Say Uꞌnan Pakaꞌkitan a si Jesus, Syay Anak nan Dios
2
Napalabas a rway awro, nagkamain nin bansal itaw sa babalin Cana sa prubinsyan Galilea. Itaw ya a ina na ni Jesus 2 tan wanin ya anamaet si Jesus tan saray tumutumbok kona ta sinagyat sara anamaet. 3 Sin naꞌpos anay araka, wanan ina na ni Jesus kona, “Naꞌpusan saran arak.”4 Ket wana ni Jesus, “Madam, say pangingisip ko, ket amboꞌ nin kapada a pangingisip mo. Matkap yapoꞌ nin marateꞌ a manepeg nin udas para kongko.”
5 Sin sain, wana ni ina na konra nin mampagsirbi, “Gawꞌen moyo a sarban ipagwaꞌ na komoyo.”
6 Main itaw nin aꞌnem ray pasig nin pangangwan nin ranom. Sayti ket para sa kaugalian ran Judio nin pangunguyas ra ta pigaw nin maikanaꞌ sara sa pangingikit nan Dios. Makalaman a barang saya nin pasig nin rwampuloꞌ anggan tulumpuloꞌ a galon. 7 Wana ni Jesus konran saray mampagsirbi, “Punꞌen moyo nin ranom in say pasig.” Ket pinnoꞌ ra anaod anggan labiꞌ. 8 Sin nayadiꞌ wana konran saray mampagsirbi, “Manarok kamo tan ikaꞌ moyo konan si mampangasikasodti sa bansal.” Ket nangikaꞌ sara anaod kona. 9 Tinawayan nan si mampangasikason bansal ket, arak ana. Kai na nin tandaꞌ no adti a ibwatan nin sayti ta sara tamoꞌ anaod taw saray nanarok a makatandaꞌ. Sin wanin, tinawag nayay lalakin nikasal 10 tan wana kona, “Say ugaliꞌ, say sangkatawayan nin arak a muꞌna ran ipainom miꞌsa no abaw ana liꞌ a nainom ran tutawo, iliwaꞌ raynaytaw si makapoy a taway. Siꞌkamo baleꞌ, nisuyot moyo a sangkatawayan nin arak!”
11 Sitin ginwaꞌ nadtaw ni Jesus sa babalin Cana sa Galilea, sya a uꞌnan pammatutuo nin maipaꞌkaꞌ no siꞌno ya tan mangipaꞌkit ti nin kataꞌgayan na. Ket saray tumutumbok na, lalo saraynan nagmatalek kona.
12 Kayadiꞌ sain, namabaybay ya si Jesus nin nako sa syudad nin Capernaum. Kalamoꞌ naya si inay na, saray bubsat na tan saray tumutumbok na, ket itaw sara nin umnoy awro.
Say Pakayadiꞌ na ni Jesus Maipaꞌkaꞌ sa Timplo
13 Sin adani ana a pista ran Judio a mantawagen nin Nipanglabasb, tinmangkar sara si Jesus sa Jerusalem ta pigaw nin kipista sara. 14 Nako ya sa Timplo ket narateꞌ na a main nin maglalakoꞌ nin baka, karniro, kalapatic, tan maninili nin kwartad sa sayay partidtaw. 15 Nangwaꞌ ya nin sanet nin rubir tan pinalakwan nasaradtaw sa sakop nan Timplo, pati saray baka tan karniro. Nisabwag nay kwarta ran maninili tan tinali-talimbwag nay lamisawan ra. 16 Wana konra nin maglalakoꞌ nin kalapati, “Galten moyo saradti in! Andiꞌ moya nin gawꞌen nin palingki a Bali nan Ama ko!” 17 Ket napanemtem ran tumutumbok na a mabasa sa Masanton Kasuratan a wana, “Say masuet nin pangingisakit ko konan Bali mo ket manꞌupusen a kasaw ko.”e
18 Konan siin saray pupangulo ran Judio wanra kona, “Ani anamaet wadiꞌ a pakatandaan nin maipaꞌkit mo a main nin pakayadiꞌ mon mangwaꞌ nin wanin?”
19 Ket niꞌbat na ni Jesus konra, “Sidaen moyayti nin timplo ket pabaꞌyuwen koya sa luob nin tuloy awro.”
20 Konan siin wanra, “Narateꞌ a aꞌpat a puloꞌ tan aꞌnem a taon sa nipamaꞌdeng konan sitin Timplo, ket wamo paꞌdengen man uman sa luob nin tuloy awro?”
21 Si timplo baleꞌ nin manꞌirgwen na ni Jesus ket si lalaman na. 22 Kanyaꞌ nin sin pinasubliꞌ yaynan mabyay si Jesus, napanemtem ra nin tumutumbok nayti nin inirgo na. Ket say nangyadiꞌ, namper sara sa naisurat sa Masanton Kasuratan maipaꞌkaꞌ kona tan sa nibari-baritaꞌ na.
23 Sin itaw ya si Jesus konan siin nin pista sa Jerusalem, abaw saray nakaimaton sa say ginwa-ginwaꞌ nan nangipaꞌkit a nangibwat ya konan Dios. Ket anaod, abaw sara a namper no siꞌno ya. 24 Baleꞌ kai na nin nipadar konra a maipaꞌkaꞌ sa lalaman nan diri banaꞌ ta tandaꞌ nay pinanakem nin sarban tawo. 25 Kai ana nin matkap a main et nin mangibaritaꞌ kona nin maipaꞌkaꞌ sa siꞌnuman ta sulpot nayna a kaisipan nin sarban tawo.