana ni Jesus konra, “Uamigo, main nin nakalap moyo?”

Ket, “Kasa gapo anaod,” wanra nin niꞌbat.

6 Wana konra, “Ikatkat moyay eket moyo sa bandan wanan na nin baluto ket main nin makalap moyo.” Nikatkat raya anaod a eket ra ket kai rayayna nin maarwas sa kaꞌbawan nin nakalap.

7 Ket wana kona ni Pedro nin si tumutumbok a kawaꞌnan na ni Jesus, “Si Uunuren ya in!” Sin narngeꞌ nayti ni Simon Pedro, niaysing ya banaꞌ ta lusꞌok yan mampagtrabaho, miꞌsa ya nin linmukso sa ranom. 8 Baleꞌ saray raruma, inmabay saran iti sa baluto nin guruy-guroy raya a eket nin napnoꞌ nin kunaꞌ. Amboꞌ sara nin adayoꞌ nin tuloy sa abay, magsanyasot a mitro tamoꞌ a kaadayoꞌ ra.

9 Sin itaw sarayna sa tangkar, main nin naꞌkit radtaw nin mandumtan baya ket main nin manꞌibaya nin kunaꞌ tan main nin umno ray tinapay. 10 Sin sain, wana ni Jesus konra, “Mangawit kamodti nin umno ra sa sain say nakalap moyon kunaꞌ.” 11 Nako ya anaod si Simon Pedro sa baluto ket nitangkar nayay eket nin napnoꞌ nin alalakin kunaꞌ, 153 sara. Baleꞌ mataman nin pinasyan kaꞌbawan ra nin kunaꞌ, kai nin rinmisang a eket.

12 “Pari ana, mamuklas atamoyna,” wana ni Jesus konra. Kasa gapo ni saya konra nin tumutumbok a nakaitpel nin nanepet no siꞌno ya banaꞌ ta tandaꞌ ra a sya si Uunuren. 13 Kinaꞌ na nin kinalap ni Jesus a tinapay, wanin et sa kunaꞌ, miꞌsa na nin nibi konra.

14 Siti a ikatlon parso a nipaꞌkit ya si Jesus konran tumutumbok na sin sinmubliꞌ yayna nin mabyay.

15 Kayadiꞌ ra nin nangan, nitepet na ni Jesus kona ni Simon Pedro, “Simon a anak na ni Juan, mas para a pangangawaꞌnan mo kongko dyan sa saytin bubagay?”

“Oꞌ, Uunuren, tandaꞌ mon mampablyen kata,” niꞌbat na ni Pedro.

Ket wana ni Jesus kona, “Edet, pagawan mosara a paꞌsar malalagoꞌ et nin karniro ko.”

16 Nitepet na nin pirwa ni Jesus, “Simon a anak na ni Juan, main nin pangangawaꞌnan mo kongko?”

Niꞌbat na ni Pedro, “Oꞌ Uunuren, tandaꞌ mon mampablyen kata.”

Wana ni Jesus kona, “Edet, asikaswen mosaray paꞌsar karniro ko.”

17 Nitepet nan pitlo ni Jesus, “Simon a anak na ni Juan, siꞌko para a mampablyen mo?”

Ginmereng ya si Pedro ta pinitlo na nin nitepet ni Jesus no mampablyen naya. Anaod inumbat ya si Pedro a wana, “Uunuren, tandaꞌ mo a sarba. Tandaꞌ mo a mampablyen kata.”

Wana anamanaet ni Jesus kona, “Edet, pagawan mosaray paꞌsar karniro ko. 18 Isipen moyti nin maong, Simon. Sin kalaguꞌ-laguan mo, siꞌkan diri a mangisulot nin barkes mo tan nako ka sa rabay mo nin keen. Baleꞌ no masiken kayna liꞌ, ipaꞌnat moy takyay mo tan baruren raka tan ikaꞌ rakadtaw sa kai mo nin rabay nin keen.” 19 Nibaritaꞌ nayti ni Jesus ta pigaw nin ipatandaan na no paꞌno ya nin mati si Pedro nin mabyan yan pammagalang a Dios.

Kaaram, wana ni Jesus kona ni Pedro, “Tumumbok ka kongko!”

20 Linmingap ya si Pedro ket naꞌkit nayan mantumumbok taw si tumutumbok a kawaꞌnan na ni Jesus. Sitaw si kadani na sin pangngapon ra tan si nanepet intaw kona a wana, “Uunuren, siꞌno a magtraidor komo?”

21 Sin naꞌkit nayayti ni Pedro, nitepet na kona ni Jesus, “Uunuren, ani anamanaet a mangyadiꞌ konan sitin tawo ey?”

22 Niꞌbat na ni Jesus, “Bilang wadiꞌ a rabay koya nin mabyay angga liꞌ nin sumubliꞌ akodti, ambaleꞌ a kapagawan mo ey? Siꞌka, tumumbok ka kongko!”

23 Kanyaꞌ nin naibandu-bando konra nin tutawo na ni Jesus a kai ya nin mati ti nin tumutumbok mataman nin kai na nin nibaritaꞌ ni Jesus a wanin, no kai edet, wana, “Bilang wadiꞌ a rabay koya nin mabyay angga no sumubliꞌ akoynadti, ambaleꞌ a kapagawan mo ey?”

24 Siꞌko ya in nin tumutumbok. Mampatutuꞌwan ko a siꞌkoy nanurat nin sayti, ket tandaꞌ mi a say nibari-baritaꞌ ko ket tutuo.

25 Abaw et a ginwa-ginwaꞌ na ni Jesus a no isurat ngaꞌmin, sa wangko, kai nin malaman nin intiron mundo a libro nin pakaisuratan.